وثايق وقفة عرابي في ساحة عابدين في ثورة 1881

إفتكار البنداري السيد (نفرتاري أحمس)

زي ما في محترفين تزوير صور وفيديوهات، في مثقفين محترفين تزوير تاريخ

وفي السنين الأخيرة طلع كلام إن وقفة الجيش المصري بزعامة أحمد عرابي في ساحة عابدين ما حصلتشي

وإنها مجرد أسطورة كتبها عرابي في مذكراته 1910 بعد ما رجع من المنفى ولقى ناس بتتهمه إنه سبب ضياع البلد وسقوطها في إيد الاحتلال الإنجليزي، فراح ألف القصة دي عشان يقدم نفسه بطل..

ومن أشهر اللي سوقو للكلام ده الكاتب الصحفي إبراهيم عيسى في برنامجه "25/30" على قناة أون تي في سنة 2014
ونشرت القناة الفيديو تحت عنوان "مفاجأة.. إبراهيم عيسى: وقفة عرابي أمام الخديوي توفيق أكذوبة"

اسمعوه في الفيديو ده.. وتأملو إيه قال

https://www.youtube.com/watch?v=WCReZS6cG5A

وليه بنقول "تزوير"؟ .. لأن كل حرف قاله مردود عليه في طوفان من الوثايق والكتب اللي بترجع لعصر عرابي، ومصريين وأجانب، من اللي بيحبو عرابي أو يكرهوه وثقو الوقفة دي، واتكلمو عن اللي حصل فيها، والوثايق والكتب دي مش سرية، لكنها مرطرطة في المكتبات وعلى الإنترنت، ولا يمكن حد يقرا عن ثورة 1881 وما يقعشي حاجة منها في إيده، وإلا يبقى معناها ما قراشي حاجة عن الثورة أساسا

أو معناها قرا، لكن بيعتمد على إن معظم المصريين ما قروهاشي، فبينكر كل اللي شافه باطمئنان

وأهمية كشف احترافية واحد زي إبراهيم عيسى في تزوير التاريخ مهمة جدا لينا دلوقتي لأنها بتكشف إزاي بتتزور أحداث كتيرة في تاريخ مصر عشان تسرق ذاكرتها، وترجعها للاحتلال بكل طريقة من جديد

هبدأ دلوقت أنزل الوثايق القديمة اللي تزوير إبراهيم عيسى المتعمد في اللي قاله، هو قال في الحلقة

1- إن وقفة الجيش المصري ضد توفيق في ساحة عابدين محصلتش

2- إن عبد الله النديم ومحمد عبده والتحقيقات مع قادة الثورة جابوش سيرة وقفة عابدين

3- إن عرابي اخترع الوقفة لما رجع من المنفى واتفاجئ بإن في ناس ضده، فاخترعها عشان يجيب تعاطف

4- عرابي لا ركب حصان ولا رفعه سيفه في ساحة عابدين، ولا قابل توفيق من أساسه

ونبدأ نفتح المراجع والوثايق وندور:

قال إبراهيم عيسى إن الشيخ محمد عبده- واحد من اللي شارك في ثورة 1881 جبش في مذكراته خااالص سيرة وقفة عابدين ولا إن عرابي ركب الحصان وراح قابل توفيق، لكن لما رجعنا لمذكرات عبده لقيناها بيحكي عن الوقفة تحت عنوان "أسباب الحادث"، ويقصد بالحادث وقفة عابدين، وإن الجيش المصري راح قابل الخديوي ف عابدين

الصفحات اللي فاتت من مذكرات الشيخ محمد عبده موجودة في المرجع ده تحت عنوان "أسباب الحادث" ص 127- 131 وده لينك تحميلها

https://ia801702.us.archive.org/26/items/modhakkerat_abdo/modhakkerat_abdo.pdf

وقال إبراهيم عيسى إن عبد الله النديم- المشهور بلقب خطيب الثورة العرابية- مجبشي خااالص سيرة إن عرابي راح عابدين وقدم مطالب الشعب لتوفيق أما اللي حصل حقيقي فالنديم نشر كذا مرة في جرنانه "التنكيت والتبكيت" أخبار بطولات عرابي والجيش المصري في ساحة عابدين، وهو كله فخر وسعادة بيها

وقال عبد الله النديم في "التنكيت والتبكيت" العدد 17 بتاريخ 9 أكتوبر 1881 تحت عنوان "زفاف الحرية إلى مصر" إنه هو نفسه خطب وسط الجنود بعد الوقفة وحكى عن إنه بعد ما ضاق المصريين بتحكم الأجانب فيهم راح "الجند المظفر" بين يدي مليكه يقدم طلبات الشعب، وافتخر بإنه في الوقت اللي بلاد تانية لما جيشها يعمل ثورة بيعمل مدابح، إلا إن جيش مصر عمل ثورته من غير نقطة دم

خريطة غلط منتشرة لمصر على تويتر وفيس بوك .. ودي هي خريطة مصر الصح

الخريطة دي  منتشرة على النت، وهي خريطة غلط لمصر

دقق هتلاقي الركن الجنوبي الشرقي معمول عند حلايب وشلاتين خطوط مقطعة

ودي معناها في القانون الدولي "أرض متنازع عليها" يعني مشكوك إنها مصرية، وبتنشرها دول أجنبية مش مصر، دول بتجامل السودان على حسابنا

أما الخريطة دي فهي خريطة مصر الصح🇪🇬 من موقع هيئة الاستعلامات

حدود مصر الجنوبية خط مستقيم ومش مقطع ولا معمول مثلث في الركن الجنوبي الشرقي✋

مصادر ل #خريطة_مصر الصح 🇪🇬

موقع الهيئة العامة للاستعلامات

http://www.sis.gov.eg/section/10/20?lang=ar

موقع محافظة الجيزة تبع وزارة التخطيط

http://www.giza.gov.eg/country%20map/default.aspx

فيديو لخريطة مصر نشرته وكالة أنباء الشرق الأوسط

https://www.youtube.com/watch?v=cPXEMgBeOn8

(نفرتاري أحمس)

#خريطة_مصر

#هويتي_مصر

#مصر_للمصريين_وبالمصريين