القاهرة- إفتكار السيد (نفرتاري أحمس)
المقالة بتتكلم عن إنه حدف
مشكلة البدون على مصر ما بدأش سننة 2024، وقت ما اتفصل القانون، لكن على الأقل
بدأ 2014، أو اتعلن 2014، ويمكن بيتحضرلها من قبل كدة بسنين.
وهنشوف مين اللي اقترح تجنيس البدون وتوطينهم في مصر، وإيه مصلحته.
والمقالة هتتكلم كمان عن مين
هما البدون، وإيه الصداع اللي عاملينه في الخليج، وإزاي اتحركت الكويت والإمارات
عشان تخلص من مشكلة البدون، وإيه دور دولة جزر القمر والجُرسة اللي حصلت فيها بسبب
اتفاقيات بيع الجنسية القُمرية للبدون اللي ضربت سمعة رئيسين ليها، وحدفت واحد فيهم في السجن بتهمة الخيانة العظمى؟
وإيه دور الشركات العابرة
للحدود في تبني تسهيل بيع الجنسية المصرية للبدون وغيرهم.
● مين هما البدون؟
● إيه الصداع
اللي عامله البدون في الخليج؟
● إزاي
الكويت والإمارات بيخلصو من صداع البدون؟
● حدف البدون
والمجرمين على مصر
● توطين
البدون في مصر بقانون اللاجئين
● شركات
أجنبية متخصصة لتوطين الأجانب في مصر
● الخلاصة
● مين هما
البدون؟
البدون، جاية من كلمة "بدون
جنسية"، وهما جماعات ما مشيتش عليهم شروط منح الجنسية في البلاد اللي هما
فيها، إما لأنهم من البدو الرحل، أو لأنه، حسب ما بيتقال في الكويت والإمارات
مثلا، إنهم أجانب جم بعد الطفرة بتاعة البترول، وقطعو الأوراق بتاعتهم، عشان ياخدو
جنسية البلاد دي ويستفيدو من فلوس البترول.
أشهر بدون في المنطقة هما البدون اللي في
جزيرة العرب، وموجودين في الكويت والسعودية والإمارات وقطر، وأكتر عدد ليهم في
الكويت، حوالي 110 ألف حسب تقديرات منظمات حقوقية وتقارير إعلامية، وإن كان
الحكومة بتقول أعداد أقل.
هما ليهم عشرات السنين في الكويت، وأجيال
اتولدو فيها، وكتير منهم تبع قبايل معروفة زي شمر وتميم، بس الحكومة رافضة تدي
أكترهم الجنسية للأسباب اللي فاتت، كمان في مخاوف في الكويت على تركيبة السكان،
لأن منهم ناس أصلها من إيران، أو أصلها من العراق، والبلدين خطر على أمن الكويت.
وهما في الكويت رسميا بيتسمو
"المقيمين بصورة غير قانونية"، ومالهومش حقوق في التعليم ولا التوظيف، ولو
أخدو خدمات في التعليم والصحة بيبقى حاجة من الدولة كدة، لكن مش إلزام ولا حقوق
رسمية ليهم، وحتى بيلاقو مشاكل أوقات في إنهم يطلعو شهادات الميلاد والجواز
والوفاة إلخ.
وكان تقرير مثلا لقناة سكاي نيوز عربية في
12-10-2013 بعنوان "إشكالية البدون في الكويت" بيوري إزاي حتى مستوى الأماكن
اللي عايش فيها البدون مختلف عن اللي ساكن فيها الكويتيين، ويبين إن البدون مش
بياخدو نفس الخدمات والمزايا.
 |
| السماح للبدون بالخدمات زي التعليم أو المنع حسب إرادة الحكومة مش حقوق رسمية زي المواطنين (مصدر الخبر) |
● إيه الصداع اللي عامله البدون في الخليج؟
البدون عاملين صداع للكويت والإمارات
وغيرهم، خصوصا من بعد ما بدأو يعملو مظاهرات يطالبو بأخد الجنسية، وبقى في جمعيات
حقوق إنسان بتتبنى قضيتهم، وبقى في خلافات بين الحكومة والبرلمان وبين الكويتيين عموما حوالين مشكلتهم، وفي بلاد أجنبية بقت تاخد موضوع البدون وسيلة تتدخل بيها
في شئون الدول اللي هما فيها.
ومن بعد 2011، بقى البدون في الكويت يعملو
احتجاجات كبيرة، فبخلاف المظاهرات والاعتصامات، كذا مرة شباب من البدون ينتحرو،
إما بالحرق أو برمي نفسهم من فوق أو بشنق نفسهم، زي ما حصل كذا مرة في 2021 و2022،
عشان يقولو إن الحياة ما بقتش تتطاق بسبب التضييق عليهم الكويت.
 |
| حادثة الحرق كانت في 2021 واتكررت بعدها كذا مرة (مصدر الخبر) |
● إزاي
الكويت والإمارات بيخلصو من صداع البدون؟
الكويت
والإمارات في حالات قليلة بيدو البدون الجنسية، لكن الأساس عندهم هو رمي حمل
ومسؤولية البدون على بلاد تانية، إزاي؟
ده بيحصل
بطريقتين:
1- التطفيش،
يعني من وقت للتاني يضيق عليهم في التعليم والعلاج والسكن والمعاملات ومالهومش دعم ولا تموين
إلخ، فيضطر يطفش لأي بلد تانية.
2- الاتفاق مع دول تانية تديهم الجنسية بتاعتها.
الطريقة
الأولانية، جابت نتيجة شوية مع الكويت مثلا، فحسب تقارير كان عدد البدون 400
ألف، بعدين بقى 200 ألف، نزل بشكل شديد بعد الغزو العراقي للكويت بقى 100 ألف،
وبيتفسر السبب في الهبطة الكبيرة دي إنه كان في اتهامات للبدون إن منهم ناس وقفو
مع العراق ضد الكويت، مع إنه برضو في بدون اشتركو مع الجيش الكويتي في الحرب ضد
العراق.
بس الطريقة دي
بطيئة، وبرضو حتى لو قعد 10 ولا 5 تلاف من البدون برضو هيبقو عاملين صداع
بالمظاهرات والاحتجاجات بتاعتهم قصاد العالم.
فبدأ الكويت
والإمارات يمشو بسرعة في الطريق التاني، وهو شرا جوازات سفر وجنسيات للبدون من
بلاد تانية.
ففي 2008 عملت دولة جزر القمر قانون اسمه "المواطنة الاقتصادية"، وهو إنه تدي الجنسية بتاعتها قصاد استثمارات.
القانون مكنش برئ، واللي حصل بعدين يدي إشارة لإن القانون
اتعمل مخصوص مش عشان مصلحة جزر القمر، ولا عشان ينفعو البلد بالاستثمار، لكن عشان
يحلو بيه مشكلة البدون في الخليج، وكمان يبيعو الجنسية لناس هربانة من عقوبات أو
جرايم، زي ما هنشوف.
ففي نفس السنة،
2008، حصل اتفاق بين الإمارات وجزر القمر، على إنه جزر القمر تدي الجنسية بتاعتها
لآلاف من البدون اللي في الإمارات، قصاد الإمارات تعمل استثمارات أو تقدم دعم لاقتصاد
جزر القمر.
طيب إيه رأي
البدون نفسهم؟
الإمارات بقت تغري
البدون إنهم يوافقو ياخدو جنسية جزر القمر بإنه لو أخدوها، فده ممكن يبقى سكة ليهم
ياخدو جنسية الإمارات، لأنه صعب ياخدو الجنسية الإماراتية وهما محسوبين بدون،
مالهومش بلد أو أساس.
وفعلا في واحد
من البدون اسمه حسن عبد الرحمن أخد الجنسية الإماراتية بعد ما أخد جنسية جزر
القمر، وحسب موقع "الإمارات اليوم" في 2008 في تقرير "البدون يوفقون أوضاعهم" فبعد ما وزير الداخلية سيف
بن زايد آل نهيان علن ده، جرى آلاف من البدون يقدمو على جنسية جزر القمر، بعشم
تبقى طريقهم لجنسية الإمارات اللي عايشين فيها.
وحسب اللي نشره موقع قناة "فرانس 24" في تقرير البدون "رئيس جزر القمر قيد الإقامة الجبرية في قضية بيع جوازات لفئة "البدون"" فالاتفاق المبدئي إنه جزر القمر تدي جنسيتها لـ 4 تلاف أسرة، قصاد تاخد 200 مليون دولار لمشاريع النبية التحتية.
وإنه فعلا صدر 48 ألف جواز سفر، منهم 6 تلاف "خارج القنوات
القانونية" بمبلغ ما بين 25 ألف و 200 ألف دولار للجواز الواحد، أكترها
اتسرق، وإن البلد خسرت 971 مليون دولار، يعني اللي يساوي 80% من الناتج المحلي
بتاعها، حسب تقرير لبرلمان جزر القمر.
وهنا نفتكر إزاي
إنه في مصر المدخل اللي دخلوه لينا عشان يبررو بيع الجنسية المصرية، أقدم وأغلى
جنسية اندفع فيها كل غالي، وهو برضو مدخل بيع الجنسية باسم تشجيع الاستثمار ورفع
الاقتصاد، وإزاي إنه من ساعة القانون الإسود ده اللي طلع سنة 2018 في مصر، والبلد
اقتصادها في النازل، وأكتر أهلها بيطفحو الكوتة ويكحو تراب.
بالنسبة للكويت، وهي اللي فيها العكمة الأكتر من
البدون، وكيل وزارة الداخلية المساعد لشؤون الجنسية والجوازات والإقامة، اللوا
الشيخ مازن الجراح، قال سنة 2014 لجرنان "الجريدة" الكويتي إنه الحكومة
هتوزع على البدون استمارات طلب الحصول على الجنسية الاقتصادية من جزر القمر.
وقال إن اللي
هيوافق منهم إنه ياخد الجنسية القمرية الكويت هتديه مزايا، منها يبقى ليهم حق
الإقامة، ومجانية التعليم والصحة والتوظيف، وإن الأب هياخد اللي هيتسمى جواز
وجنسية اقتصادية، أو "إثباتات اقتصادية" لكن عياله هياخدو الجنسية
القمرية الأصلية.
كمان كان صريح
لما اتكلم عن الطلبات اللي طلبتها جزر القمر قصاد تدي جنسيتها لبدون الكويت، وهو
إنه الكويت تبني هناك مدارس ومساكن ومعاهد، وتفتح فرع لبيت الزكاة الكويتي، وإن
الكويت هي اللي تصرف على تعليم وعلاج وتشغيل إلخ البدون سوا جوة الكويت أو جوة جزر
القمر.
وفوق ده، جزر
القمر شرطت، إن البدون يفضلو في الكويت، وما يروحش منهم لجزر القمر إلا اللي يطلع
ضده حكم من المحكمة بالإبعاد عن الكويت بسبب جريمة عملها، وده لما يوصل جزر القمر
تصرف عليه برضو الكويت.
 |
| قراية الخبر كامل من المصدر |
الموضوع اتكتم عليه شوية في الكويت، خصوصا لقى معارضة جوة البرلمان، لحد ما طلعت جزر القمر نفسها تتكلم عنه، في سنة 2016.
فقال وزير
الخارجية القمري، عبد الكريم محمد، لجرنان "الأنباء" الكويتي، حسب ما نقل تقرير "فرانس 24" بعنوان "جزر القمر تبدي استعدادها لمنح جنسيتها لـ"البدون" الكويتيين" بتاريخ
16-5-2016 في رد على سؤال لو بلده مستعدة تدي جنسيتها للبدون، قال: "نعم إنه
إجراء مستعدون للقيام به في حال ما طُلب منا ذلك من الحكومة الكويتية رسميا".
لكن الموضوع
مكنش بالبساطة دي، لأنه الموضوع اتحول في جزر القمر لجرسة كبيرة للحكومة؛ لأنه
اكتشفو إنه رئيسين من رؤسا البلد، هما أحمد عبد الله سامبي (حكم من 2006-2011) وإكليل ظنين (حكم من
2011-2016)، باعو الجنسية لآلاف من البدون بتوع الإمارات، وكمان الجنسية خدها
إيرانيين عليهم عقوبات، وكمان الفلوس ما راحتش لخزنة الدولة لدعم الاقتصاد، لكن
راحت في الهوا، يعني اتشفطت في الجيوب.
بعدها وقَّف
رئيس جزر القمر، غزالي عثماني، اللي مسك سنة 2016، برنامج منح الجنسية بتاعة جزر
القمر مقابل الاستثمار، واتحاكم رئيس جزر القمر بتهمة الخيانة العظمى، وطار مشروع
تجنيس البدون عن طريق جزر القمر.
وناخد بالنا إنه
قانون بيع الجنسية في مصر اتعمل في مصر في وقت اتلغى في جزر القمر!
 |
| تفاصيل الخبر من المصدر |
● حدف البدون
والمجرمين على مصر
نيجي بقى للكوم
الكبير، وهو خطة حدف البدون على مصر.
أول مرة نتخبط على
راسنا بخبر إنه في مشروع لبيع الجنسية المصرية كان في وسايل الإعلام في مصر
والكويت سنة 2014، وفي نفس الخبر كانت خبطة تانية وهي إنه القانون ده معمول لبيع
الجنسية للاجئين اللي في مصر، والمستثمرين، والبدون.
إيه بقى جه في الإعلام
ساعتها، ومين اللي اقترح الاقتراح الغدار ده؟
حسب تقرير نشره موقع "المصري اليوم" بتاريخ 14-8-2014 بعنوان "صحيفة كويتية: مصر تدرس منح الجنسية لـ"بدون الخليج" مقابل ودائع تبدأ بـ 250 ألف دولار" والليب يقول إنه نقل المعلومات عن جرنان "الراي" الكويتي، فمجلس الوزرا بيدرس اقتراح بعمل صندوق استثمار، فلوسه تيجي من منح الجنسية المصرية لعرب وأجانب، بينهم البدون اللي في الخليج.
وإن راجل الأعمال
محمد سامح صدقي، رئيس الاتحاد العربي للاستثمار المباشر، هو صاحب اقتراح بيع
الجنسية المصرية، وما رضيش يسميه "بيع الجنسية"، طبعا عشان عارف حساسية
الكلمة عندنا، فراح ورنشها بشوية بوية مغشوشة وقال إنه "حافز استثماري لجذب
الاستثمارات الأجنبية".
ونقل عن سامح
صدقي ده إنه اللي سماه "برنامج منح الجنسية" هيكون قصاد إن الأجنبي يحط
وديعة في البنك بقيمة ما بين 500-700 ألف دولار، أو يدفع مبلغ 250 ألف دولار ما
يتردش. يعني بيع رسمي.
وإن الجنسية
هتتقدم لـ 3 فئات، هما حسب كلامه:
1- المقيمين في
مصر، وعددهم 3.2 مليون شخص (تقديرات 2014 وهي أقل من الحقيقة ومقصود أكترهم اللي دخلو باسم لاجئين وهربانين من أزمات بلادهم إلخ)
2- المستثمرين
العرب والأجانب، وخصوصا اللي عندهم شركات بتصدر منتجاتها لمصر وأفريقيا.
3- فئة البدون،
وهما مئات الآلاف في الخليج.
وطبعا هو هنا
بيكدب نفسه بنفسه، ففي الوقت اللي هو بيبرر إن ده عشان يساعد الاقتصاد في مصر،
واللي الحكومة بتقول إن من أسباب أزمة الاقتصاد زيادة السكان، فهو قصاد شوية فلوس
عايز يبلي مصر بملايين المجنسين، بما فيهم المجرمين والبدو الرحل وكل أنواع البدون
واللاجئين إلخ، يعني برضو زيادة سكان.
وفوق ده قال إن المجنسين هيبقى ليهم حقوق المواطنة الكاملة،
و"المنافسة على جميع المشروعات القومية"، وإنهم يخلصو من أي عقبات كانت
بتبقى في تصريح الإقامة "بسبب خلافات سياسية".
معناها فتح البلد، عن قصد، للمجنسين ينافسو المصريين حتى في المشروعات
القومية مش بس المشروعات الخاصة، وإنه يدخل ناس بينا وبينهم خلافات سياسية شديدة
لدرجة كانت تمنع ياخدو إقامة زمان، يعني مفيش أي اعتبار للأمن القومي والأمن العام
للبلد نهائيا.
 |
| التفاصيل في مصدر الخبر |
الكلام ده كنت من
الناس اللي تابعوه أول ما نزل في جرنان المصري اليوم في 2014، وبقينا نكتب نعترض على الكلام ده، وكان فايح فيه ريحة إنه جهات في الخليج ممكن تكون زاقة سامح صدقي يعرض القانون ده.
وإن كان أكتر
الناس كانت بتقول، لا لا لا يمكن يحصل، مين ده يتجرأ ويخلي الجنسية المصرية للبيع؟
بس كان فينا ناس
حاسة إنه مدام اتجرأو وبيناقشوه في الإعلام أصلا، يبقى الموضوع مش بعيد، ويا خسارة
فعلا بعد ما الحكومة قعدت تنكر وتلف وتدور، القانون بتاع بيع الجنسية اتعمل زي ما
اقترحه محمد سامح صدقي، وكمان بتسهيلات أكتر للأجانب.
ولما اتعمل القانون وبصم عليه البرلمان في 2017 وبعده رئيس الجمهورية عبد
الفتاح السيسي سنة 2018، وقريناه وفصصناه، مالقيناش فيه أي استثنا لأي جنسية في
الدنيا ولا لأي فئة في الدنيا من إنها تاخد الجنسية المصرية، يعني بقى واضح إنها
مفتوحة للبدون والغجر وأي حد.
وحتى الكلام اللي اتقال بتاع إنه طلبات الجنسية هيبقى فيه فحص وتمحيص،
والأجنبي مش هياخد الجنسية غير لما أجهزة الأمن تجيب قراره، هو كلام كليشن كان،
لأن اللي خايفين بجد على أمن البلد، مش هيعملو قانون زي ده أصلا، ولا هيفتحو
حدودها سداح يدخل منها على المصريين ملايين البشر، وأجهزة الدولة عارفة كويسة إنهم
مليانين مجرمين ومليشيات، ودخلو من غير فحص ولا تمحيص.
 |
| تفاصيل تصديق السيسي على قانون بيع الجنسية المصرية في مصدر الخبر |
● توطين البدون في مصر بقانون اللاجئين
لما اتعمل بقى قانون اللاجئين سنة 2024، اللي اتكلمنا عنه في مقالة "السيسي يحذر
من الخلايا النايمة وينشرها في البلد بقانون اللاجئين (شرح القانون)" لقيناه
في أول مادة من مواده، لاطع قصادنا بكل قلة حيا وقلة أمانة، إنه ضمن تعريف صفة
اللاجئ اللي الحكومة هتديها للي بيطلبو اللجوء، إنه يكون من "عديمي
الجنسية"، يعني من البدون.
وفي المادة 27، اتكلم القانون عن إنه اللاجئ من حقه يقدم على إنه ياخد
الجنسية المصرية.
طبعا هياخدها إزاي؟ هياخدها بعشرومية طريقة، وأكترها كمان بلوشي، ومنها:
1- بقلوس، عن طريق شرا الجنسية على أساس قانون بيعها قصاد وديعة أو استثمار
أو شرا عقار.
2- ببلاش، بقانون إن الأجنبية لو اتجوزت مصري ليها تقدم على الجنسية، أولاد
الأجنبي من الزوجة المصرية، اللي يقيم في مصر 10 سنين متواصلة، إلخ.
يعني الواحد من البدون اللي عاش عيشة المطاريد في الكويت والإمارات والسعودية
إلخ، ولا نفعته فلوسه ولا نفعه إنه عاش وعياله هناك أجيال، هييجي مصر يشتري
الجنسية المصرية العظيمة، وبعدين ببلاش يديها لمراته البدون (على أساس بقى اسمه
زوج مصري ومراته ليها تاخد الجنسية)، ولو مخلف عيال تتنقل ليهم الجنسية منه ببلاش،
والواحدة البدون تتجوز مصري وتاخد على حسه الجنسية، وممكن تتطلق منه وتتتجوز بدون
زيها وتخلف وتنقل لعيالها الجنسية وهكذا.
يعني في الآخر، الاسم واحد خد الجنسية، لكن بعد كدة هيوزعها على القبيلة
والقبيلة توزعها على القبيلة اللي جنبها والقبيلة اللي في البلاد التانية وهكذا.
واستقبال وتوطين وتجنيس البدون مش هيقف كمان على اللي في الخليج بس، لكن من أي مكان في الدنيا.
● شركات
أجنبية متخصصة لتوطين الأجانب في مصر
نيجي هنا، لملحوظة مهمة نطت في وشي وأنا بعمل بحث عن مين بيدي الجنسية
للبدو.
وهي إنه لقيت إن في شركة متخصصة في تسهيل تجنيس البدون في مصر، اسمها شركة MTL وهي من الشركات اللي متخصصة في تشجيع
الهجرة، وتجنيس الأجانب، في العالم، مش في مصر بس، وتسهيل أي مشكلة قصاد اللي عايز
ياخد الجنسية.
بالنسبة لمصر، لقيتها قايلة إن مصر ضمن 4 دول بس، نركز في إنهم 4 دول بس،
سهل فيهم إنه البدون ياخدو الجنسية، خصوصا إن الطبيعي في كل بلاد الدنيا، إنه مش
بياخد الجنسية إلا اللي أصلا عنده جنسية أصلية، عشان البلد تبقى عارفة هو مين وجاي
منين، عدا 4 بلاد بتدي جنسيتها لناس جايين من براها، ومش معاهم أي جنسية.
البلاد الأربعة هما، بلدين مالهومش ذكر على الساحة، جزر صغننة، أنا عن نفسي
أول مرة أسمع عنهم، واحدة اسمها جزر ناورو في المحيط الهادي نواحي أستراليا،
والتانية اسمها ساو تومي وبرينسيبي في خليجي غينيا في غرب أفريقيا نواحي المحيط الأطلنطي،
يعني حاجات كدة في النسيان.
أما البلدين التانيين فهما تركيا، ويا خسارة مصر.
طبعا ما جابوش سيرة جزر القمر، لأن هي نضفت نفسها من العار ده من سنة 2018
على الأقل.
والشركة بتقول إن ضمن شغلها هو تسهيل الإجراءات والأوراق إلخ عشان البدون
وغيرهم ياخدو الجنسية في مصر وغيرها.
الموضوع مدام وصل كمان إنه يبقى بلغة الاقتصاد "بزنس أجنبي"، أو بالبلدي
سبوبة دولية، وداخل فيها شركات أجنبية، فده معناه إنه الموضوع ماشي في مصر، يعني
أكيد في ناس من البدون بتاخد الجنسية، أوعلى الأقل هياخدوها.
كمان معناه إن الموضوع مش حكاية تشجيع الاستثمار الأجنبي، لكن الحكاية داخل
فيها مصالح أجنبية من كل نوع، ففي بلاد بتخلص من مشاكله مع البدون، زي الكويت والإمارات وقطر والسعودية إلخ على حساب
المصريين، وفي ناس وشركات بياخدو التجنيس ده سكة يطلعو بعكمة فلوس على حساب
المصريين، وناس وبلاد واخدة التجنيس سكة للبعد الشر، تصفية مصر من أساسها.
 |
| صفحة من صفحات شركة NTL لتسويق بيع الجنسية المصرية وغيرها للبدون |
● الخلاصة
من سنة 2014، على الأقل، وكل القوانين بتاعة توزيع الجنسية بتتعمل في مصر
على أساس اقتراحات من بلاد أجنبية أو رجال أعمال وناس علاقاتها الأساسية ومصالحها
الأساسية متركزة في إيدين أجنبية.
والقوانين والقرارات دي بتتعمل عشان تخدم على بعضها، ولحل مشاكل البلاد
التانية، وكربسة مصر بالمشاكل.
وبيتغطى على الجريمة والخيانة دي بكلمة "تشجيع الاستثمار"،
"جمع دولار لخزينة الدولة"، "خلق فرص عمل".
وكل ده أقل حاجة يترد بيها على اللي عملو الجرايم دي هي المحاكمة بتهمة
"الخيانة العظمى"، ومدام بيحبو يقلدو البلاد الأجنبية عمال على بطال،
فيقلدو بقى جزر القمر لما حاكمت رئيسها بتهمة الخيانة العظمى لأسباب منها البلاوي
اللي اتسبب فيها قانون بيع الجنسية هناك.
وربنا ينور بصيرة الجميع
ومصر للمصريين، المصريين الحقيقيين، مش المصريين اللي بروقة الجنسية، لكن
قلوبهم وعقولهم مع بلاد وتنظيمات أجنبية.
القاهرة 1 بؤونة، الموافق 8-6-2026
0 التعليقات:
إرسال تعليق