إفتكار السيد (نفرتاري أحمس)

وأنا بتابع فيديوهات لواحد من مشاهير اللي بتتسمى المعارضة السورية، من باب إنه إحنا كمصريين لازم نعرف تفكير كل التيارات في البلاد اللي حوالينا، عشان نعرف نواياهم ناحيتنا، لقيت له فيديو من سنة 2022، بيحط فيه خطة للاجئين السوريين في مصر والأردن ولبنان على إنهم يساعدو في عمل حروب أهلية، واحتلال محافظات فيها، خصوصا القريبة في الحدود مع سوريا أو مع فلسطين، وتقسيمها، علشان يعملو اللي سماه "اتحاد بلاد الشام".

والفيديو لحد ما كتبت المقالة دي موجود على قناته، وهحط الرابط بتاعه مع بقية المصادر في نهاية المقالة المنشورة في مدونة "كيمة والهكسوس"، وتحت الفيديو اللي هنشره في قناة "كيمة والخاسوت"، وكمان هنشر حتت من الفيديو وإحنا بنعرض كلامه.

عناوين المقالة:

الاتفاق مع أمريكا وإسرائيل ضد سوريا

خطة اللاجئين والأربع جيوش

دور اللاجئين السوريين في لبنان

دور اللاجئين السوريين في مصر، التقسيم وتكنيز الدهب

دور اللاجئين في الأردن

دور اللاجئين في تركيا وفي الشمال

خلق الفوضى "طريق" سوريا لـ 2030

كله "خربان" عدا تركيا وإسرائيل وسوريا

ما تستهونوش ولو بنملة

السياسي المعارض السوري ده اسمه كمال اللبواني، وهنعرف هو من أنهي نوعية من المعارضين لما نشوف محطات في مشوار حياته:

هو مولود في 1957، يعني السنة دي 2025 عنده 68 سنة، وهو دكتور بشري (طبيب)، دخل في المعارضة السياسية قبل 2011 بتأسيس حزب الاتحاد الديمقراطي الليبرالي السوري، ودخل في حركة "ربيع دمشق" اللي كانت بتطالب بشار الأسد يعمل إصلاحات، واتقبض عليه كذا مرة، منها في 2001 بتهمة "التحريض على ثورة مسلحة"، وطلع من السجن في 2004.

صورة لكمال اللبواني من قناته على يوتيوب

الاتفاق مع أمريكا وإسرائيل ضد سوريا

وبعدين قبضت عليه السلطات في 2005 بعد زيارات عملها لأوروبا وأمريكا قابل فيها منظمات حقوق إنسان ومسئولين أجانب، وفي فيديو جديد ليه، هحط الرابط بتاعه في المصادر، عنوانه "أحلام إسرائيل وكوابيس العرب" لسة نازل من يومين، اعترف إنه في 2005 راح أمريكا واتفق مع الأمريكان يدو بشار الأسد مهلة يعمل إصلاحات كام شهر، ولو رفض يتشال.

وفي 2007 حكمت عليه محكمة الجنايات بالسجن بتهمة: "دس الدسائس لدى دولة أجنبية والاتصال بها ليدفعها إلى مباشرة العدوان على سوريا".

وفي 2008 اتحكم عليه حكم تاني بالسجن من محكمة عسكرية بتهمة "نشر أنباء كاذبة أو مبالغ فيها من شأنها أن توهن نفسية الأمة".

واهتمت بقضيته وأخبار محاكمته المنظمات الدولية والحقوقية المعروفة زي منظمة العفو الدولية، وهيومان رايتس ووتش، وكمان الاتحاد الأوروبي، والأمم المتحدة.

وبعد ما قامت الفوضى في سوريا في 2011، طلَّعت الحكومة السورية في نفس السنة معارضين من السجون، منهم اللبواني، وأخد لجوء هو وعيلته للسويد، اللي منها بيقول التحريض اللي هنسمعه منه بعد شوية ضد مصر ولبنان والأردن.

لما استنيكص في السويد انضم لكذا حركة من حركات المعارضة السورية اللي كنا بنسمع عنها بتدعي للثورة المسلحة ضد حكم الأسد، وبتتعاون مع دول أجنبية، وبتوافق على وجود جيوش أجنبية تساعد في خلع الأسد، ومن هنا نلاحظ إن التهم اللي حاكمته بيها السلطات السورية قبل 2011، واللي تخص إنه بيتعاون مع جهات أجنبية للعدوان على سوريا، وبيحرض على ثورة مسلحة، مكنش فيها مبالغة أو مكنش بعيدة عن اللي عمله بعد كدة فعلا.

من حركات المعارضة اللي كان عضو فيها "المجلس الوطني السوري"، وبعدين سابه هو وكذا معارض تاني بسبب خلافات داخلية، وعملو "جبهة العمل الوطني" اللي كانت واقفة مع اللي اتسمى الجيش السوري الحر اللي بتموله دول أجنبية، لكن الجبهة اتفركشت بسبب خلافات داخلية برضو، وكان عضو في الائتلاف الوطني السوري المعارض.

في 2014 اقترح في مقابلة مع صحيفة "العرب" اللي بتطلع في لندن ومع وسايل إعلام تانية إن إسرائيل تتدخل عسكري في جنوب سوريا عشان تساعد المعارضة السورية المسلحة، وقصاد ده يتنازل السوريين عن مطالب ليهم بخصوص هضبة الجولان.

وفي نفس السنة 2014 زار إسرائيل وحضر مؤتمر اسمه "القمة العالمية لمكافحة الإرهاب" وزيارته كشفت دور موجود فعلا لإسرائيل في دعم جماعات من المعارضة المسلحة السورية، فهو هناك راح زار سوريين متصابين بيتعالجو في مستشفى في إسرائيل.

وكرر زيارة إسرائيل في 2016.

خطة اللاجئين والأربع جيوش

نوصل لموضوع الحلقة، وهو تحريضه للاجئين السوريين على تخريب مصر ولبنان والأردن.

في أول يوم من سنة 2022 نشر فيديو عنوانه "رؤيتي للشرق الأوسط 2030" واتكلم فيه عن إيه هيكون حال سوريا بعد 10 سنين.

وحط أمل على إنه سوريا أول ما هتيجي سنة 2030 هتكون رايحة للتنمية، وهتنط نطة كبيرة قوي لفوق، وهيبدأ يتكون اللي سماه اتحاد بلاد الشام، وهتكون سوريا هي الدولة اللي رايحة لمستقبل عظيم، أما أكتر دول المنطقة، ومنها مصر، هتكون حسب كلامه كلها خراب، وكلها راحت وانتهت واتقسمت بمساعدة 4 جيوش هيتكونو من اللاجئين السوريين وحلفا معاهم.

وعشان ده يتحقق، حدد دور للسوريين الموجودين في كذا دولة، يتلخص الدور ده في إنهم:

1- يساعدو على خراب البلاد اللي هما فيها بالحروب الأهلية والفوضى.

2- يستنزفو اقتصادها بتخزين الدهب والفلوس.

3- يساعدو في تقسيمها بإنهم يسيطرو على محافظات فيها ويحتلوها، ويضموها بعدين للي سماه اتحاد بلاد الشام.

واتكلم بشكل مخصوص وبالترتيب على اللاجئين في لبنان، واللاجئين في مصر، واللاجئين في الأردن.

1- دور اللاجئين السوريين في لبنان

قال إن لبنان رايحة ع الخراب قبل ما يتظبط حال سوريا، ومهمتكو (بيكلم السوريين في لبنان) تتمسكو بالأرض السورية المحتلة في لبنان من سهل البقاع ووادي خالد للقصير لجبال القلمون، بعلبك لحد أرعون ولحد صيدا وطرابلس، وتوصلوهم بالقصير، وإنه إحنا عايزين جبال لبنان الشرقية كاملة، اللي قال إنها ملك خاص لسوريا.

وكمل، وهو بيقول للاجئين السوريين، فمهمتكو هي تشتركو في حرب أهلية، بتعملو منظمات، وتعتبرو هذه الأرض ملك للدولة السورية، وكل ملكية عامة فيها ملككم، أما الملكية الخاصة، حتى للبناني الأجنبي (اعتبر اللبناني في المدن اللبنانية دي أجنبي) قال ما فيهاش مشكلة، إلا إذا عمل جرايم تاخدوها منه.

وختم التحريض على لبنان بإنه "إذا اللاجئين السوريين في لبنان عليهم إعادة تحرير طرابلس وصيدا والبقاع وجبل القلمون وضمه لسوريا" واقترح إن ده يكون خلال 5 سنين بالكتير.

2- دور اللاجئين السوريين في مصر، التقسيم وتكنيز الدهب

بيقول كمال اللبواني للاجئين السوريين في مصر، إن مصر خلال سنة أو اتنين أو تلاتة رايحة على حرب أهلية، وإنتو دوركم تظبطو أموركو لحد ما تروحو على سينا، وإن سينا هتستقل وتبقى تابعة لبلاد الشام، وإنتو تساعدوها وتعمروها مع أهل سينا، وأهل سينا إنتو عارفين إن لهجتنا واحدة وأغانينا واحدة (يعني زي البدو بتوع الشام) وهتتعاملو معاهم زي ما بتتعاملو مع البادية السورية، فالبادية السورية بتتمد لسينا، وهي شعب واحد مع بدو الأردن وبدو النقب (حسب كلامه).

أما المدن اللي موجود فيها السوريين في مصر زي 6 أكتوبر وغيرها، فنصح السوريين ما يقعدوش فيها لما تحصل الفوضى اللي هو مستنيها في مصر.

وقال بانشكاح إن الأماكن دي هتتحرق، وأول ما هتنزل اللي سماها جموع الجوعانين هينتشر في مصر القتل والتعفيش (التعفيش مصطلح مشهور في سوريا معناه نهب البيوت والمحلات وكل حاجة من غير رحمة) وإن التعفيش ده هيوصل للعاصمة الإدارية، اللي قال إنها هتتنهب نهب، وحتى الحجارة وحتى البلاط، من اللي سماه الجراد المصري (وضحك ضحكة خبيثة وطويلة)، وقال إنها هتكون أثر بعد عين، وأطلال، ويغنو عليها أغنية الأطلال (وكمل ضحك).

وعن نزح الاقتصاد المصري قال للسوريين في مصر، جهزو أموركو، خلو معاكو الدهب ومصاري (فلوس يعني)، وخبوه، عشان لما ترحلو من المدن اللي هما فيها لما تقوم الفوضى ويطلعو على سينا.

وقالهم يجهزو أتوبيسات، وكل عيلة تأمن وسيلة نقل توصلها لسينا (مع الدهب والفلوس) وما تروحوش على أوروبا عشان الطيران اللي تبع الناتو هيقصفكو، وهتغرقو في البحر، واطلعو على سينا اللي هتبقى بحسب كلامه دولة حرة مستقلة، وتتفقو مع أهل غزة وتعملو سلام مع إسرائيل؛ لأنه من غير السلام ده هيمسحوكو (يقصد الإسرائيليين)، والسلام مع إسرائيل هيعملكو غطاء حماية وغطاء اقتصادي وتفتحو الحدود مع غزة، وسيبو للمصريين قناة السويس، وخدو بعض المضايق، ومالكوش مصلحة في البحيرات المرة وقناة السويس.

وقال إن سينا بعدين هتدخل في اتحاد بلاد الشام.

ملحوظة: كلام اللبواني عن إن سينا تبقى تبع بلاد الشام مش جديد، لكن هو مشروع عند أحزاب ومنظمات سورية من مدة طويلة، واتكلمنا عليه قبل كدة في كذا مقالة في مدونة كيمة والهكسوس، وهبقى أسجله وأنزله في القناة.

3- دور اللاجئين في الأردن

بخصوص السوريين في الأردن، قال كمال اللبواني إنه خلال 10 سنين هتقوم دولة فلسطينية في الأردن، ويقعو الأردنيين في بعض والفلسطينيين في بعض، وتقوم دولة فلسطينية حمساوية إخوانية في عمَّان والزرقا والبلدة إلخ، ومناطق تانية زي إربد والرمتا هتستقل، والجنوب والبادية هتستقل، وتتقسم الأردن لـ 3 دول.

وقال للسوريين اللي فيها إن مهمتكو تشكيل الجبهة الجنوبية إدلب- درعا-الرمتا، وتتفقو مع قبايل الشمال وتتحاورو مع أهل درعا (درعا مدينة سورية في جنوب سوريا ع الحدود مع الأردن)، ويشكل اللاجئين الجبهة الجنوبية، وبكدة الأردن اللي سماها كيان مؤقت هتكون خربت بحسب كلامه.

4- دور اللاجئين في تركيا وخلق الفوضى طريق سوريا لـ2030

اللاجئين في تركيا وفي المناطق اللي بيسيطر عليها الأكراد أو بتحتلها تركيا في شمال سوريا، دورهم يختلف في خطة اللبواني عن دورهم في مصر ولبنان والأردن، فما حرضهومش على تخريب ولا تقسيم تركيا، بالعكس، هو اعتبر تركيا حليف ضروري للسوريين عشان تتنفذ خطته دي.

ووصف اللاجئين في تركيا وشمال سوريا بـ "القوة الضاربة" اللي هتتحرك لما يحصل خلل في سوريا، وقال، إنه وقتها هتزحف ناحية حماة وحمص، ويأمنو الوصلة مع جماعتنا في لبنان ومع جماعتنا في الأردن، ويبقى في 3 فكوك كماشة تحاصر دمشق، مع تحالف بدو البادية مع الشمال، ويبقى كدة بتتحرر سوريا بقوانا إحنا وبالفوضى الخلاقة اللي مفيش حل لتحرير سوريا إلا بيها، وبتصنعها كتلة بشرية لينا في كذا دولة، هما مليون في مصر، ومليونين في الأردن، ومليونين تلاتة في لبنان، وأربعة أو خمس ملايين في تركيا، وتلاتة أو أربعة مليون في إدلب، وعشرة أو إضناشر مليون في الداخل.

وبكدة تتشكل 4 جيوش، واحد جاي من الجنوب وواحد من الشمال، وواحد يدعمهم من الغرب، وواحد يدعمهم من الشرق.

وتوقع السياسي المعارض السوري كمال اللبواني إنه في التاريخ ده، 2030 هتكون سوريا دخلت في التحرير، وإن الحليف ليهم في الخطة دي، اللي هي خطة خلق الفوضى الخلاقة بالتعاون مع اللاجئين السوريين، هتكون تركيا.

ويكمل بإنه عندنا حليف تاني محتمل هما سنة العراق، وفي حليف تالت هيكون دولة هتتأسس في شمال السعودية قرب الحدود السورية، فهو قال إنه إذا خربت السعودية، وتوقع إنه خلال 10 سنوات هتخرب حسب كلامه، هتتشكل إمارة بني شعلان في تبوك والشمال زي ما كانت من زمان مع جنوب الأردن، ودول بيحبو الشام وطول عمرهم بيروحو وييجو على الشام، وليهم قصر ومقابر في سوريا، وهما حليف قوي.

كله "خربان" عدا تركيا وإسرائيل وسوريا

وتمنى اللبواني الخراب لأكتر بلاد المنطقة، فقال إن إيران خربانة، العراق خربانة، والكويت والسعودية خربانة، الأردن خربانة، مصر خربانة، تركيا بترقص لكن مش خربانة، أما سوريا فأول دولة هترجع لقوتها بعد ما تخلص الفوضى الخلاقة في 2030.

وبروح فيها تشفي في البلاد دي، وتمني إنه يحصلها زي اللي حصل لبلده سوريا من خراب (هو أساسا شارك فيه لما قبل إنه تتشكل جماعات مسلحة توقع نظام الحكم بدعم أجنبي)، قال إنه اللي شايفه إنه لحد 2030 هيكون التدمير، واللي حصل لسوريا هيحصل في الأردن والعراق ومصر والسعودية ولبنان وليبيا والسودان والكويت، وإنه، حسب كلامه، كله رايح على الخراب، وأول دولة هتتبني هي سوريا، واللي ممكن يستمر هو تركيا وإسرائيل، عدا ده كله رايح زي ما راحت سوريا، وإنه نحن السابقون وأنتم اللاحقون.

وختم بإنه إعادة تكوين الشرق الأوسط هتبدأ من سوريا في 2030 بالأربع جيوش اللي هيتحركو على أربع جبهات باللاجئين السوريين.

-----------

ما تستهونوش ولو بنملة

في التعليقات على الفيديو ده، في ناس عجبها الكلام واتمنت يحصل، وناس اتريقت عليه وقالت إن اللبواني مسطول، وإنه لما نحرر سوريا من قوات أمريكا وإسرائيل نبقى نفكر ناخد أراضي في بلاد غيرنا.

بالنسبة لينا إحنا المصريين اللي يهمنا إننا ما نستهونش بأي خطط أو أحلام أو كلام يطلع من الناس دي، واللي ليها تاريخ طويل في التآمر والاتصال والتخطيط مع منظمات مسلحة ودول أجنبية، لأن حتى لو ما اتحققش اللي هو بيحلم بيه بنفس الشكل اللي بيحرض اللاجئين السوريين عليه، فاللي يهمنا إن السوريين في مصر محطوطين على أجندة كتير من خطط دول ومنظمات، إنهم يكون أداة ضد البلد في أي لحظة ضعف أو فوضى تعدي عليها، أو حتى يكونو هما من وسايل صناعة ونشر الفوضى دي، وجربنا ده كذا مرة في تاريخنا، وأقربها لما اشترك كتير من السوريين وغيرهم من أجانب في مصر مع تنظيم الإخوان الدولي في احتلال ميدان رابعة والنهضة، وضرب المصريين بالسلاح في سنة 2013.

كمان ما ننساش إنه بينصحهم إنهم يحوشو الدهب والفلوس، عشان يبقى سهل يهربوه أو يهربو بيه في أي وقت، وده معناه نزح اقتصاد أي بلد هما فيها، وإن كان كتير من الشوام مش مستنيين نصيحته دي، لأنها شغلتهم من قديم الزمن زي اليهود تمام.

رابط الحلقة مسموعة على قناة "كيمة والخاسوت"

https://www.youtube.com/watch?v=CWSbowhGwaY