حملة سعودية- إخوانية لسرقة رموز المجد الحربي المصري

 بقلم إفتكار السيد (نفرتاري أحمس)

 ضمن حملات مسح كل ميزة مشهورة عن مصر، الحكاية مش واقفة عند سرقة حضارتها القديمة، لكن كمان كل إنجازاتها في العصر ده، بما فيها اللي بسميه "رموز المجد المصري" اللي تخص الحروب والانتصارات المصرية، وأشهر اللي بيسوقو الحملة دي السعودية وجماعة الإخوان المسلمين.

والحلقة دي هنركز على اللي بتعمله الحملة دي في نسب مصطلحات وصفات مربوطة بالانتصارات والحروب المصرية، ونسبها للسعودية أو حماس إلخ.

واللي خلانا  ننزل الموضوع ده دلوقت، بعد ما كنت بنزل منه حاجات متفرقة على "تويتر"، هو إن الظاهرة دي لمحة أو أداة للحملة اللي معمولة دلوقت من سعوديين وجماعة الإخوان المسلمين ضد مصر إنها ضعيفة، وإن السعودية وحركة حماس هما اللي بيحمو مصر والمنطقة كلها.

وده ممكن ياخدوه مبرر إن السعودية تتوسع في المنطقة، وتعمل ضربات هنا أو هناك، وتهدد  الأمن القومي المصري، بحجة إن هي اللي بتحمي الأمن القومي العربي، ومصر ضعيفة ومكانها تكون تابعة لمشاريعهم وخططهم.

الأول نبدأ باللي عملته حركة حماس وجماعة الإخوان؟

● حماس والإخوان وسرقة رموز نصر أكتوبر 1973

قبل عملية طوفان الأقصى اللي عملتها حركة حماس ضد إسرائيل سنة 2023 بيومين، يعني العملية كانت يوم 7 أكتوبر، فيوم 5 أكتوبر، قناة "الحوار" الفلسطينية الإخوانية عملت إيه؟ وصفت نصر أكتوبر 1973 بإنه هزيمة شنيعة.

وأنا بتفرج وقتها على القناة لما صادفني برنامجها ده على "يوتيوب"، قاعدة أقول، يعني حركة حماس دي اللي أكتر معاركها مع إسرائيل انتهت بخسارة، بس بتوصفها دايما بإنها الانتصار العظيم، أول ما تتكلمو عن النصر المصري في أكتوبر اللي حرر الأرض تقولو "هزيمة شنيعة"؟!

بس عرفت إن نصر أكتوبر متحضرله بلاوي أكتر من كدة بعدها بيومين.

 فيوم 7 حصلت عملية طوفان الأقصى، وبدأت المليشيات بتاعة غزة، والناس اللي تبعها، في نفس اليوم، يسرقو التعبيرات الخاصة بحرب أكتوبر، وينسبوها لنفسهم وللعملية بتاعتهم، فالحكاية مكنتش صدفة، لكن متخطط ليها من الأول.

♦ فمثلا أخدو كلمة السادات المشهورة بتاعة "أفقدنا العدو توازنه في 6 ساعات"، وكمان بيكايدو بإنهم يخلوها "في دقائق قليلة"، ودي قالها إسماعيل هنية بتاع حركة حماس في كلمة في نفس يوم العملية، قال: أفقدنا العدو توازنه في دقائق معدودة" (الهايبر بالأزرق في المقالة فيه مصادر التصريحات)

عايز يقول يعني إن اللي بيعتبروه انتصارهم غلب الانتصار المصري، مع إنه بالتأكيد العملية بتاعتهم دي مخدتش دقايق، دي أخدت ساعات في التسلل والخطف ونقل المخطوفين الإسرائيليين إلخ.

 ♦ أخدو كلمة "العبور" من مصر، فهنية استخدم كلمة "العبور" برضو في نفس الكلمة اللي فاتت وهو بيوصف عملية طوفان الأقصى، كمان حركة "الجهاد الإسلامي"، قالت بسرعة، في نفس يوم العملية، إنه كل الفصائل تمر إلى مرحلة "العبور الكبير" نحو الأقصى.

♦ وبسرعة برضو، طلع الإخواني معتز مطرعلى قناته، وفي نفس اليوم، وقبل ما يبان نتيجة العملية بتاعتهم قالو عليها انتصار 7 أكتوبر، وكأن المقصود هو إنه يبقى في ذاكرة الناس كلمة 7 أكتوبر الحمساوية الإخوانية الفلسطينية، وتتمحي كلمة انتصار 6 أكتوبر المصرية.

♦ طبعا مش بعيد إن اختيار شهر أكتوبر نفسه كان مقصود تتم فيه العملية، فتحل كلمة نصر أكتوبر اللي تبعهم بدل نصر أكتوبر المصري.

 

♦ تقديم مليشيات حماس بديل عن الجيش المصري

طيب.. بعد ما عدى سنتين على الحرب، وكان نتيجتها إن إسرائيل رجعت احتلت غزة تاني (يعني عكس اللي حصل للنصر المصري اللي اتسبب في طلوع إسرائيل من سينا)، وإنه ساب غزة مئات الآلاف من سكانها لإسرائيل تبرطع فيها، منهم أكتر من 300 ألف جم على مصر، واتقتل معظم قادة حماس، وإنه ما حصلش عبور للأقصى ولا حاجة، بعد ده كله سكتو، وندمو على اللي حصل، ولا عملو إيه؟

♦ زي ما إحنا عارفين، فضلو معتبرين اللي عملوه انتصار، وفوق ده، بقو عايزين يطمسو حقيقة إن مصر حررت أرضها من إسرائيل، وبقو ينشرو إن حماس والمليشيات اللي زيها هما بس اللي بيعرفو يحررو الأرض من إسرائيل، واخترعو كدبة إنه حماس هي اللي بتحرر الأرض المصرية اللي مصر "مش قادرة" تحررها.

فقالو إن محور صلاح الدين "فلادلفيا" مصر معرفتش تطلع إسرائيل منه، وإن حركة حماس هي اللي هتحرره لمصر!، مع إنه معلوم إن المحور ده مش مصري، وإنه جوة الأراضي الفلسطينية، واللي جاب إسرائيل ليه أصلا هي حركة حماس بعمليتها الفاشلة بتاعة طوفان الأقصى، وإنها رفضت توقف الحرب لحد ما إسرائيل وصلت للمحور قرب معبر رفح.

فنلاقي بكل بجاحة ناس زي جمال سلطان الإخواني، وهو صحفي مشهور، يقول: إن رجال حماس رغم كل التجويع اللي عملاه ليهم إسرائيل لكن هما اللي "بيحررو" الأرض المصرية، أو محور فلادلفيا، من الاحتلال.

والمذيع معتز مصر يقول مبروك "غزة العزة تحرر أراضي مصرية"، وعمر عبد العزيز الزهراني، وده معارض سعودي مشهور، واخد صف حركة حماس، برضو بيقول "شكرا حماس حررتي أرض مصرية"، وناس تانية وراهم تقول مبروك يا مصريين حماس "حررتلنا" محور فلادلفيا.

ونلاحظ زي ما شايفين على التويتات إن كل ده كان يوم 15-6-2025، يعني في نفس اليوم، يعني الكلمة متوزعة عن قصد، وبينشر الكدبة دي صحفيين كبار، عارفين كويس إن محور فلادلفيا جوة غزة، وأي حد يعمل بحث على النت هيعرف ده بالساهل.

♦ ده طبعا غير الحملة اللي إحنا عارفينها إن حماس وأمها جماعة الإخوان كانت بتحمل مصر مسئولية اللي سموه "تجويع غزة"، أكتر ما حملو المسئولية لإسرائيل، عشان يقدمونا إننا إحنا وإسرائيل خطر واحد على المنطقة.

 ♦ وكملو برضو في سرقة المجد المصري بتاع نصر 6 أكتوبر ورموزه، بإنه، حتى اللي فيهم لسة بيتكلم كويس عن انتصار مصر في 6 أكتوبر، بيحطوه في مركز واحد مع عملية طوفان الأقصى.

فمثلا بعد ما تقريبا خلصت حرب غزة، بقو يقول إن حماس عملت "انتصار" زي انتصار مصر في 1973، وبقو ينشرو صورة من حرب أكتوبر لجندي مصري بيأسر إسرائيلي، ومعاها صورة لفلسطيني من عملية طوفان الأقصى لفلسطيني بيأسر إسرائيلي، سوا كانت صورة حقيقية ولا مش حقيقية، ويساووهم ببعض.

زي ما عمل الإخواني محمد صغير وغيره، ونلاحظ إنهم حتى مختارين الشبه في الصور عشان يدو فكرة إن حماس زيها زي الجيش المصري.

رابط التويتة

♦ ونفتكر هنا برضو إن ضمن السرقات دي، إنه حركة "بي دي إس" BDS اللي اسمها حركة مقاطعة إسرائيل، وهي حركة عملها رامي شعث، اللي لو فاكرين عملنا مقالة عنوانها "إزاي استغلت عيلة نبيل شعث الجنسية المصرية في حرق مصر" إنه فلسطيني هو وأبوه وزير الخارجية الفلسطيني، نبيل شعث، أخدو الجنسية المصرية، ورامي ده شغلته يعمل حملات ضد مصر أكتر ما هي حملات ضد إسرائيل.

والحركة بتاعته دي أخدت صورة من أشهر صور نصر أكتوبر، وهي صورة الجندي المصري البطل عبد الرحمن أحمد عبداللاه القاضي، وهو رافع إيده وبندقيته من الفرحة بعد العبور في حرب أكتوبر، وأخدوها لزقو وراها علم فلسطين بدل من علم مصر، وعملوها شعار لحملة من حملاتهم، وكأن الجيش المصري وظيفته يسخر نفسه لفلسطين مش لمصر.

رابط التويتة من حساب الحركة

 

● الحملة السعودية لسرقة المجد المصري

طيب نيجي للي يخص السعودية.

اللي متابع أخبار السعودية ونشاط السعوديين على الإنترنت، هيلاحظ إنه من بعد ما اتولى محمد بن سلمان تقريبا حكم بلده سنة 2017، بقى في حملة واسعة، أنا بسميها حملة "غسيل السمعة"، شدو حيلهم فيها أكتر من بعد سنة 2020، عشان تقدم السعودية في صورة مختلفة عن المعروفة عنها، وتقديمها في صورة الدولة المعتدلة المتحضرة زعيمة المنطقة.

وركن أساسي من أركان الحملة دي إنه تتقدم مصر في الصورة العكس 100%.

يعني إيه؟

♦ حملة "غسيل السمعة" للسعودية دي بتبرأ السعودية من كل اللي مشهور عنها وعن اللي سكنو نجد والحجاز قبل ما تقوم السعودية، من صفات مش حلوة، زي إنهم مش بتوع حضارة، ما عندهومش تاريخ، كان في منهم زمان اللي شحاتين عايشين ع الصدقات اللي بتروح للحجاز، أو حرامية بتوع غارات ونهب،  وإن السعودية بتاعة تطرف وإرهاب، وما عندهاش فنون أو علوم كبيرة، ولا عندها جيش قوي يحميها.

كـــل ده بقو دلوقت بيلزقوه في مصر، ويوصفوها بإنها "شحاتة"، "صنعت الإرهاب"، "معندهاش تاريخ"، "فنها ضعيف"، "جيشها ضعيف"، إلخ.

يعني الوحش في السعودية يلزقوه في مصر، والحلو في مصر يلزقوه في السعودية.

♦ فمن الخيوط اللي ماشية عليها الحملة دي، إنهم حتى بياخدو الصفات الحلوة المتقالة مخصوص عن مصر، ويوصفو بيها نفسهم.

مثلا بياخدو صفات زي "أم الدنيا"، "مهد الحضارة"، "جاءت مصر ثم جاء التاريخ"، ويوصفو بيها السعودية، ويتقال مثلا جاءت السعودية ثم جاء التاريخ.

رابط تويتة تركي آل الشيخ، رابط التويتة التانية

 

بالنسبة لموضوعنا هنا عن الجيش المصري، بقو يمسحو كلمة "خير أجناد الأرض" عن الجيش المصري، ويلزقوها في الجيش السعودي.

 ♦ كمان بياخدو أشهرعبارات قالها قادة مصر، وتخص انتصارات مصرية، ويلزقوها في السعودية، زي كلمة السادات المشهورة في خطاب النصر وقت حرب أكتوبر "أفقدنا العدو توازنه في 6 ساعات"، شبه اللي عملته حماس يعني.

ونقول هنا أمثلة بالتفصيل شوية:

فبعد الغارات السعودية على اليمن في يوم 30-12-2025 بحجة ضرب شحنات أسلحة إماراتية رايحة لمليشيات انفصالية، اتعمل فرح سعودي كبير في الإعلام، ولسة منصوب، عاملين فيه جو يقدم السعودية إنها بتعمل حرب كبيرة، وحققت فيها اللي محدش عمله، وبيعَيشو السعوديين جو الانتصار المصري في حرب 1973.

وبدأت حسابات إعلامية كبيرة، منها مثلا حساب "أخبار السعودية"، وهو حساب شبه رسمي، أو يمكن رسمي مش عارفة، وبيتابعه 21 مليون واحد، وهو بيقول: "لا يغضب عليك السعودي.. في 6 ساعات".

وكرّ وراه الكلمة حسابات تانية كتيرة.

رابط التويتة

 وهما كان يقصدو إن السعودية أجبرت الإمارات تنسحب من اليمن في 6 ساعات، وهي الفترة من لما بيان وزارة الخارجية السعودية طلع يدي إنذار للإمارات إنها تسحب قواتها من اليمن، وما بين بيان وزارة الدفاع الإماراتية اللي أعلن الانسحاب.

بس لما نبص في البيانين بنلاقي إنهم مش 6 ساعات.

فزي ما شايفين في البيانين، بيان الخارجية السعودية كان الساعة 08:36 الصبح يوم 30-12-2025، وبيان وزارة الدفاع الإماراتية كان الساعة 04:21 العصر يوم 30-12-2025، يعني ما بينهم 8 ساعات.

فالشوق جوة سعوديين إنهم يعيشو الدور المصري، ويلزقو لنفسهم التاريخ المصري بالظبط، خلاهم أخدو كلمة الساعات دي، وكمان بإنهم 6 ساعات زي ما قال السادات، مش 8 ساعات زي ما حصل بين السعودية والإمارات.

 وعشان يكمل جو الانتصار المصري بتاع أكتوبر، وصفت حسابات سعودية الجيش السعودي بإنه "خير أجناد الأرض".

ومع إنه معروف إن الكلمة دي متقالة عن المصريين، في حديث منسوب للرسول، وسوا الحديث صحيح ولا مش صحيح، بس المقولة متفسرة من زمن طويل إنها اتقالت على المصريين، والتاريخ المصري شاهد عليها قبل وبعد الإسلام، وحتى من غير حديث نبوي.

ونلاحظ إنه رغم مش قابلين يتقال على الجيش المصري "خير أجناد الأرض" بحجة الحديث ضعيف، بنلاقيهم عادي معندهومش مشكلة ياخدو الكلمة ويلزقوها على جيشهم، وكأنهم بيفتكرو الإسلام بس في اللي يخص مصر، لكن هما مسموح ليهم يعملو أي حاجة.

رابط التويتة

 

رابط تويتة سعودي مستخسر كلمة خير أجناد الأرض في مصر ويقول معلومات كدب

كمان لزق كلمة "خير أجناد الأرض" للجيش السعودي مش بريئة؛ لأنها جت بعد حملة طويلة عريضة عملتها الحسابات السعودية المتخصصة في الهجوم على مصر، وتحت رعاية مسئولين وشخصيات سعودية من دايرة ولي العهد محمد بن سلمان، زي تركي آل الشيخ وسعود القحطاني اللي حسابه على تويتر اسمه "كولومبوس".

والحملة دي متوجهة ضد كل حاجة في مصر من سنين، بما فيها الجيش المصري، وهي تشبه حملة ناس تبع جماعة الإخوان ومليشياتها اللي بيصوروه على إنه جيش هزايم، وإنه مش قادر يحمي البلد، وإن مليشيات فلسطين ولبنان أحسن منه إلخ.

زي مثلا حساب "أينشتاين السعودي" اللي عمل سلسلة مقالات ضد الجيش المصري، واتهمه إنه اللي ضيع فلسطين أكتر ما ضيعتها إسرائيل، وفي تويتة تانية إنه ما يستحقش صفة خير أجناد الأرض، ومقدم إن المصريين "كدبو" على الرسول عشان يعملو سمعة لجيشهم مش موجودة.

رابط التويتة

 وحساب أينشتاين ده أكد تركي آل الشيخ، اللي هو رئيس هيئة الترفيه، يعني مسئول سعودي كبير، رضا الحكومة السعودية عنه، بإنه مدحه في كذا تويتة، وطلب يحضر مناسبات بتعملها الحكومة السعودية، وعلق على تويتة ليه يوم 26-7-2024، وقال: مبدعين شبابنا المثقفين بكتاباتهم وبنشاطهم وتفاعلهم".

وبعدها كتبله تعليق تاني على تويتة يقوله: "إنت كاتب ممتع"، وبيطلب منه يستمر.

♦ وضمن شوق الحسابات اللي زي دي إنهم يعيشو جو الانتصارات المصرية والمجد المصري، نلاقيهم برضو أخدو عبارات بيقولها المصريين عن بلدهم زي: "مصر مين يقدر عليها"، وبقو يقولها "السعودية مين يقدر عليها"، وكلمة "إنها مصر يا سادة"، وبقو برضو يقولوها على السعودية.

 

رابط التويتة

● مليشيا حزب الله وكلمة "العدوان الثلاثي"

كان سبق والإعلام بتاع سوريا ومليشيا حزب الله إنهم أخدو كلمة "العدوان الثلاثي" على الهجوم اللي عملته أمريكا وفرنسا وبريطانيا على سوريا في 14-4-2018، وهي الكلمة المشهور عن العدوان اللي حصل من بريطانيا وفرنسا وإسرائيل ضد مصر سنة 1956.

وقال حزب الله في بيان يومها:

"يدين حزب الله بأقصى شدة العدوان الثلاثي الأميركي-البريطاني-الفرنسي الغادر على سوريا الشقيقة".

طبعا ناس تقول ما عادي يقول العدوان الثلاثي؛ لأن اللي هاجمو سوريا 3 دول برضو، يعني ممكن ما يبقاش قاصد حاجة وحشة.

ونقول طبعا جايز، مع إن في وسايل إعلام تانية استخدمت كلمة "الهجوم الثلاثي"، لكن سرعة حزب الله في إنه يطلع كلمة "العدوان الثلاثي" ويقولها على الهجوم على سوريا جاية من الذاكرة اللي تخص الحرب المصرية، واللي اتربط بالكلمة دي من معاني الصمود والنصر والهيبة اللي اتربطت باسم مصر لما أهلها صمدو لحد ما العدوان فشل في تحقيق أهدافه.

والكلام ده لاحظه كمان غيرنا لما مثلا مركز الدراسات العربية، وهو مكانه في لبنان، نشر مقالة عنوانها "العدوان الثلاثي على سورية : من الحرب الباردة إلى حرب ساخنة؟" في 24-3-2024، وقال فيها الكاتب ياسر أيوب إنه:

"ينطوي تعبير «العدوان الثلاثي» المستخدم في توصيف الهجوم الصاروخي على سورية يوم الثالث عشر من نيسان/أبريل 2018 على أكثر من مجرد تذكير بالعدوان الثلاثي على جمهورية مصر العربية في عام 1956، على أهمية هذا التذكير. فالهجوم الثلاثي على سورية يذكرنا بالمناخ الدولي الذي ساد علاقات الغرب مع الكتلة الشرقية في سياق الحرب الباردة".

وبيكمل إن العدوان الثلاثي على مصر اتسبب في تغيير موازين القوى وعمل حروب إقليمية، وده ممكن يتكرر بعد العدوان على سوريا.

رابط الخبر على موقع "العلاقات الإعلامية في حزب الله"

 

● إيه المشكلة في التقليد بين الشعوب؟

في ناس تقول، وإيه يعني، ما كل الشعوب بتتقلد بعض، وفي دايما شعوب بتاخد مصطلحات وصفات وحاجات مشهور بيها غيرها وتوصف بيها نفسها.

هو أيوة صح التقليد حاجة شايعة في الدنيا، وحتى في مصريين ممكن نلاقيهم بيقلدو حاجة عجبتهم تخص ثقافة بلاد تانية، بس في فرق، إيه هو؟

في فرق بين إنه الواحد يقلد أو ينقل صفة بلد لبلده من باب التقليد أو شاف شبه بينها وبين بلده، وهو مش مستحب يعني، وما بين واحد عايز يمسح الصفة دي عن البلد اللي هي صاحبتها ويلزقها لنفسه بس، ويبرر ده لنفسه بأدلة كدب، دي كدة تبقى سرقة، وقاصد يضر البلد التانية.

فمثلا، لو واحد سعودي ولا قطري ولا أمريكاني وقال على بلده أم الدنيا، أو قال على جيشه إنه خير أجناد الأرض، عشان بس هو شايف إن بلده وجيشه يستحقو ده، كان ممكن يتقال هي بس عجبتهم الكلمة وخدوها بحسن نية.

بس لو الناس دي وهما بياخدو الصفات المصرية، قعدو يقولو إن مصر ما تستحقهاش، ويعملو حملات ضد مصر، ويلزقو الصفات دي لبلدهم أو جيشهم بس، ويلزقو الصفات الوحشة بمصر عن طريق تزوير التاريخ، هنا بقى تبقى دي حرب، وخطة مقصودة يمسحني أنا عشان هو يورث صفات حلوة تخصني.

وبعدين مش أحسن يخترع لبلده صفات تخصها؟

وزي ما بنتابع، السعوديين وهما بيقولو على جيشهم "خير أجناد الأرض"، بيعملو حملة على الجيش المصري ويستخسرو الكلمة فيه، وهما بيقولو السعودية "مهد الحضارات" شغالين حملات تتهم مصر إنها من غير تاريخ، أو إن حضارتها حضارة كفر وأصنام، وهكذا.

وناس تبع جماعة الإخوان وهما بياخد الصفات المصرية، بيحاولو يقدمو نفسهم إنهم الأحق بيها، وإن اللي سموه النصر بتاع طوفان الأقصى (اللي جاب الاحتلال تاني لغزة) أهم وأكبر من نصر 6 أكتوبر.

ومثال تاني مثلا حزب الله اللي أخد مصطلح "العدوان الثلاثي" ولزقه في الهجوم على سوريا،  دايما بيعمل حملات ضد الجيش المصري، وحرض كذا مرة على ضربه من جواه.

فمثلا، وقت محاولة الغزو الفلسطيني لمصر سنة 2008، لما مليشيات غزة زقت الفلسطينيين ناحية معبر رفح عشان يقتحمو المعبر ويدخلو سينا، بحجة يفكو الحصار، طلع حسن نصر الله، الأمين العام لحزب الله، قال "أيها المسؤولون المصريون ان لم تفتحوا معبر رفح فانتم شركاء في الجريمة وفي القتل وفي الحصار".

وحرّض المصريين يطلعو مظاهرات ضد الحكومة ويروحو معبر رفح "يفتحوه بصدورهم"، وحرض على انقلاب جوة الجيش المصري، لما حرّض الظباط إنهم يتمردو على القيادة، وما يسمعوش أوامرها بحماية الحدود المصرية من الفلسطينيين.

يعني كان عايز يفرتك الجيش، والبلد تدخل في حرب أهلية، ويتحول الجيش لمليشيات.

فحزب الله أمله يورث كل سمعة حلوة لمصر، ويلزقها في بلاد وحركات ماشية على نفس خطه، وعشان كدة إنه ياخد كلمة "العدوان الثلاثي" ويلزقها لسوريا مش باين إنه حاجة بريئة.

رابط الخبر لقرايته كامل

في النهاية، في أمثلة كتيرة قوي على لهف شعوب كتير حوالينا للصفات والمصطلحات اللي تخص مصر، واللي هي جزء من "القوة الناعمة" ليها، وفي نفس الوقت يستكتروها على مصر، جبنا منها أمثلة قليلة دلوقت عشان الوقت، وعشان نوضح مع بعض خط من خطوط اللي بسميه "الحرب السعودية على مصر" أو "حرب السمعة"، بالتعاون مع جماعة الإخوان المسلمين، اللي رجع بينهم التحالف دلوقت، خصوصا بعد أزمة السعودية مع الإمارات، والتحالف ده هيكون ضد مصر في الأساس، والإمارات يدوب بس محطة.

ده الحلقة مسموعة على قناة "كيمة والخاسوت:

 

وفوتكو بعافية

"مصر للمصريين، المصريين الحقيقيين، مش المصريين المستخبين في الجنسية المصرية، وقلوبهم وعقولهم مع تنظيمات وبلاد أجنبية".

تصنيف : أعداء الهوية المصرية,عين الفلاح,هكسوس العصر