نهايات الحكام.. 5 حاجات للشبه بين السيسي وسامبي بعد "الخيانة العظمى" في جزر القمر

 القاهرة- إفتكار السيد (نفرتاري أحمس)

ما بين الرئيس عبد الفتاح السيسي ورئيس جزر القمر اللي فات، أحمد عبد الله سامبي، المحكوم عليه بالحسب مدى الحياة بتهمة الخيانة العظمى، 5 حاجات يشبهو بعض فيها، في الغالب هي اللي خلت كل رئيس فيهم يسَود تاريخه ويشيل نفسه عار إنه يعمل قانون بيع الجنسية بتاعة بلده.

 وكنا إتكلمنا الحلقة اللي فاتت اللي عنوانها "قصة بيع الجنسية المصرية لـ البدون من 2014- 2026 ومين وراها ومين اتحاكم بالخيانة العظمى" عن إزاي بيحصل توطين وتجنيس اللي مالهومش جنسية "البدون" بتوع الخليج وغيرهم في مصر.

وإن تجربة جزر القمر في بيع الجنسية بتاعتها للبدون خلصت على جُرسة كبيرة، ورئيسها اللي عمل قانون بيع الجنسة، محمد عبد الله سامبي، اتحبس واتحاكم بتهمة الخيانة العظمى، ولا نفعته بلاد الخليج ولا إيران اللي عشانهم باع جنسية بلده.

والمرة دي هنتكلم عن سامبي ده، بشكل أوسع، وهنلاقي مفاجآت تهمنا كتييير كمصريين عن الشبه بينه وبين السيسي، إزاي؟

أنا ليه دورت وراه أصلا؟ لأني أنا من زمان ما بقتش أبلع ولا يخش في دماغي الكلام بتاع إن خيانة البلد بيبقى سببها الفلوس، أو إن واحد فقير عايز فلوس، أو حتى واحد غني بس مش شبعان وعايز فلوس زيادة.

ليه؟

لأن الخيانة من أوعر الجرايم في الدنيا، وأكترها، لا مؤاخذة، نتنانة، والجُرسة بتاعتها أكبر من جرسة جريمة السرقة أو النصب أو الرشوة أو حتى القتل، وجرستها بتضرب العيلة بحالها بتاعة الخاين، فصعب قوي إن ناس عشان الفلوس لوحدها تدخل الخيّة دي، فلازم يبقى في حاجة أقوى من الفلوس مغطية بصيرة الخاين.

وخيانة البلد بالذات صعب تطلع إلا إما من حد أصلا كاره البلد دي وعايزليها الضرر، سوا كسب من ورا ده فلوس أو لا.

أو من حد متأدلج، يعني واحد بلعه تيار ديني، يسارجي، عولمجي، عروبجي إلخ، من التيارات المسمومة اللي بتمسح الوطنية من المخ والقلب، وتعلم اللي تبعها إنه مفيش حاجة اسمها الدولة الوطنية وأخويا ابن بلدي، وعندهم وهم إنه هو بيعمل خير وبطولة لما يضحي ببلده وعيال بلده في سبيل الفكرة الأكبر، وهي دولة الخلافة الإسلامية، أو المًلك الألفي بتاع المسيح، أو دولة الشيوعية العالمية، أو دولة المواطن العالمي إلخ.

● لما دورنا ورا سامبي لقينا إيه؟

 الأول نفتكر على السريع إزاي حصل بيع جنسية جزر القمر أيامه، واتوصف بإيه وقت محاكمته.

محمد عبد الله سامبي مسك الحكم من سنة 2006- 2011، ووقتها عمل اتفاق مع الإمارات، واتنشر إنه عمل مفاوضات كمان مع الكويت، إنه يدي جنسية جزر القمر لآلاف العائلات من "البدون" اللي في البلاد دي، ويخلصهم من الصداع اللي عامله ليهم البدون ومنظمات حقوق الإنسان اللي عايزين الإمارات والكويت والسعودية وقطر يدو الجنسية بتاعتهم للبدون.

وفي سنة 2008 اتعمل فعلا في جزر القمر قانون أو برنامج اسمه برنامج "الجنسية الاقتصادية" وهو غطا لكلمة بيع الجنسية، إنه الأجنبي ياخد الجنسية قصاد فلوس أو استثمارات، والإمارات والكويت عرضو هيعملو استثمارات ومشاريع في جزر القمر قصاد تجنيس البدون.

وفعلا اتباعت الجنسية القمرية لعشرات الآلاف من الأجانب، أكترهم في الخليج، وخصوصا الإمارات، من 40-50 ألف واحد، وده عدد كبير بالنسبة لعدد سكان جزر القمر اللي مش مكملين مليون واحد.

تفاصيل ومصادر بيع الجنسية القمرية للبدون والإيرانيين في رابط المقالة اللي فاتت وفي الفيديو ده على قناة كيمة والخاسوت

والموضوع ما وقفش على بيع الجنسية للبدون، لكن كمان إدوها لإيرانيين عليهم عقوبات، خدو الجنسية يهربو بيها من العقوبات، وبعد شوية هنعرف إيه علاقة سامبي بإيران اللي ممكن تكون خلت الحكومة تعمل كدة.

وفوق ده تحقيقات للبرلمان قالت إنه في جوازات سفر اتباعت برة إطار القانون، وإن الفلوس ما راحتش لخزنة الدولة، لكن اتشفطت.

البيع ده حصل أيام سامبي (حكم من 2006-2011)، وكمان أيام الرئيس اللي جه بعده واسمه إكليل ظنين (2011-2016).

بس أول ما مسك رئيس جزر القمر، غزالي عثماني، اللي بيحكم من سنة 2016 لحد دلوقت، وقَّف الشغل ببرنامج بيع الجنسية، وبدأت التحقيقات والمحاكمات، واتحاكم سامبي الأول بتهمة الفساد، بعدين بتهمة الخيانة العظمى، واتطس حكم بالحبس مدى الحياة، وطار مشروع تجنيس البدون عن طريق جزر القمر، وقعدت الجُرسة لسامبي وكل اللي اشترك في بيع الجنسية.

الحكم على سامبي مكنش بالسجن طول العمر بس، لكن كمان بمصادرة كل اللي يملكه، وتجريده من حقوقه السياسية والمدنية، ومنعه من إنه ياخد أي منصب عام مرة تاني، يعني اتقضى عليه من كل النواحي.

وعشان نعرف قد إيه المحاكمة كانت شديدة، فحسب محامي من محاميين سامبي، واسمه جان جيل حليمي، فالخيانة العظمى جريمة مش موجودة في القانون بتاع جزر القمر، ومش معروف ليها مفهوم قانوني محدد.

وحسب التغطيات الصحفية للقضية، فدي أول مرة يحصل محاكمة لمسئول بتهمة الخيانة العظمى؛ لأنه واضح إن كلمة فساد أقل من اللي تستحقه تهمة بيع الجنسية وسرقة الفلوس اللي جت من وراها.

التفاصيل في خبر موقع الشرق نقل عن وكالة الأنباء الفرنسية

● الجنسية والفول السوداني         

وقت المحاكمة قال المدعي العام، علي محمد جنيد، عن سامبي إنه: “لقد خان المهمة التي كلفه بها مواطنو جزر القمر".

واتُهم سامبي إنه اختلس ثروة من ورا بيع الجنسية، واتسبب في خساير لخزنة الدولة وصلت لأكتر من 1,8 مليار يورو، يعني أكثر من الناتج المحلي الإجمالي لجزر القمر البلد الصغيرة اللي بتتوصف بإنها فقيرة.

كمان قال محامي الطرف المدني، يعني اللي بيمثل الدولة، إريك سوسا: "لقد منحوا فاسقين الحق في بيع جنسية جزر القمر كما نبيع الفول السوداني".

طبعا سامبي والمحاميين بتوعه نفو التهمة، وقالو مفيش أي دليل على إن الفلوس دي موجودة عند سامبي، وقالو إن المحاكمة سياسية؛ لأن سامبي كان أكبر معارض للرئيس عثمان غزالي.

إحنا ما يهمناش هنا دوافع المحاكمة حقيقية ولا تخص منافسات سياسية، لكن يهمنا أصل الجريمة والصفة بتاعتها، وإنه فعلا هي جريمة، وهي تستحق المحاكمة، وهي تستحق صفة الخيانة العظمى.

● الشبه بين السيسي وسامبي (5 حاجات)

طيب هنيجي للمفاجآت اللي قلنا لقيناها وإحنا بندور ورا سامبي، ولقينا إنه في حاجات كتييير شبه بين شخصيته وإيه اللي بيحركه في قراراته، وبين شخصية الرئيس عبد الفتاح السيسي اللي برضو يا خسارة باع الجنسية المصرية.. زي إيه؟

1- الهالة الدينية والدروشة اللي لابسينها.

2- حط العروبة فوق البلد.

3- التقليل من الشعب قصاد العالم بكلمة "إنتو فقرا قوي".

4- تلميع وتحصين النفس بنصرة قضية أجنبية على حساب البلد.

5- الاتنين رؤسا ليهم جاه.

♦ الهالة الدينية والدروشة

في 2009 عملت قناة الجزيرة مقابلة مع سامبي لما كان لسة رئيس، في حلقة عنوانها "مباشر مع أحمد عبد الله سامبي"، وقالت المذيعة وهي بتقدمه، إنه درس في الجامعة الإسلامية في المدينة المنورة في السعودية، وبعدها درس في حوزة علمية في إيران مدة 4 سنين ورجع سنة 1986، ولما رجع جزر القمر اشتغل مرشد ديني.

ووصفه تقرير لوكالة الأنباء الفرنسية عنوانه "حكم بسجن رئيس جزر القمر السابق أحمد عبد الله سامبي مدى الحياة بتهمة “الخيانة العظمى" بإنه "إسلامي شهير"، بيلبس معظم الأوقات هدوم تشبه هدوم رجال الدين الإيرانيين، وبسبب ده اشتهر بلقب "آية الله القمري"، وهو بنفسه في حوار مع جرنان "الراي" الكويتي قال إنه بيعتز بلقب "آية الله".

وفعلا لما نبص في صوره وفيديوهاته نلاقيه لابس لبس قريب جدا من لبس الطرق الصوفية أوقات، ولبس رجال دين شيعة أوقات، ولبس شيوخ عرب أوقات، وكتير من كلامه لما نسمعه في اللقاءات فيه الوعظ والكلام عن آل البيت إلخ.

شكل من أشكال لبس سامبي

ويتأكد علاقات سامبي اللي على أساس ديني لما شفنا إن ناس تبع إيران وحزب الله، زي حركة اسمها "التجمع العالمي لدعم خيار المقاومة" وهي في لبنان، عملت حملات ومؤتمرات تدافع عنه بعد ما اتحاكم، ووصفته بـ "المظلوم" وإنه "كان في مقدمة صفوف المدافعين عن فلسطين والرافضين للتطبيع"، زي ما جه في كلمة يحيي غدار أمين الحركة دي في ندوة بتطالب بإنه يطلع من السجن، عملتها في 2-2-2023 بعنوان "الحرية للرئيس سامبي".

بالنسبة للرئيس السيسي هو ما وصلش لدرجة يلبس لبس رجال الدين، لكن هو دايما محاوط نفسه بالناس بتوع الطرق الصوفية والدروشة، زي اليمني حبيب الجفري، وعلي جمعة اللي كان مفتي الجمهورية، وأسامة الأزهري وزير الأوقاف دلوقت إلخ، وحتى جماعات شيعية زي "البهرة".

ورغم إنه بياخد قرارات تضيع حقوق المصريين ومصر كلها، زي تسهيل بيع الجنسية المصرية والأراضي والأصول المصرية للأجانب، وفتح البلد لملايين اللاجئين، إلا إنه كلامه مع الناس دايما بيحاوطه بهالة دينية، كأنه عايز يقطع عليهم الطريق إنهم يرفضو قراراته دي، وبيقدم نفسه على إن صلته بالله بتخليه واثق في إن اللي بيعمله صح، لحد ما ناس وصفته من باب السخرية بإنه "كليم الله".

فسامبي آخد صفة "آية الله"، والسيسي صفة "كليم الله"، والاتنين بيدلو على إنهم بعدو عن وظيفتهم الأساسية كحكام دولة.

ومعروف إن الطرق الصوفية أو الشيعية أو أي تيارات دينية ليها امتدادات برة الحدود، هي مش بتؤمن أصلا بالدولة الوطنية، وبتؤمن بإن البلد اللي هي فيها "للجميع"، ومش بتحترم جنسية البلد اللي شايلاها، بتعتبرها يدوب وسيلة مش غاية، فسهل يطلع من أصحابها قرارات زي بيع الجنسية.

كلمة للسيسي في المؤتمر الأول لمشروع حياة كريمة عن كلامه مع ربنا نشرتها قناة "تن تي في" 17-5-2021 بعنوان: "السيسي: ربنا قالي هخلي معاك البركة وريني هتعمل ايه لبلدك وهتراضي ناسك وتسعدهم"

♦ حط العروبة فوق البلد

سامبي في لقاءاته بينسب نفسه وأجداده لجزيرة العرب، ويعتز بده قوي، ويعتبر إن كتير من شعب جزر القمر نفس الموضوع، وإن بلاد زي عمان واليمن هي جدورهم، وده رغم اعترافه إن اللغة العربية مش منتشرة في البلد (بينتشر فيها اللغة القمرية والفرنسية)، وإن حتى الرؤسا اللي قبله مكنوش بيتكلمو عربي.

ومع إن الواقع بيقول عكس كلام سامبي في اللي يخص "عروبة" جزر القمر، فبخلاف انتشار ملامح شرق أفريقيا السودا والزنجية في شعب جزر القمر أكتر من أي ملامح تانية، فمش معنى إنه في تجار جم لجزر القمر من عمان واليمن في زمن قديم يبقى خلاص تتنسب هوية البلد كلها ليهم.

 فنفس البلد جالها ناس من أندونيسيا وماليزيا، فهل هتتنسب ليهم؟ والأهم أكتر سكانها من شرق أفريقيا، فليه ما تتنسبش ليهم؟ وليه ما يبقاش سكانها اسمهم القمريين وبس، ليه يتشتتو بين عربي وأفريقي ومالاوي؟

وكل بلاد الدنيا أصلا جالها ناس من براها، فعلى أي أساس تتنسب ليهم؟

التفكير من نوعية نسب البلد وهويتها لناس جولها من برة، وخصوصا لما يبقى النسب عرقي، مش بس نسب ثقافي، تفكير احتلال، يدل على إن اللي بيفكروه معتبرين نفسهم هما الغالبين والشعب بتاع البلد هما المغلوبين، والبلد دي بالنسبة ليهم غنيمة حرب مش وطن حقيقي مالوش شريك.

بالنسبة للرئيس السيسي، لحد دلوقت ما شفناهوش ناسب نفسه عرقيا لحد أجنبي، إلا إنه إدى امتيازات وتشجيع كبير للي نسبو نفسهم لأعراق أجنبية، وخصوصا البدو العرب.

فنلاقيه عمل اتحاد القبايل العربية، لم فيه كل فروع القبايل الدخيلة اللي جاي من برة، واللي ناسبة نفسها عرقيا لجزيرة العرب، وبقى كمان هو الرئيس الشرفي للاتحاد، وطلق إيدهم في البلد، فعملو إمبراطورية اقتصادية في وقت قصير، وبيكوشو شوية بشوية على سينا، وبينشرو البدونة في كل حتة في مصر.

كمان السيسي عمل امتيازات كبيرة لبلاد الخليج في مصر، سوا في اللي يخص عمل قوانين تسمح بتجنيس البدون بتوع الخليج، زي قانون بيع الجنسية المصرية قصاد استثمار اللي طلع سنة 2018، أو قانون اللاجئين بتاع سنة 2024، أو بيع الجنسية للعرب عموما، واستثمارات فوق أراضي واسعة زي راس الحكمة، وشرا أصول وشركات البلد إلخ.

مؤتمر تأسيس اتحاد القبايل العربية برعاية السيسي 1-5-2024

♦ التقليل من الشعب قصاد العالم بكلمة "إنتو فقرا قوي"

الرئيس سامبي من كلامه الأساسي مع وسايل الإعلام الأجنبية، خصوصا العربية، زي مقابلته مع برنامج "مباشر" في قناة الجزيرة القطرية مارس 2009  قال إن بلده فقيرة جدا وميزانيتها 50 مليون دولار بس، ما تساويش ميزانية نادي رياضي، وقال لقناة العربية في 21-1-2011 : "جزر القمر كما أحاول دائما أن أوضح صورتها، دولة تعيش تحت خط الفقر، ولعلها أفقر دولة عربية"، وإن "الشعب القمري شعب مسكين يعيش فقرا مدقعا"، زي ما نشرت القناة في موقعها تحت عنوان "رئيس جزر القمر: لست شيعياً.. ووجود طهران في بلادنا يقتصر على العمل الخيري".

وكان بيقول ده وهو بيطلب من بلاد الخليج تعمل استثمارات في بلده، مع إنه كان ممكن يطلب الاستثمارات بشكل أكرم لشعبه، وهو يقول إن بلده فيها فرص استثمارية هتستفيد منها أي بلد تعمل استثمارات، من غير ما يدي فرصة للبلاد الأجنبية تتعامل مع بلده على إنها بتعمل جميل فيها لما تيجي تستثمر، وتطلب منه امتيازات ضد كرامة البلد.

والسيسي دايما برضو يتكلم عن إن مصر فقيرة جدا، لدرجة العوز، فإدى فرصة للشعوب اللي حوالينا، ولأول مرة في تاريخنا، تتنطط على كتافنا وهي بتوصفنا إننا "شحاتين"، ويعتبرو إن الاستثمارات بتاعة بلادهم في مصر، اللي بلادهم بتكسب منها أكتر من مصر، اعتبروها صدقات منهم على مصر.

وأخدت حكومة الهكسوس وإعلامها وبرلمانها ورجال الأعمال الحيتان فيها كلمة "إنتو فقرا قوي" حجة يحاولو بيها يخلونا نسكت قصاد بيع الجنسية المصرية والأرض والأصول المصرية، بحجة "محتاجين فلوس".

كلمة للسيسي نشرتها قناة "دي إم سي" في 21-1-2017 بعنوان: "إنفعال الرئيس السيسي.. احنا فقرا اوى أسمع الكلام مش مطلوب تعيشوا| ماذا يقصد الرئيس بتصريحاته القوية؟".

♦ تلميع الرئيس بنصرة قضية أجنبية (رفض التهجير والتطبيع)

ضمن حجج الناس اللي بتدافع عن الرئيس سامبي، إنه كان بيرفض التطبيع مع إسرائيل، وكان بيدافع عن فلسطين، وإنه اتظلم بسبب ده، زي ما جه في كلام مؤتمر التحالف العالمي من أجل المقاومة.

وضمن حجج الناس اللي بتدافع عن الرئيس السيسي إنه بيقولو إنه "خلص مصر من حكم الإخوان المسلمين"، وإنه "رفض تهجير الفلسطينيين".

والججج دي مش راكبين على اللي عمله السيسي وسامبي، فإن كان فعلا سامبي ضد الاحتلال الإسرائيلي لفلسطين فالأولى إنه مكنش يسمح بتوزيع جنسية بلده وتتباع للبدون وغيرهم، خصوصا إنه عارف إن ده يديهم حقوق في جزر القمر تلهف حقوق ولاد البلد، تمام زي ما اليهود بصفة لاجئين وبالتوطين لهفو حقوق الفلسطينيين.

وبالنسبة للسيسي فهو وقف ضد حكم الإخوان المسلمين لكن بعدها فتح البلد لملايين من اللاجئين أكترهم فكرهم مليشياوي زيهم زي الإخوان، وفي كتير منهم فعلا إخوان، وكمان فتح البلد لدخول طوفان من الفلسطينيين لمصر، وكل دول ممكن يعملو في مصر زي ما عمل اليهود في فلسطين.

يعني اللي بيطرمخو على بيع السيسي وسامبي لجنسية بلدهم بيقولو إنهم بيحمو هوية وحقوق الفلسطينيين، وكأنه ده يديهم شرعية في نفس الوقت اللي بيضيعو هوية وحقوق ولاد بلدهم، تمام زي اللي يدخَّل النار لبيته تحرق عياله وفي نفس الوقت يروح يطفي نار جيرانه وعايز الناس كمان تقول عليه ده بطل.

♦ الاتنين رؤسا ليهم جاه

من الشبه بين الاتنين برضو، إنهم رؤسا ليهم جاه، وحالتهم المادية مستريحة، ومفيش سبب مادي يخليهم يبيعو جنسية بلدهم ويخاطرو بسمعتهم إنه يتكتب في تاريخهم إنهم باعو جنسية بلدهم.

 فأكيد اللي خلاهم يعملو ده مكنش بس الفلوس، لكن إن البلد مش في اعتبارهم أصلا، مش شايفينها الوطن المقدس اللي شغلتهم يحموه، لكن شايفينها غنيمة أو قربان للتيارات الدينية والسياسية اللي هما تبعها، أو للبلاد الأجنبية اللي ناسبين نفسهم ليها أو لهويتها الأجنبية، يعني في الآخر بيتعاملو معاها معاملة الغالب اللي بيحكم مغلوب.

● إيه غلطات عملها السيسي ما عملهاش رؤسا جزر القمر؟

زي ما شفنا في الحلقة اللي فاتت، إن وكيل وزارة الداخلية المساعد لشؤون الجنسية والجوازات والإقامة الكويتي، اللوا الشيخ مازن الجراح، قال سنة 2014 لجرنان "الجريدة" الكويتي تحت عنوان: "الجراح لـ"الجريدة": البدون إلى جزر القمر" إن جزر القمر حطت شروط قصاد إنها تدي جنسيتها للبدون بتوع الكويت، هي إيه؟

♦ البدون اللي ياخدو الجنسية يقعدو في الكويت ما يروحوش جزر القمر.

♦ الحالة الوحيدة اللي تروح جزر القمر لو حد عمل جريمة وصدر حكم من القضاء بالإبعاد عن الكويت، وحتى في الحالة دي الكويت متكفلة تصرف عليه تعليم وصحة وخدمات إلخ وهو في جزر القمر.

♦ اللي هياخد جواز السفر القمري في الأول هيبقى اسمه، لكن الجنسية الأصلية ياخدوها عياله.

♦ الكويت تعمل مدارس ومستشفيات في جزر القمر، وتعمل فرع لبيت الزكاة الكويتي هناك.

هنا معناه إنه حكومة جزر القمر حمت نفسها من إن البدون يروحو عندها وينافسو ولاد البلد في الأرض والسكن والتعليم والعلاج والشغل إلخ، وحمت السكان من إن كتلة بهوية غريبة تدخل عليهم، فرغم هيبقى معاهم الجنسية القمرية لكن يفضلو في الكويت.

ومعناه إنه ما بقتش تصرف على المجنسين من جيب الشعب، لا، هما هيقعدو في الكويت وهتصرف عليهم الكويت، وحتى لو حد فيهم اترحل بسبب حكم قضائي لجزر القمر برضو تصرف عليه الكويت.

وإن كان طبعا في ثغرة هنا، وهي إنه ما يروحش جزر القمر إلا اللي يتحاكم بجريمة وياخد حكم بإبعاد قضائي، لأن ممكن الكويت تستغل ده وتحاكم البدون بحجة قاعدين بشكل مش شرعي وتبعد عدد كبير منهم لجزر لقمر، أو إنه الكويت ترجع في كلامها وترحلهم كلهم على جزر القمر بحجة إنهم مهاجرين غير شرعيين.

أما السيسي اللي عمله:

♦ فتح البلد سداح قصاد اللاجئين من كل الأجناس والأصناف، بما فيهم البدون، حتى من غير ما ياخدو الجنسية المصرية، تحت اسم طالب لجوء ولاجئ.

♦ حطلهم مواد تسمح بتجنيسهم في قانون بيع الجنسية قصاد استثمار وقانون اللاجئين، بفلوس ومن غير فلوس.

♦ كل اللي هياخد الجنسية المصرية هتبقى جنسية أصلية بداية من المجنس مش بس بداية من أولاده، وكله اتعمله "حق" يقعد في مصر.

♦ اللي هيصرف على الملايين دول هما المصريين، سوا وهما لسة طالبين لجوء وغزاة داخلين بشكل مش شرعي، أو بشكل لاجئين، أو لما يبقو مجنسين، سوا من ميزانية الدولة أو من التبرعات المصرية والأجنبية، وفوق ده في قانون اللاجئين، اتعملت مادة مخصوصة للصرف على اللاجئين، هي المادة (5)، ضمنها إنه الحكومة تجيب قروض تصرفها على اللجنة الدايمة اللي بترعى اللاجئين.

وسبق وقال محمد الحمصاني المتحدث باسم مجلس الوزرا، في سنة 2024، وقال إن الحكومة بتصرف على اللاجئين كل سنة 10 مليار دولار، حسب ما نشره جرنان "المصري اليوم" بعنوان "10 مليارات دولار سنويًا.. الحكومة تكشف تفاصيل تكلفة اللاجئين في مصر".

فإن كان سامبي وهو عمل في بلده وجنسية بلده أقل بكتير من اللي عمله السيسي اتحاكم بتهمة الخيانة العظمى، فالمسئولين والنواب ورجال الأعمال والمحامين والإعلاميين وووو اللي باعو الجنسية المصرية وبشكل أرخص ألف مرة من طريقة جزر القمر، وبشكل ضيع كل حقوق المصريين في بلدهم، يتحاكمو المفروض بتهمة إيه؟

ولا ممكن يراجعو نفسهم ويفوقو ويلغو قوانين بيع مصر دي بنفسهم ويكفرو عن اللي عملوه؟

وربنا ينور بصيرة الجميع

ومصر للمصريين، المصريين الحقيقيين، مش المصريين بروقة الجنسية، لكن عقولهم وقلوبهم مع بلاد وتيارات أجنبية.

 

 

 

تصنيف : أثر الهكسوس على هوية مصر,أعداء الهوية المصرية,عين الفلاح,هكسوس العصر