دي تجميعة لتويتات كتبتها على تويتر عن #ملحمة_كبريت (أروع ملاحم
الصمود ف الحصار)
متاخدة من فيلم الشئون المعنوية عن
الشهيد ابراهيم عبد التواب ومقالة للغيطاني
#ملحمة_كبريت بتحكي صمود ولادنا
4 شهور قصاد حصار نقطة حصينة ببارليف واستشهد عشرات لاجل ما يسلموهاش للعدو، وع راسهم
قائدهم ابراهيم عبد التواب
في ناس فاكرة ان حرب اكتوبر خلصت
ف نفس الشهر..لكن الصح ان أعمال القتال استمرت ليناير1974 فيما صمود ولادنا ف #ملحمة_كبريت
استمر لحد فبراير
وكان المقدم إبراهيم عبد التواب قائد
الكتيبة 603 اللي صمدت ف #ملحمة_كبريت 4 شهور آخر شهداء حرب اكتوبر واستشهد14يناير74
و #ملحمة_كبريت ف التاريخ تتصنف من
أعظم ملاحم مواجهة الحصار لأن 400 مقاتل ف مساحة كم واحد قامو نقص المدد 4 شهور ما
استستلمش منهم واحد
وف نفس الوقت كان سلاحهم قليل مقارنة
بالعدو اللي كان دايم الهجوم عليهم بالطيارات والدبابات
نقطة كبريت من أقوى النقاط الحصينة
ف خط بارليف وتقع ف الفاصل بين الجيش التاني والتالت وع البحيرات المرة
فقررت مصر سرعة التوجه ليها بعد بدء
العبور لمنع العدو من استغلالها ف قطع الإمداد والانتقال بين الضفتين
و في 8 اكتوبر تم للكتيبة 603 بقيادة
الشهيدين ابراهيم عبد التواب و محمد أمين مقلد السيطرة ع النقطة فيما بدأ العدو هجماته
لاسترجعها
18اكتوبر حاول العدو اعادة احتلال
نقطة كبريت بهجمات مدفعية وطيران لكن فشل واستشعرت قيادة الجيش التالت إنه هيضرب عليها
الحصار
22اكتوبر عاد العدو للهجوم لأن كان
مطلوب احتلالها قبل وقف اطلاق النار ونجحت قواتنا ف صد دباباته ب5أربجيه
وفي الهجوم ده اتصاب المقدم محمد علي
مقلد في راسه وطلبو منه يرجع للخطوط الخلفية، لكنه عصب راسه، ورفض يسيب بقية القوات
٢٣ أكتوبر رجع العدو يقصف جوي مكثف
من الساعة9ص لحد آخر ضوء بمعدل 4 طيارات ف كل طلعة بفاصل زمني خمس دقايق
وبالليل استشهد المقدم محمد أمين مقلد وتولي ابراهيم
عبد التواب القيادة وبدأ ف التوقيت ده الحصار الطويل وقطع المدد عن قواتنا
واتقطع اللاسلكي واتدمر جزء كبير
من معدات الاشارة واستشهد الرائد نور عبد النبي المسئول عن مواصلات الموقع السلكية
واللاسلكية
وفقدت قواتنا الاتصال مع قيادة الجيش
التالت الموجودة ع الضفة الغربية، وبقت نقطة كبريت معزولة تماما عن بقية الجيش..وبلا
مدد
استغل الشهيد ابراهيم عبد التواب
كل ثانية لتدعيم دفاعات الموقع بحفر خنادق وتنظيم الدفاعات وتوزيع الرجالة وتقسيمهم
في مجموعات
وقال أبطال من #ملحمة_كبريت لسة أحياء
إنهم أكلو أي حاجة ممكن تتاكل ف الصحرا وشربو مية الراداتير وحتى مية البحيرات المالحة
وف وسط المعاناة من نقص المية خطر
لهم عمل أول مكنة تقطير للمية تتعمل ف حرب بحلة ميدانية وبواقي مواسير
قادو الخشب تحت الحلة وبقت البخار
يطلع ف ماسورة لفوها بخيش عشان تكثيف المية وبقت تنزل المية ف تانك
وما تتصوروش فرحة الشهيد بنجاح
مكنة التحلية قد إيه.. وقال "هنصمد ومش هنسيب ولا رملة" (شهادة واحد من
زمايله)
وحلو مشكلة الاستحمام بإن كل جمعة
الرجالة تنزل البحيرات يدعكو جسمهم بملح القاع
ويغسلو هدومهم وكل واحد له نص زمزمية لشيل الملح
كان عبد التواب رغم الحصار مهتم بنضافة
المقاتلين وحسن مظهرهم ويغضب لو شاف حد فيهم هدومه وسخة لأن ده هيأثر ع الروح المعنوية
بعد اشتداد الحصار وقطع المدد قرر
عبد التواب دفع دوريات ليلية من كبريت إلى الجيش التالت اتسمت دوريات الموت لخطورة
المغامرة
كانت الدوريات بتاخد طريق بري ضيق
يعرفش العدو تشيل نقالات فوقها الجرحي لاخلائهم الي الجيش الثالث، وترجع بالادوية والأكل
والميه
وأول ما دوريات الموت جت بالتعيين
بقت القوات تتقاسم كل 8 أشخاص باكو بسكوت وكل 4 أشخاص علبة فول وربع لتر مية
اكتشف العدو الطريق البري الضيق للدوريات
فقرر الشهيد دفع دوريات ع الطريق البحري تعبر قناة السويس
كان لازم المخاطرة لجلب المدد
وكانت الدوريات بتعمل كماين ف المية
لحماية قوارب التعيين اللي جاية م الجيش التالت،والمقاتلين يقعدو ف مية الشتوية ساعات
يستنوها
و ف نفس الوقت كانت مدفعية الجيش
الثالث تتأهب كلها للاشتباك مع العدو في حالة اكتشافه قوارب الامدادات في القناة
واستمر الاشتباك يوميا صبح وليل لحد14يناير1974وكانت
قواتنا تستخدم أسلحة سابتها إسرائيل ف الموقع
لضرب قواتها اللي بتحاصرهم
ومع تكرار فشل العدو ف الاستيلاء
ع كبريت اضطر يعرض ع قواتنا إخلاء الموقع بدون أسلحة لكن عبد التواب وقيادة القوات
المصرية رفضت
فعرض العدو إن قواتنا تسلم الموقع
مع خروج الرجالة المحاصرين بكامل اسلحتهم وتسهيل انتقالهم الي الجيش الثالث وبرضو عرضه
اترفض
17نوفمبر قالت الأمم المتحدة إن طيارة
اسرائيلية معاها الصليب الأحمر رايحة النقطة تخلي جرحانا لكن عبد التواب قال لو جت
هنضربها
وفضل الجرحى إنهم يفضلو مع زمايلهم
ف كبريت ويتعالجو بأي إمكانيات بسيطة لأن طيران العدو كان دمر النقطة الطبية بالكامل
وكان الطبيب الوحيد ف الموقع د.محمد
عبد الجواد اللي هو نفسه اتصاب ف راسه وعالج نفسه بمساعدة جندي
كان الشهيد عبد التواب شايف إن شرف
مصر يتعلق بالبقعة من الأرض التي بيترفع عليها العلم المصري في قلب محيط من قوات العدو
ومرة تمكن الجيش الثالث من دفع قارب
مطاط شايل نص طن من المؤن، فقرر عبد التواب عمل "ترفيه" للقوات لمدة يوم
ياخدو فيه اكل زيادة
يوم "الترفيه" يعني توزيع
نص علبة فول ونص علبة خضار ونص علبة مربى ع المقاتل،والأيام اللي بعده بقت نفس الكمية
يستهلكها ف4 أيام
كانت كميات الأكل تتوزع بالتساوي
على الظباط والجنود وكانو ساعات يخلطو الأكل بالمية علشان ينفش فيدي إحساس بالشبع
أحيانا كان الشهيد عبد التواب لو
لاحظ إن في جندي ظهر عليه التعب قوي من قلة الأكل يديه حصته هو من التعيين..فكان أقلهم
ف الأكل
كان عبد التواب صارم ف اللي يخص الأكل
علشان تفضل كمية احتياط تنفع وقت يتقطع المدد
وحصل مرة إن الرجالة عاشو على المية
بس يومين
ومرة جالهم ف التعيين برتقان فكل
4 ليهم واحدة،فراح جندي ينطط البرتقان ف الهوا عشان يوحي للعدو اللي بيراقب ان في أكل
كتير معاهم
كان الشهيد عبد التواب بيأم القوات
ف الجمعة والمسيحيين يقومو بالخدمات والحراسات، ويوم الأحد ياخدو وقتهم لعمل الطقوس
المسيحية
وكان الشهيد القائد يقرا القرآن ويشرحه
للرجالة ويطلب من المسيحيين يقرو الإنجيل، وخصص حتة كمسجد وحتة ككنيسة عشان الكل يتوجه
لله
واستمر القتال لحد 14 يناير1974 وفيه
تعرضت قواتنا لقصف مركز وسقطت دانة جنب إبرايهم عبد التواب اخترقت شظية منه ضهره
بعد القصف اتملى الموقع الصامد بلحظات
هدوء وكأن الدنيا سكتت لحظة استشهاد عبد التواب وما خرجش دم من مكان الشظية (وصف زمايله)
اندفن الشهيد ف الموقع مع عشرات من زمايله اللي سبقوه وأصر اللي فضل أحياء
ع إنه يرجعوش خطوة خطوها لقدام زي ما كان الشهيد بيقول
بعد استشهاد البطل بعتت القيادة العامة
للقوات المسلحة برقية دعم لقواتنا ف النقطة المحاصرة قالت فيها:
واستلم القيادة الرائد سعد الدسوقي
واستمر الموقع ف رفض التسليم مع ندرة المية والتعيين ومن ناحية تانية بدأت محادثات
الكيلو101
محادثات الكيلو 101 كانت خاصة بمحادثات
فض الاشتباك ف حرب 73 وكان من نتايجها وقف الحصار الاسرائيلي لكبريت
وف20 يناير1974 وصل الإمدادات الطبيعية
للموقع لأول مرة من 4 شهور وف27 يناير تم الموافقة على سحب العدو لقواته من حوالين
كبريت
وف13 فبراير1974سلم الأبطال الموقع
للجيش التالت معزز شامخ يرفرف عليه علم مصروتباركه روح الشهيد وزمايله
ورجع الأبطال معسكراتهم ف إسكندرية
اللي استقبلهم أهلها بترحيب علق عليه بطل منهم بإنه "حسينا إننا قدمنا حاجة للعسكرية
المصرية"
ودي صور أرشيفية للاستقبال والفرح الرسمي
والشعبي اللي استقبلت بيه إسكندرية مسئولين وطلاب وعمال إلخ أبطال
وبقى موقع كبريت وللأبد ف التاريخ
العسكري رمز للشرف والصمود، وإن روح الجندي المصري أقوى من كل الظروف
وهتفضل #ملحمة_كبريت وغيرها من ملاحم
ف الاستنزاف وأكتوبر وحروبنا زمان ودلوقت دليل ع إن جنودنا خير جنود الأرض..قالها حديث
شريف أو مقالهاش
دي للي فاكر إنه هيطعن ف جنودنا وهو
بيشكك ف الحديث النبوي بتاع "خير أجناد الأرض"
فهو بالنسبة لبطولات ولادنا إن كان صحيح فبركة
وإن مكنش..فالتاريخ شاهد على خيريتهم
و#ملحمة_كبريت
وغيرها آلاف ف حرب الاستنزاف وأكتوبر
وقبلهم وبعدهم ودلوقت
لو درسناهم مش هنحتاج نقول للناس
اصبرو ع الظروف
صور لأبطال أحياء من أبطال #ملحمة_كبريت
الخالدة بإذن الله
الأسامي ع كل صورة
ربنا يديكو الصحة..
وهيفضل أجدادنا العظما.. في الفكر والقلب وتاج الراس ليوم الدين
تحيا مصر
------------------------------
الروابط
فيلم الشهيد ابراهيم عبد التواب
(انتاج الشئون المعنوية بالقوات المسلحة)
مقالة وشهادة الراحل العظيم جمال
الغيطاني (مراسل عسكري وقت الحرب) عن الملحمة وعن العظيم ابراهيم عبد التواب
http://group73historians.com/%D8%AD%D8%B1%D8%A8-%D8%A3%D9%83%D8%AA%D9%88%D8%A8%D8%B1/781-%D9%82%D8%A7%D8%A6%D8%AF-%D9%85%D9%84%D8%AD%D9%85%D8%A9-%D9%83%D8%A8%D8%B1%D9%8A%D8%AA-%D8%A7%D9%84%D8%A3%D8%B3%D8%B7%D9%88%D8%B1%D9%8A%D8%A9.html
بقلم
إفتكار البنداري السيد (نفرتاري أحمس)
