الغدر بالمصريين.. مكالمة رئيس اليمن وخالد مشعل تكشف "أكبر مجرم" في حق مصر

 بقلم: إفتكار السيد (نفرتاري أحمس)

 كشفت المكالمة بين رئيس اليمن السابق، علي عبد الله صالح، ورئيس المكتب السياسي في حركة حماس، خالد مشعل، عن شكل من أشكال الغدر اللي عمله مسئولين في مصر بالمصريين في اللي يخص قضية فلسطين والقضايا اللي شبهها.

صورة متاخدة من فيديو قناة "المسيرة" عن المكالمة

وإحنا في أي حاجة بتحصل حوالينا في اللي يخص الشعوب التانية إحنا كمصريين بيهمنا إيه اللي فيها يخصنا، أو يخص أمن بلدنا، وده اللي بندور عليه في المكالمة اللي سربتها مليشيا الحوثيين في قناة "المسيرة" اللي تعبها يوم 15-12-2025.

 في اللي يخص المكالمة بين علي عبد الله صالح وخالد مشعل، لفت نظري حاجة إحنا واخدين بالنا منها من زمان، بس المكالمة، وحاجات تانية هنبقى نعرضها بعدين، كشفتها زيادة لينا، وهي إن المسئولين بتوعنا، عارفين كويس الشر في حكومات وشعوب ومنظمات حوالينا، ومع ده سايبين المصريين يتخدعو بكلام الشعوب والمنظمات دي.

 وسايبين المصريين يدفعو من دم قلبهم وعمرهم، وعمر عيالهم، وفلوسهم وحتى بلدهم، يدفعوه للشعوب والمنظمات دي وهما فاكرين إنهم يستاهلو، مع إن المسئولين بتوعنا دول عارفين كويس إنهم ما يستاهلوش، وده من أكبر أشكال الغدر اللي حصلت بالمصريين من ناس آمنَّاهم على بلدنا ونفسنا.

 ● حماس بتشارك إسرائيل في قتل الفلسطينيين عن قصد

 في المكالمة بين الرئيس اليمني علي عبد الله صالح وخالد مشعل، يوم 28-12-2008، وقت الغارات الإسرائيلية اللي اتسمت عملية "الرصاص المصبوب" وحصلت ما بين ديسمبر 2008 ويناير 2009، كان واضح من كلامهم إن إسرائيل عملتها رد على صواريخ ضربتها حماس على إسرائيل، والصواريخ دي ما ضرتش إسرائيل في حاجة كبيرة، بس خدتها حجة تعمل غارات على غزة، اتقتل فيها 1400 فلسطيني في 23 يوم.

وفي المكالمة، على الأقل اللي اتنشر منها، ما أنكرش مشعل إن هما، يعني حركة حماس، اللي بدأو بعمل المشكلة عن طريق ضرب الصواريخ بتاعتهم على إسرائيل، مع إنه كان في اتفاق تهدئة أو هدنة بينهم قعد 6 شهور، وكان معمول بوساطة مصرية.

نسمع المكالمة. 

وفي كلامهم نرصد كذا حاجة:

صالح وهو بيلوم مشعل، وهو قرفان منه كل القرف، على إنه الصواريخ بتاعتهم دي مش بتجيب ضرر لإسرائيل، وبتضر بس الفلسطينيين، قاله إن الرئيس مبارك ووزير الخارجية (كان وقتها أحمد أبو الغيط) بيحملو حركة حماس المسئولية، وإن الحركة هي اللي لغت التهدئة اللي كانت بينها وبين إسرائيل، وإن وزير الخارجية نقل الكلام ده للرئيس الفلسطيني محمود عباس "أبو مازن".

معنى الكلام ده إن الحكومة أيام مبارك عارفة كويس إن حركة حماس هي اللي بتجيب الأذى للفلسطينيين، وإحنا مالناش ذنب.

طيب، وبعدين صالح بيتهم مشعل واللي معاه إنهم بيضحو بأرواح وبيوت الفلسطينييين، وعن قصد، لأنهم لغو التهدئة من غير سبب مهم، وبيضربو صواريخ على إسرائيل وهما عارفين إنها هتجيب غارات إسرائيلية على غزة، لا ده فوق ده كمان، إن حماس عارفة أنهي أهداف وأماكن هتضربها إسرائيل، ومع ده مش بيبلغو الفلسطينيين قبل الضرب عشان يمشو من الأماكن دي.

 معنى الكلام إن حماس قاصدة إن عدد اللي يتقتل ويتصاب يزيد بين الفلسطينيين، وبعدين تطلع تتاجر بدمهم وبإصاباتهم عشان تلم عطف وتأييد وتبرعات، وتجبر مصر توافق إنها تفتح معبر رفح سداح، و"حماس" هي اللي تتحكم فيه من الجانب الفلسطيني مش السلطة الفلسطينية، وتشتغل بقى عن طريقه تهريب إرهابيين وخلافه.

فبيقول صالح لمشعل بالنص: "إحنا إلى اليوم 285 شهيدا في غارتين من أمس لليوم، الآن ستستمر الغارات، والأهداف مرصودة. حتى اليوم ما وجدت إرشاد في داخل قطاع غزة أن ترشدوا المواطنين العزل أن يتجنبوا الأهداف المختارة من قبل إسرائيل، وأنتم تعرفوا ما هي الأهداف المختارة، جنبوا الشعب الفلسطيني هذه المجازر".

وصالح هنا بيتكلم عن 285 فلسطيني اتقتلو، في حين إن العملية لحد ما خلصت كان وصلو 1400واحد.

معنى كدة إن "حماس" ما سمعتش نصيحة لا مصر ولا اليمن ولا أي حد، وفضلت بعد المكالمة دي مشعللة الدنيا مع إسرائيل في غزة، على أمل تكسب عطف وتأييد وتبرعات أكتر من الشعوب الغفلانة، لحد ما وصلو لـ 1400 واحد اتقتلو.

اللي يهمنا في ده دلوقت إن معنى ده إن الحكومة في مصر كمان هي عارفة إن المليشيات الفلسطينية في غزة، قاصدة إنها ما تنبهش الفلسطينيين قبل ما ينضربو، عشان يزيد عدد الضحايا، تمام زي ما في عملية "طوفان الأقصى" بقت تسيب الناس فوق الأرض، وهي تستخبى في الأنفاق، وأكترية قادتهم الكبار قاعدين في بلاد برة.

وقال موسى أبو مرزوق، رئيس مكتب العلاقات الخارجية في حركة "حماس" رد على سؤال من قناة "روسيا اليوم" في برنامج "نيوزميكر" يوم 27-10-2023، يعني بعد ما قامت عملية "طوفان الأقصى" ب، 20 يوم، عن ليه حركة حماس اهتمت تحفر الأنفاق لكن ما اهتمتوش تعملو ملاجئ للناس، قال إن الأنفاق معمولة لحماية المقاتلين بتوع حماس من طيارات إسرائيل، لكن حماية الفلسطينيين المدنيين اللي برة الأنفاق هي مسئولية الأمم المتحدة وإسرائيل.

 طبعا رد يبين قسوة قلبه على شعبه، لأنه هوعارف كويس من الحروب اللي دخلها قبل كدة إن الأمم المتحدة وإسرائيل مش بيحمو الفلسطينيين وقت الحرب، ومعنى ده إن "حماس" قاصدة تصدر شعبها في وش إسرائيل ويتقتل منه أكبر عدد.

وطبعا ده مكنش في عملية  "الرصاص المصبوب" بس، لا ده متكرر وهو الأساس بالنسبة للمليشيات الفلسطينية في كتير إن مكنش كل المعارك بينهم وبين إسرائيل، إنهم يصدرو شعبهم عن قصد لإسرائيل، علشان يزيد الضحايا.

فوق ده كمان يبالغو في العدد بتاع اللي اتقتلو واللي اتصابو، عشان يلمو تبرعات وعطف أكتر، ويحسسو شعوب العالم، ومنها المصريين، بعقدة الذنب، وإنهم مقصرين في حق الفلسطينيين، وإن حكامهم جُبنا وخونة لقضية فلسطين، وياللا يا مصريين ويا كل شعوب العالم كفرو عن جبن حكامهم بإنكو تعملو ضدهم ثورات أو انقلابات، وتقطعو من اللحم الحي وتبعتو فلوس لغزة والضفة.

مثلا قبل كدة في 5-8-2025 مقالة عنوانها "عن سبب الكدب الفلسطيني.. خلونا ناخد من عرب الزفت قرشين (منقول عن عرفات") نشرنا فيها شهادة السياسي والصحفي الفلسطيني، وعضو المجلس الوطني الفلسطيني (البرلمان وأعلى سلطة في منظمة التحرير الفلسطينية)، فيصل حوراني، واللي عاش وسط معارك المليشيات الفلسطينية في فلسطين وسوريا والأردن ولبنان، وهو بيقول في حوار مع قناة "معا"، إن ياسر عرفات كان بيستقصد يبالغ في عدد اللي اتقتلو من الفلسطينيين في أحداث "أيلول الأسود" سنة 1970 في الأردن عشان تزيد التعويضات والفلوس اللي تجيله من الناس، وإنه لما حوراني مكنش عاجبه المبالغة دي في العدد، قاله عرفات: "مستكتر على عرب الزفت اللي سابونا نندبح بناخد منهم قرشين؟".

وبحسب حوراني: "فهو (يعني عرفات) حسب حساب مطالباته بالتعويضات المالية لأسر الضحايا ووو، أما الرقم الفعلي فهو أدنى من هذا بكثير، ويمكن معرفته بمراجعة أسر الشهداء".

يعني الغش اللي بتعمله حماس مش واقف على المليشيات الدينية، لكن كمان اللي بتتسمى علمانية أو ليبيرالية أو يسارية أو معتدلة.

 ● طب ليه الحكومة خدعتنا؟

 طيب السؤال: أما الحكومة عندنا عارفة المليشيات الفلسطينية مش بتوع مقاومة، ولا حتى بيحبو الفلسطينيين اللي زيهم، وبيضحو بشعبهم نفسه، وإن كل عملياتهم ومعاركهم هدفها إما يحرجو مصر ويعملو عليها حصار، بتكريه الشعوب فيها وتقديمها على إنها هي اللي بتحاصرغزة، يا إما عشان يلمو فلوس وسلاح يستقوو بيه على بعضهم والبلاد اللي حواليهم قبل ما يستقوو على إسرائيل.

مدام الحكومة عندنا عارفة ده من قبل 2011 ومن بعد 2011، ليه خدعونا ومش بينبهونا لده؟

ليه بيطلبو مننا نقطع من اللحم الحي ونبعت فلوسنا وتعبنا للفلسطينيين، وإنه نربي عيالنا على إن قضيتهم فلسطين قبل مصر، وإنه نسكت على تسليم مصر نفسها للفلسيطنيين لما بيتسابو يدخلوها لاجئين، وفي مننا اللي بيجوز عياله من فلسطينيين بحجة إنه كدة بيساعدهم، أو كمان إنه بيتشرف إنه يتجوز من الناس الحلوة بتاعة المقاومة والنضال دول؟

وليه بتدي ناس كتير من الفلسطينيين الجنسية المصرية كأنها بتساعد إسرائيل وبتساعد مليشيات فلسطين إنهم يفضو البلد من أهلها؟

بعد عملية "الرصاص المصبوب" دي اللي اتعملت في ديسمبر 2008- يناير 2009، حصلت كذا حرب بين مليشيات فلسطينية وإسرائيل (في 2012، و2014 و2019 و2021 و2022) لحد ما وصلنا إلى البلوة الكبيرة وهي عملية "طوفان الأقصى" في 2023 اللي بدأتها حماس، وهي عارفة كويس إنها هتجيب رد فعل بشعة من إسرائيل، وهتقلب بأكبر حرب بينهم، لأنه حصل فيها لإسرائيل أكبر خساير في الأرواح في حروبها مع الفلسطينيين، وفضلت حماس، زيها زي إسرائيل، تعطل جهود الوساطة اللي عملتها مصر وغيرها من بلاد، لحد ما وصل اللي اتقتلو لعشرات الآلاف.

طب الحكومة في مصر عملت إيه وقت "طوفان الأقصى"؟

حسب متابعتي، واللي فيكو تابع أكتر مني برضو يقول شهادته هنا أو للي حواليه، فالحكومة سابت، أو خلت، الإعلام في مصر:

1- يشتغل مناحة على الفلسطينيين واللي بيحصلهم، وينقل أبشع صور وفيديوهات للمصريين عشان يوجع قلبهم، بما فيها فيديوهات وصور فيها مبالغات، وسهل لو اتحللت يطلع إنها مصنوعة صنع، أو مقصود يبقى فيها مبالغات.

2- ما جبتش اللوم على مليشيات غزة، بما فيها حركة حماس في أكترية الوقت بتاع الحرب اللي اشتغلت من أكتوبر 2023- أكتوبر 2025، يعني سنتين، وكان اللوم بس على إسرائيل، وما بدأتش تجيب ناس تنتقد حماس، إلا في الشهور الآخرانية من الحرب، وده بعد إصرار حماس على إن الحرب تطول أكتر ما طالت، وإنها تفضل تحكم غزة، وبقت ترمي المسئولية على مصر وتتهمها بتجويع غزة.

3- المفاجئة الكبيرة كمان إنها سابت محلليين سياسيين وضيوف في قنوات الإعلام، زي قناة "القاهرة الإخبارية" توصف حركة حماس بإنها مقاومة شريفة، وإن اللي بتعمله ده بطولات، ولازم مصر تساعد حماس تفضل في غزة، وبتلمع فيها، وتحاول تقدمها للمصريين على إنها قدوة، ونادر ما طلع في الإعلام ناس تلوم حماس زي ما بتلوم إسرائيل، وده بعد إيه؟

ده بعد كل اللي شفناه من حركة حماس من سنة 2013، بعد ما وقفت مع عصابة حركة الإخوان ضدنا، واشتركت، بشهادة وزارة الداخلية والقضاء، في قتل كتير من المصريين في عمليات إرهابية.

 

مصدر الخبر

 لا ده فوق ده في حاجة أوحش في المكالمة بين رئيس اليمن ومشعل.. إيه هي؟

إن مشعل، وبكل برود، لما صالح بيقوله إن الصواريخ بتاعتكو ما بتأذيش الإسرائيليين لكن بتأذي الفلسطينيين، جاب مشعل اللوم على مصر، وساواها بإسرائيل، لما اتهمها إنها بتشارك في عمل حصار على قطاع غزة؛ لأنها مش عايزة معبر رفح يتساب مفتوح سداح مداح للفلسطينيين، يدخلو مصر براحتهم، ويبعتو الإرهابيين بتوعهم لمصر براحتهم.

ومع إن معبر رفح كان بيتفتح من وقت للتاني، بس مليشيا حماس كانت عايزاه مفتوح سداح، رغم إن حماس هي اللي طردت منظمة التحرير الفلسطينينة والأوروبيين اللي كان بيديرو المعبر من ناحية غزة، ومصر مرضيتش تديها شرعية ولا تقبل إنها هي اللي تدير المعبر

وده مع إن لحد وقتها كانت الحكومة، ودي الجريمة الحقيقية اللي عملتها الحكومة وقتها، كانت سايبة أنفاق بين مصر وبين غزة، يروح وييجي فيها الفلسطينيين والبضايع والحاجات اللي متهربة.

يعني حماس مش مكفيها الأنفاق، كمان عايزة معبر رفح يبقى مفتوح سداح، وكأن مصر لا ليها ظابط ولا رابط ولا أصحاب، يا إما تهدد إنها تقتحمه زي ما عملت فعلا واقتحمته في 2008، وقلت ظابط مصري.

ففي المكالمة، يتهرب مشعل من مسئوليته عن دم الفلسطينيين ويقول:

يعني هل أنت تقبل يا فخامة الرئيس أنه أهل غزة من سنة ونصف، احنا عملنا تهدئة في شهر يونيو الماضي، وطلبنا من المصريين كوسيط.

ويقول في مكان تاني: أنا بس أقول لك حاجة فخامة الرئيس هل الأخوة في مصر عرضو علينا أن تستمر التهدئة وأن فتح المعابر بما فيها معبر رفح؟ للأسف الأخوة في مصر..

يقاطعه يعني إنتو ما بتفهمو الرسائل؟

مشعل: يا فخامة الرئيس أنا فاهم عليك بس أنا أقولك القضية، يعني إسرائيل يا فخامة الرئيس، ومصر تعلم هذا، يريدون استمرار التهدئة مع استمرار الحصار، من يقبل هذا يا فخامة الرئيس؟

يعني هو هنا بكل بجاحة، عايز القمة اللي هتتعمل، تضغط على مصر عشان تسيبلهم الحدود بتاعة مصر سداح، وإنه يتهموها إن هي بتحاصر غزة، تمام نفس الفيلم اللي عملوه في عملية "طوفان الأقصى" وهما بيتهمو مصر إنها بتحاصرهم، مع إنها أكتر دولة كانت بتقدملهم مساعدات، والحكومة عملت جريمة إنها سمحت لحوالي من 300-500 ألف فلسطيني يدخلو مصر تحت اسم علاج، ومنح دراسة، وحالات إنسانية، ومرافقين، إلخ.

طيب نيجي هنا لحاجة تكمل اللي فوق، وهو إيه شكل الحصار اللي كانت عليه غزة وبيتكلم عليه مشعل؟

أنا معنديش فيديوهات لشكل العيشة في غزة سنة 2008، لكن عندي فيديوهات نشرها الفلسطينيين نفسهم لإزاي كان حال غزة قبل عملية "طوفان الأقصى" بتاعة سنة 2023، وإزاي كان النغنغة فيها حتى في الرفاهيات.

وهنشوف إيه شكل الحصار اللي كان حركة حماس وأكتر الفلسطينيين بيأوأو ويقولو إحنا مخنوقين وعايشين في حصار حصار، ومصر عاملة علينا حصار حصار، تعالو نشوف فيديو منهم.

● ليه الحكومة خبت علينا نغنغة العيشة في غزة؟

 طيب هما المسئولين في مصر مكنوش قبل عملية "طوفان الأقصى" يعرفو إن الفلسطينيين في غزة عايشين عيشة مستوى بلاد أوروبا وسويسرا وحتى دول الخليج؟

مكنوش عارفين إنهم لا عندهم مشاكل في أكل ولا شرب ولا تعليم ولا شغل ولا علاج ولا حتى ترفيه ولا استهلاك أشهر الماركات؟

مكنوش عارفين إن حياتهم متكبسة فلوس من كتر التبرعات والمساعدات والتسهيلات؟

لا أكيد عارفين، مصر ليها وجود في غزة سوا من المصريين اللي هناك، أو المخابرات، أو الدبلوماسيين، أو الناس اللي بتدخلهم البضايع من المعبر، اللي هو بيتفتح أوقات كتير أصلا، وفي غيره معابر بتبقى مفتوحة.

طيب ليه مكنوش بينقلو شكل الحياة دي لينا في الإعلام في مصر؟

ليه مكنوش بينقلو، ولحد دلوقت مش بينقلو، من غزة وفلسطين عموما، إلا مشاهد وصور أكترها فيها فلسطينيين بيشكو وبيعانو وبيبكو، وبيتقدمو على إنهم فقرا مش لاقيين أكل ولا لبس ولا تعليم ولا علاج ولا ولا؟

كان كل اللي بتعمله الحكومة بس إنها ما بتضعفش قصاد الضغوط والابتزاز اللي بتعمله مليشيات فلسطين عشان تدخل حرب مع إسرائيل باسم نصرة غزة، أو إنها تلغي اتفاقية السلام، وده كويس منها، بس سابتنا يفترسنا وينهش فينا إعلام حماس واللي زيها، يغشونا سوا وقت الحروب أو الوقت اللي مفيهوش الحروب، بإن أهل فلسطين مش لاقيين أكل ولا شرب ولا سكن، وإنتو يا مصريين مسئولين عنهم، ومقصرين معاهم، وطلعو كل اللي تملكوه عشان خاطرهم، وده هو طريقكو للجنة.

الظريف إيه كمان؟

إن علي عبد الله صالح نفسه عمل في شعبه في اليمن نفس الجريمة، فبعد المكالمة دي بسنتين، يعني في 2010 اتعملت قمة عربية في ليبيا، وقال فيها صالح إنه "الحل في فوهات البندقية، تصعيد المقاومة بكل ما أوتيتم من قوة". (في الفيديو اللي في الرابط بعد الدقيقة 2).

فإزاي عارف إن اللي بتسميها المقاومة المسلحة دي مش بيهمها الفلسطينيين أصلا، وإنت بتوهم شعوب المنطقة إنها مقاومة محترمة، وتطلب منهم يسلحوها ويتبرعو ليها ويحاربو عشانها؟

 ● أكبر إجرام

الخلاصة، المجرم في حق المصريين مش بس الفلسطينيين اللي تاجرو بقضيتهم عشان يشفطو أرواحنا ودمنا وفلوسنا ليهم باسم تبرعات ونصرة المقاومة، وعشان يحسسونا بإننا قليلين قصادهم ومسئولين عنهم، لكن المجرم الأكتر في حقنا، هو كل مسئول وأي حد في مصر، كان يعرف الحقايق دي، وهي:

1- مليشيات فلسطين كلها بتاجر بقضية فلسطين وتتسبب قاصدة في قتل فلسطينيين عشان تبتز بيهم المصريين وغيرهم، وهي مليشيات إجرام ونهب ومرتزقة مش حركات مقاومة حقيقية.

2- الفلسطينيين، سوا في الضفة أو غزة، عايشين أحسن من أكترية المصريين ألف مرة من ناحية التسهيلات والتبرعات والمساعدات اللي بياخدوها من الأول ما العيل يكون بطن أمه لحد ما يتعلم ويتجوز ويشتغل وياخد منح دراسة في أكبر الجامعات.

3- الفلسطينيين، كتير منهم إن مكنش أكترهم، قاصدين يحملو مصر المسئولية عن قضيتهم، ويقدموها قصاد العالم مقصرة، أو حتى إنها مجرمة في حقهم زيها زي إسرائيل، وإن المصريين "خانوهم"، رغم إن الفلسطينيين عارفين كويس إنهم عايشين عيشة سهلة مش لاقيها كتير من المصريين.

الحكومة عارفة ده كله، ولسة قاعدة تشترك مع مليشيات فلسطين في إنها تقلل مننا، وتعيشنا في عقدة الذنب، وتعصر أرواحنا ودمنا لمصلحة الفلسطيني والسوري واليمني والسوداني والأثيوبي والنيجيري واللبناني وكل الأجناس، اللي دلوقت شغالة تسلمهم مصر تحت اسم إن ده واجب مصر ناحية اللاجئين والأشقاء، ومسئولية المصريين الإنسانية ناحية العالم.

لا وفوق ده، حتى بعد ما وقفت حرب "طوفان الأقصى"، بدل ما الحكومة تقول خلاص لازم نرتب أوراقنا وننتبه لبلدنا إيه عملته؟

وقعت في اتفاقية شرم الشيخ للسلام على إنه يتسمح بحركة الفلسطينيين بين مصر وغزة، دخول وطلوع، من غير سقف في العدد، زي ما جبنا البنود دي في مقالة "الملحق السري لاتفاق وقف حرب غزة..دخول الفلسطينيين لمصر من غير حدود".

والرئيس السيسي طلع بكل برود ضمير، يطب مننا إننا نتبرع لإعادة إعمار غزة، يعني طول الحرب كان يطلبو مننا نمول آلاف الشاحنات باسم نأكل ونشرب ونعالج بتوع عزة، بعد الحرب لا كمان نمول بُنا بيوتهم ومحلاتهم وشوارعهم، في وقت الحكومة عارفة إن كتير من المصريين لا قادرين يجيبو شقة ولا محل ولا يعملو عيالهم.

رابط المصدر

أي حكومة في مصر تحكمنا بعقيدة "مصر للجميع" مش "مصر للمصريين" هي أكبر مجرم في حق المصريين وأكبر غدار بيهم على طول التاريخ.

 لأن شرعية أي مسئول، أو أي مواطن عموما في مصر هي إنه حياته تكون في خدمة إن "مصر للمصريين، والمصريين الحقيقيين، مش المصريين بورقة الجنسية، لكن عقولهم وقلوبهم تبع تنظيمات وبلاد أجنبية".

وفوتكو بعافية

القاهرة 18-12-2025، الموافق 9 كيهاك في التقويم المصري

إفتكار السيد (نفرتاري أحمس)

----------------  

مواضيع ليها صلة:

الملحق السري لاتفاق وقف حرب غزة.. دخول الفلسطينيين لمصر من غير حدود

عن سبب الكدب الفلسطيني.. "خلونا ناخد من عرب الزفت قرشين" (منقول عن عرفات)

تصنيف : أخبار الهكسوس,أعداء الهوية المصرية,هكسوس العصر