وثايق وقفة عرابي في ساحة عابدين في ثورة 1881

إفتكار البنداري السيد (نفرتاري أحمس)

زي ما في محترفين تزوير صور وفيديوهات، في مثقفين محترفين تزوير تاريخ

وفي السنين الأخيرة طلع كلام إن وقفة الجيش المصري بزعامة أحمد عرابي في ساحة عابدين ما حصلتشي

وإنها مجرد أسطورة كتبها عرابي في مذكراته 1910 بعد ما رجع من المنفى ولقى ناس بتتهمه إنه سبب ضياع البلد وسقوطها في إيد الاحتلال الإنجليزي، فراح ألف القصة دي عشان يقدم نفسه بطل..

ومن أشهر اللي سوقو للكلام ده الكاتب الصحفي إبراهيم عيسى في برنامجه "25/30" على قناة أون تي في سنة 2014
ونشرت القناة الفيديو تحت عنوان "مفاجأة.. إبراهيم عيسى: وقفة عرابي أمام الخديوي توفيق أكذوبة"

اسمعوه في الفيديو ده.. وتأملو إيه قال

https://www.youtube.com/watch?v=WCReZS6cG5A

وليه بنقول "تزوير"؟ .. لأن كل حرف قاله مردود عليه في طوفان من الوثايق والكتب اللي بترجع لعصر عرابي، ومصريين وأجانب، من اللي بيحبو عرابي أو يكرهوه وثقو الوقفة دي، واتكلمو عن اللي حصل فيها، والوثايق والكتب دي مش سرية، لكنها مرطرطة في المكتبات وعلى الإنترنت، ولا يمكن حد يقرا عن ثورة 1881 وما يقعشي حاجة منها في إيده، وإلا يبقى معناها ما قراشي حاجة عن الثورة أساسا

أو معناها قرا، لكن بيعتمد على إن معظم المصريين ما قروهاشي، فبينكر كل اللي شافه باطمئنان

وأهمية كشف احترافية واحد زي إبراهيم عيسى في تزوير التاريخ مهمة جدا لينا دلوقتي لأنها بتكشف إزاي بتتزور أحداث كتيرة في تاريخ مصر عشان تسرق ذاكرتها، وترجعها للاحتلال بكل طريقة من جديد

هبدأ دلوقت أنزل الوثايق القديمة اللي تزوير إبراهيم عيسى المتعمد في اللي قاله، هو قال في الحلقة

1- إن وقفة الجيش المصري ضد توفيق في ساحة عابدين محصلتش

2- إن عبد الله النديم ومحمد عبده والتحقيقات مع قادة الثورة جابوش سيرة وقفة عابدين

3- إن عرابي اخترع الوقفة لما رجع من المنفى واتفاجئ بإن في ناس ضده، فاخترعها عشان يجيب تعاطف

4- عرابي لا ركب حصان ولا رفعه سيفه في ساحة عابدين، ولا قابل توفيق من أساسه

ونبدأ نفتح المراجع والوثايق وندور:

قال إبراهيم عيسى إن الشيخ محمد عبده- واحد من اللي شارك في ثورة 1881 جبش في مذكراته خااالص سيرة وقفة عابدين ولا إن عرابي ركب الحصان وراح قابل توفيق، لكن لما رجعنا لمذكرات عبده لقيناها بيحكي عن الوقفة تحت عنوان "أسباب الحادث"، ويقصد بالحادث وقفة عابدين، وإن الجيش المصري راح قابل الخديوي ف عابدين

الصفحات اللي فاتت من مذكرات الشيخ محمد عبده موجودة في المرجع ده تحت عنوان "أسباب الحادث" ص 127- 131 وده لينك تحميلها

https://ia801702.us.archive.org/26/items/modhakkerat_abdo/modhakkerat_abdo.pdf

وقال إبراهيم عيسى إن عبد الله النديم- المشهور بلقب خطيب الثورة العرابية- مجبشي خااالص سيرة إن عرابي راح عابدين وقدم مطالب الشعب لتوفيق أما اللي حصل حقيقي فالنديم نشر كذا مرة في جرنانه "التنكيت والتبكيت" أخبار بطولات عرابي والجيش المصري في ساحة عابدين، وهو كله فخر وسعادة بيها

وقال عبد الله النديم في "التنكيت والتبكيت" العدد 17 بتاريخ 9 أكتوبر 1881 تحت عنوان "زفاف الحرية إلى مصر" إنه هو نفسه خطب وسط الجنود بعد الوقفة وحكى عن إنه بعد ما ضاق المصريين بتحكم الأجانب فيهم راح "الجند المظفر" بين يدي مليكه يقدم طلبات الشعب، وافتخر بإنه في الوقت اللي بلاد تانية لما جيشها يعمل ثورة بيعمل مدابح، إلا إن جيش مصر عمل ثورته من غير نقطة دم

و في مقالة تانية عنوانها "سيف النصر في نحر عدو مصر" العدد 18 بتاريخ 16 أكتوبر 1881 نقل عبد الله النديم كلمة القائمقام طلبة عصمت- من قادة الثورة- لنظامي باشا مبعوث السلطان العثمانلي بيشرح أسباب وقفة عابدين بقيادة عرابي

وقال طلبة عصمت إن من أسباب إن الجيش المصري راح قصر عابدين إنه الظباط سبق وقدمو طلبات كتير لرئيس النظار رياض (شركسي/يهودي) عشان يمنع تسريح جنود الجيش لأن الأجانب بيكترو في البلد وحمايتها يلزمها جيش كبير، لكن رياض طنشهم

وف مقالة تالتة عنوانها"نبذة من تاريخ الهمام أحمد بن عرابي" حكى عبد الله النديم إن وقفة عابدين حصلت بعد جمع قلوب الجنود على هدف واحد، وقابل عرابي توفيق، وأطلق مع إخوانه حرية الأهالي وفتحوا مجلس النواب وأسقطوا الوزارة إلخ يبقى إزاي يا إبراهيم عيسى النديم جبش سيرة وقفة عابدين ولا مرة

مصدر المقالات السابقة ل عبد الله النديم من جرنان "التنكيت والتبكيت" في الكتاب ده وهو بينشر كامل أعداد المجلة بالنص وبتاريخ صدور كل عدد، بالخط اللي اتنشرت بيه، فهو كتاب بيحتوي المجلة، مرتبة بالأعداد..

https://ia902802.us.archive.org/29/items/Heliopolis1957_gmail_20180605_1248/%D8%B9%D8%A8%D8%AF%20%D8%A7%D9%84%D9%84%D9%87%20%D8%A7%D9%84%D9%86%D8%AF%D9%8A%D9%85%20%D8%A7%D9%84%D8%AA%D9%83%D9%8A%D8%AA%20%D9%88%D8%A7%D9%84%D8%AA%D8%A8%D9%83%D9%8A%D8%AA.pdf

وقال إبراهيم عيسى إنه محدش من اللي عاصر عرابي جاب سيرة وقفة عابدين، وطنش عيسى إنه في كتاب مشهور جدا اسمه "مصر للمصريين" كتبه سليم النقاش وصدر 1884 (يعني بعد 3 سنين بس على وقفة عابدين) بيوثق لأحداث الوقفة وأسبابها وللحوار بين عرابي وتوفيق ونتايجها

وجابها النقاش في الجزء الرابع تحت عنوان "فصل في حادثة عابدين التي وقعت شهر سبتمبر 1881" ، ورغم كراهية الصحفيين الشوام لثورة 1881 لأنها رفعت شعار "مصر للمصريين"،  وتأييدهم لتوفيق والاحتلال (هو صحفي شامي) إلا إنه كان أول من نشر أحداثها بمحاضرها ومراسلاتها ووثايقها كنوع من السبق، ولأنه عنده نفوذ يجيب الوثايق من الحكومة

الصفحات اللي فاتت من كتاب "مصر للمصريين" من أول طبعة صدرت 1884 هتلاقيها في الكتاب ده من ص 90- 93 وبعدين أصدرتها هيئة الكتاب في طبعة حديثة لكن مش معايا غير رابط الطبعة الأولانية

وخلي بالك وإنت بتقرا هات الكتاب من تحت لفوق مش العكس لحد ما توصل لصفحة 90 .. اللي صور الكتاب ونزله على النت نزله بالطريقة دي

https://ia800201.us.archive.org/28/items/misrlilmiryn45naqquoft/misrlilmiryn45naqquoft.pdf

وبجرأة قال إبراهيم عيسى إن التحقيقات اللي اتعملت مع قادة الثورة لما اتحاكمو مجبتش خالص سيرة وقفة عابدين أو إن عرابي ركب الحصان وكدة.. وطنش برضو إن كتاب "مصر للمصريين" نشر بداية من الجزء السابع نصوص التحقيقات بالحرف زي ما أخدها من الحكومة وقتها

التحقيقات حصلت مع كل قادة الثورة وكتير من اللي شارك فيها وبيبدأ الكتاب بمحضر التحقيق مع عرابي بعد موقعة التل الكبير وبيسألوه س وج عن سبب وقفة عابدين وإيه اللي حصل فيها، وحكى مقابلته لتوفيق، إلخ، واتكلمو عن وقفة عابدين برضو مع محمود سامي البارودي والقائمقام أحمد عبد الغفار إلخ

استجواب عرابي من ص 5

واستجواب محمود سامي البارودي من 67- 70

واستجواب القائمقام أحمد عبد العفار ص 211

 وده لينك تحميله بس برضو أبدأو القراية من تحت لفوق مش العكس

https://ia800208.us.archive.org/1/items/misrlilmiryn67naqquoft/misrlilmiryn67naqquoft.pdf

وكان بيغطي ثورة 1881 صحفي سويسري اسمه جون نينيه - عاش في مصر من أيام محمد علي لحد توفيق- ويبعت برقيات بالأخبار لحظة بلحظة للجرانين الأوروبية، وكتب نينه عن وقفة عابدين اعتبرها ثورة لأنه كان من المتضامنين مع الفلاحين واعتبرها بوابة الحرية ليهم من الاستبداد التركي والأجنبي عموما

وكدب إبراهيم عيسى لما قال إن عرابي ما قالش لتوفيق إننا أحرار ومحدش هيستعبدنا، وإن عرابي ألف الكلمة دي لما رجع من المنفى.

لكن لقينا إن جون نينه سجل في برقية بعتها لصحف أوروبا في نفس شهر وقفة عابدين- سبتمبر 1881- إن عرابي قال الكلمة دي لتوفيق وقت الأحداث، يعني لا كان عرابي اتحبس ولا اتنفى (ص333)

وجه في نص الحوار اللي نقله نينه وهو طازة

  توفيق: ماذا تريدون هنا؟ عودوا إلى ثكناتكم

عرابي: احذر: نحن لسنا مملوكين لأحد .. ولسنا عبيدا لكم، نحن الشعب المصري، لقد طلبنا ولم يستجب أحد لطلبنا، والآن نحن نريد

لينك تحميل كتاب جون نينه وعنوانه "رسائل من مصر 1897- 1882)

https://ia800208.us.archive.org/1/items/misrlilmiryn67naqquoft/misrlilmiryn67naqquoft.pdf

السياسي والمؤرخ سكاون بلنت من شهود العيان على ثورة 1881 ، لأنه كان في مصر ورفيق لعرابي وفي كتابه "التاريخ السري لاحتلال الإنجليزي لمصر" سجل فرحة الناس بوقفة عابدين وسجل مقابلاته مع عرابي خلال الأحداث، حكاله فيها عن الحوار اللي حصل بينه وبين توفيق واللي قليل اللي سمعوه لأن توفيق استدعى عرابي بعيد عن الحشد اللي متجمع من الجيش والجماهير عشان محدش يسمع الحوار ويظهر فيه ضعف توفيق قصاده وقاله عرابي كلمة إننا أحرار ومحدش هيورثنا ودي سجلها بلنت قبل ما عرابي يرجع من المنفى

في حاجة مهمة نلاحظها في توثيق سكاون بلنت ل ثورة 1881 إنه مفيش كلمة توفيق كان بيتكلمها مع عرابي إلا لما يكون اللي قاله عليها القناصل الإنجليز والأجانب.. لدرجة كولفن قال لتوفيق ادخل جوة عشان شكله يبقاش وحش قصاد الجماهير وده نقله سكاون بلنت عن وثايق إنجلترا نفسها

تحميل كتاب سكاون بلنت 

https://ia800104.us.archive.org/19/items/books4arab-0086/239.pdf

ميخائيل شاروبيم من أشهر مؤرخين القرن 19 سجل في كتابه "تاريخ مصر القديم والحديث" ج 4 أحداث ورة 1881 ومنها وقفة عابدين 9-9-1881  وأسبابها ونتايجها برضو وإزاي توفيق حاول يمنعها وقدرشي والكتاب اتنشر أول مرة 1898 يعني قبل ما عرابي يرجع من المنفى

رابط تحميل الجزء 4 من كتاب الكافي في تاريخ مصر القديم والحديث وتسجيل الأحداث بداية من ص 305

https://ia601608.us.archive.org/12/items/lisanarabs.blogspot.com-Kafe/lisanarabs-Kafe4.pdf

أحمد شفيق باشا رئيس الديوان الخديوي أيام عباس حلمي التاني (ابن توفيق) سجل ف مذكراته أحداث الثورة والوقفة كشاهد عيان لأنه وقتها كان موظف شاب ف الديوان وواقف جنب توفيق- زي ما هو قال- ورغم إنه ضمن شلة الخونة مع توفيق، لكن سجل الأحداث بشكل يختلفشي ف خطوطه العريضة عن اللي حصل فعلا

وسجل شفيق باشا إنه شاف مع حاشية توفيق الجيش داخل ساحة عابدين و وعرابي  "راكبا جواده شاهرا سيفه"، وقدم المطالب الشعبية لتوفيق نخلي بالنا إن إبراهيم عيسى وهو بينكر إن وقفة عابدين حصلت من أساسه أتريق ع حكاية إن عرابي دخل ع توفيق بالحصان والسيف وقال محصلش

ده رابط تحميل الجزء الأول من مذكرات شفيق باشا شاهد العيان على أحداث وقفة عابدين اللي أصدرها بعد كدة بسنين طويلة سنة 1934 وكلامه عن الوقفة اللي سماها "المظاهرة العرابية الثانية" بيبدأ من ص 118

https://ia801904.us.archive.org/25/items/hamed_1_201701/%D9%85%D8%B0%D9%83%D8%B1%D8%A7%D8%AA%D9%8A%20%D9%81%D9%8A%20%D9%86%D8%B5%D9%81%20%D9%82%D8%B1%D9%86%20%20%D8%AC1.pdf

كرومر، مندوب الاحتلال البريطاني، سجل في كتابه "مصر الحديثة" ج 1 تحت عنوان "تمرد الجيش المصري يناير- سبتمبر من العام 1881"، أحداث وقفة عابدين وقال إن من أسبابها "المظالم الحقيقية التي لم يجر الانتباه إليها"، و"الإدارة السيئة" للخديوي ونقل من وثايق بريطانية إن القناصل

إن القناصل والمسئولين الإنجليز (كولفن و كوكسون) كانو هما اللي بيشيرو ع توفيق يعمل إيه وإن توفيق كان مهزوز وخايف، فطلب كولفن منه يدخل جوة القصر وتولى كولفن الإنجليزي التفاوض مع عربي بداله وأصر عرابي على طلباته: زيادة عدد الجيش+ إقالة وزارة رياض+ عمل برلمان

رابط تحميل كتاب كرومر "مصر الحديثة" الجزء الأول في الفصل 11 ص 249- 261

https://ia800808.us.archive.org/17/items/hstars81_gmail_1_20170830_2039/%D9%85%D8%B5%D8%B1%20%D8%A7%D9%84%D8%AD%D8%AF%D9%8A%D8%AB%D8%A9%20-%20%D8%A7%D9%84%D9%84%D9%88%D8%B1%D8%AF%20%D9%83%D8%B1%D9%88%D9%85%D8%B1%201.pdf

المؤرخ الدكتور يونان لبيب رزق في كتاب "الأهرام ديوان الحياة المعاصرة" بيوثق فيه الأخبار والتقارير اللي نشرها جرنان الأهرام بداية من صدورها وضمن ده وثق اللي نشره الجرنان عن وقفة عابدين وقال إنها نشرت خبرها تحت عنوان "حادثة مصر"

وبيشرح فيها الدكتور يونان لبيب رزق إن جرنان الأهرام كان متحامل على عرابي وننساشي إن الجرنان وقتها كان شامي مش مصري اللي عملوه شوام وخصصوه لخدمة مصالحهم مع الخديوي والإنجليز وقتها

رابط التحميل

http://www.mediafire.com/file/6yeogqwzxcbt4kk/%D8%A7%D9%84%D8%A7%D9%87%D8%B1%D8%A7%D9%85..%D8%AF%D9%8A%D9%88%D8%A7%D9%86+%D8%A7%D9%84%D8%AD%D9%8A%D8%A7%D9%87+%D8%A7%D9%84%D9%85%D8%B9%D8%A7%D8%B5%D8%B1%D9%87-..%D8%A7%D9%84%D8%AC%D8%B2%D8%A1+%D8%A7%D9%84%D8%A7%D9%88%D9%84.pdf

بعد ما استعرضنا الوثايق اللي فاتت من شهود عيان وشهود العصر على وقفة عابدين نوصل لشهادة بطل الحدث.. وهو عرابي سجل عرابي بالتفصيل أحداث الوقفة و ثورة 1881 ككل طبعا هو أكتر حد علم بيها وخلصها قبل وفاته علطول 1911 وتكلم عن الوقفة تحت عنوان "كيف تجمع الجيش في ساحة عابدين"

وحكى عرابي بالتفصيل الحوار اللي بينه وبين توفيق في الساحة وضمنها كلمته الخالدة "خلقنا الله أحرارا ولم يخلقنا ميراثا ولا عقارا، فوالله لا نورث ولا نستعبد بعد اليوم"، وهي تحمل نفس معنى الكلمة اللي نقلها عنه نينه وسكاون بلنت

 تحميل كتاب مذكرات عرابي الجزء الأول الواردة فيه الصفحات

https://ia902706.us.archive.org/28/items/orabi1/orabi1.pdf

مش دي بس المراجع والوثايق اللي بتشهد على إن وقفة عابدين 1881 حصلت وبالتفاصيل اللي قالها عرابي في مذكراته.

لسة فيه مراجع عشرات ويمكن مئات منها سجلات القنصليات الأجنبية ومراسلاتها مع دولها والصحف المعاصرة كلها لكن لو فضلنا نجيب مش هنخلص وأظن دي أمثلة كفاية

وفي النهاية.. 

عرضنا وثايق سجلها اللي بيحبو عرابي واللي بيكرهوه من المصريين المخلصين ومن الأعادي والمحتلين كلهم ممكن تختلف ف تفاصيل والتقييم، لكن متفقة على إن وقفة عابدين حصلت، وفي 9-9-1881، وإن عرابي دخل ع توفيق بالحصان شاهر سيفه وكلمه وقدمله المطالب وقاله أنا ممثل عن شعبي وبقدم مطالب الأمة، وإنه رفض يسيب ساحة عابدين هو والجيش رغم التهديدات من الإنجليز وتوفيق إلا بعد ما توفيق استجاب لأول مطلب وهو إقالة وزارة رياض، ووعد بإنه هيستجيب لبقية المطالب.

وجبنا بالذات مذكرات ناس قال عليهم إبراهيم عيسى إنهم جابوش سيرة وقفة عابدين زي محمد عبده وعبد الله النديم والتحقيقات، ولقيناهم جابو وأكدة إنها حصلت يبقى إيه مصلحة عيسى يخدع المصرييين ويزور التاريخ رغم إنه بيقدم نفسه لينا على إنه باحث كبير في التاريخ؟

 ليه بقى إبراهيم عيسى واللي زيه عايزين يحطمو فخرنا بأول صيحة حديثة تقول #مصر_للمصريين  #إبراهيم_عيسى_بيزور_تاريخ_ثورة_1881

تصنيف : الباقي من صفاء الهوية المصرية,تاريخنا بعين فلاح,خطايا في كتابة وقراية تاريخ مصر,كتب عن تاريخ الفلاح