"حزام النار".. إيه بيعمل الهكسوس الجداد على حدود الدولة وحوالين المحافظات؟ وإيه دور البدو وعصابة حسن البنا والسلفجية واللي مسيطرين على الحكم في البلد في تسكينهم عند بوابات البلد؟

مثال لانتشار الهكسوس الجداد على حدود مصر وحوالين المحافظات... حزام النار (مدونة كيمة والهكسوس)

في الجزء الأولاني اللي بعنوان: " الشبه بين البدو وعصابة حسن البنا (ج1).. اتحاد القبايل" من سلسلة الكلام عن إيه اللي بيخلينا نقول إن تنظيمات البدو ما تختلفش عن التنظيم الدولي لحسن البنا (الإخوان المسلمين)،اتكلمنا عن اتفاقهم في تشكيل تنظيمات دولية مش بتعترف بالحدود الوطنية، وانتماءها للقبيلة أو الجماعة مش للدولة والشعب اللي عايشين وسطيه، رغم إن القبيلة أو الجماعة دول كمان منتشرين على كذا دولة، يعني الاتنين شايفين إن أخوهم في القبيلة أو الجماعة حتى لو أجنبي عن البلد، مش إن أخوهم بس هو ابن البلد اللي مستوطنين فيها، وعاملين فيها إنهم مواطنين.

واتكلمنا عن مثال من أمثلة اتحادات البدو اللي نطت في وشنا في السنين الأخرانية، وهو اللي بيتسمى "الاتحاد العام للقبايل المصرية والعربية"، مش اللي بيرأسه إبراهيم العرجاني، لكن واحد تاني رئيسه اسمه فوزي فاضل، وخططه، اللي اتكلمت عليها لوايح تأسيس الاتحاد، وبان لينا منها إنه نتيجتها هيتحط البدو فوق المصريين في كل مجال من مجالات الشغل والحياة عموما، وعمل بدونة لمصر في ثقافتها، وتقديمها للعالم برة، وحتى للمصريين نفسهم، على إنها بلد بدوية وتراثها بدوي.

وإزاي عملت تنظيمات البدو دي اختراقات شديدة جوة كل مؤسسات الدولة، بما فيها الجيش والداخلية، لدرجة إنه قيادات المؤسسات دي بيبقو أعضاء فيها، يعني تحت سيطرة القبيلة الفلانية، حتى لو القبيلة دي شيخها مثلا أجنبي برة مصر، لأننا عارفين إن مصر في أصلها مش بلد قبايل، وكل البدو في مصر هما فروع لقبايل أجنبية، وحتى لو ليها شيخ في مصر، لكن بيبقى ليها انتماء لشيوخ القبايل الرئيسية في جزيرة العرب ولا ليبيا ولا المغرب إلخ.

وده برضو تمام زي ما أي حد ينتمي لعصابة حسن البنا، ويبقى، حتى لو كان وزير ولا رئيس دولة، تابع وخاضع للتنظيم بتاع العصابة والقادة بتوعها سوا كانو من البلد اللي هو فيها ولا أجانب.

كمان رصدنا الخطر الكبير من تسليم الحدود للبدو، وتقديمهم على إنهم "حماة الحدود"، خصوصا إنهم مش بيؤمنو بالحدود الوطنية أصلا، وجبنا أمثلة في التاريخ القديم والجديد إزاي ساعدو المحتلين والأجانب عموما في غزو الحدود المصرية، وإزاي بيستخدموها في تهريب المخدرات والسلاح والبشر إلخ، وإزاي لما يتمكنو منها بيبتزو الدولة.

وفي حاجات تانية كتير في الجزء الأولاني، ومش عايزين نطول فيها،اللي عايز معلومات أكتر يرجع للجزء الأولاني: "الشبه بين البدو وعصابة حسن البنا (ج1).. اتحاد القبايل"

• تحزيم حدود مصر ومدنها بالهكسوس

نيجي في الجزء التاني لشبه تاني بين التنظيم الدولي لعصابة حسن البنا وبين تنظيمات البدو الدخيلة على مصر، وهي استغلالهم للهكسوس الجداد في عمل "حزام نار" نار حوالين مصر، سوا كان الحزام ده على الناحية البرانية، يعني على الحدود المصرية مع الدول التانية، أو على الناحية الجوانية، يعني على حدود أو أطراف المحافظات والمدن.

بمعنى، اللي متابع حركة دخول الهكسوس لمصر من سنة 2012 و2013 بالذات، وفين كان بيحصل تسكين ليهم، وفين بقت الأماكن اللي بيتركزو فيها، لازم الفار يلعب في عبه، ويحس إن في حاجة منظمة وهدف مدروس ورا إنه يتاخد الهكسوس الجداد اللي دخلو باسم لاجئين وأشقاء وتجار، ويتسكنو في حتت مكنش على البال ولا الخاطر إنهم يروحوها.

مثلا، الوقت اللي اتحدف فيه الهكسوس الجداد على مصر بداية من نهاية 2011 و2012 كانت زي ما إحنا فاكرين البلد مولعة، ومولعة أكتر وأكتر على الحدود، بسبب العمليات الإرهابية اللي كانت في سينا، وقتل جنودنا اللي بيحرسو الحدود، والربكة اللي كان فيها الداخلية والجيش بسبب كترة المظاهرات والحالة الأمنية مهزوزة، والجماعات الإرهابية وعصابات التهريب، ومعاهم كتير من البدو اللي بيساعدوهم، كانو واخدين الفرصة وشغالين يدَّخلو للبلد إرهابيين وسلاح ومخدرات إلخ، والجرايم بأنواعها زادت.

طيب والحالة كدة على الحدود وأطراف المحافظات، لاحظنا إن في سوريين مثلا بيروحو يسكنو في العريش في سينا، أو يروحو مرسى مطروح، وكان الحكاية دي غريبة قوي.

يعني إنت واحد بتقول إنك لاجئ وهربان من العنف والإرهاب والحرب في بلدك، وجاي تدور على الأمان في مصر، إيه اللي يخليك أول ما تطب في البلد تروح لأكتر أماكن في مصر كان الإرهاب والعنف واخد فيها فرصة، وهي شمال سينا والحدود الغربية؟

وإيه عرَّف أجانب أصلا زي السوريين ولا غيرهم بالأماكن دي، ولا فرص العيشة والسكن فيها؟

معلوم إن أي غريب بيروح لأي بلد، بيروح لأأمن مكان فيها، ومش بيروح حتت بعيدة عن المدن الكبيرة إلا لو كان الدنيا أمان 100%، أو كان عاش في البلد مدة طويلة فمربط علاقات وعارف يتحرك إزاي.

طيب لما الغريب ده أول ما يطب البلد يجري على الأماكن المولعة وفيها خطر، يبقى أكيد متكل على ناس هي اللي قالتله يروح فين، ويروح ليه، وبياخد مقابل يخليه يغامر ويسكن وسط الخطر ده.

الأسئلة دي ممكن نلاقي ليها إجابات لما نراجع شوية أخبار ومعلومات سبق ونشرتها على كذا سنة بخصوص خطر وجود الهكسوس الجداد مع الهكسوس القدام على الحدود، لكن كانت متفرقة، هنجمع شوية منها هنا، ونرصد فيها إزاي وليه ساعدت عصابة حسن البنا والبدو السوريين والليبيين، وقبل كدة الفلسطينيين، في إنهم يستوطنو في حدود البلد وحوالين المحافظات، ويحزموها تحزيم.

• حزام النار على الحدود الغربية

هنتكلم الأول عن اللي راحو مرسى مطروح.

معروف إن أماكن كتير في مطروح وما بين الحدود المصرية الليبية اللي فيها ناس محتفظين بطابعهم القبلي، وفيهم اللي انتماءاته لقبايل في ليبيا أو المغرب إلخ من وقت ما اتسرسبو للبلد في أوقات احتلال أو فوضى وحطو إيديهم على أراضي كتير قرب الحدود، حتى لبسهم ولغتهم وعاداتهم لو تبص عليهم تقول ليبيين وش، وصعب يدخلو حد غريب عنهم وسطيهم، فإزاي "احتضنو" السوريين المجاهيل بالشكل ده؟

من الحاجات اللي لفتت النظر بخصوص توطين السوريين في مرسى مطروح مثلا، إنه على الفيس بوك في صفحة اتعملت في 2013، ووقفت عن الكتابة في 2015، بعنوان "سوريون في مرسى مطروح"، وحاطة علم التنظيمات الإرهابية اللي في سوريا، أو اللي بيسموه علم الثورة السورية (العلم الأخضر في أبيض في إسود)، وللعجب حاطاه جنب العلم المصري.

وكتير من بوستات الصفحة بتوضح روحها السلفية أو اللي تبع اللي بيسمو نفسهم تنظيمات الثورة السورية، اللي هما المليشيات اللي ولعت سوريا.

وفي 9 -5- 2016 نشر موقع "الدستور" تقرير عن السوريين في مرسى مطروح بعنوان "أهالي مطروح يحتضنون النازحين السوريين"، ومن اللي جه فيه بالنص:

"دأبت قبائل مطروح على احتضان وكفالة الأطفال والكبار من اللاجئين السوريين ممن فقدوا أبائهم وأمهاتهم خلال الأحداث الدامية في سوريا.

وأكد عدد من الأهالي أن متابعة الأطفال السوريين اللاجئين الذين فقدوا ذويهم خلال الحرب في سوريا، علاوة على توفير الحماية والمأوى لهم، أمر طبيعي منذ أكثر من 5 سنوات". (يعني من 2011).

ودي حاجة غريبة برضو، وهو مين اللي بينقي ليهم الأطفال دول ويبعتهم من سوريا عليهم، ومين هيربي العيال دي، وهيتربو على إيه.

طبعا الموضوع مش وقف على الأطفال، فبيكمل التقرير:

"كما كان لقيادات الدعوة السلفية ومسجد الفتح السلفي (في مطروح)، دور مهم في إيواء عدد كبير من السوريين ومنحهم مسكن وملبس وبطاطين، وتزويج عدد منهم بشكل رسمي، والتكفل بهم، وتم توفير مصدر للرزق لعدد آخر كي يعيشوا حياة كريمة، لاسيما في مدينة مرسى مطروح العاصمة، والتي استقبلت عشرات من السوريين الأعوام الثلاث الأخيرة".

يعني التقرير كان في 2016، فمعنى الكلام إن حدف السوريين على مرسى مطروح بدأ في 2011، وزاد الحدف بداية من 2013، يعني السنة اللي زاد فيها إرهاب عصابة حسن البنا وبقية الجماعات اللي شبهها، والتفجيرات وعمليات تهريب السلاح والإرهابيين والمخدرات على الحدود.

صورة من تقرير موقع "الدستور" في 9-5-2016

• ليه البرود عند أجهزة الأمن القومي؟

التقرير جاب تطمينات من اللوا هشام لطفي، مساعد وزير الداخلية لأمن مطروح وقتها، عن وجود السوريين في مطروح، وقال نصا بحسب التقرير: "لم يثبت قيام أحد من السوريين بأعمال مشبوهة أو القبض على أحد بسبب حيازة أسلحة، مشيرًا إلى أنهم لا يمثلون خطورة أمنية، خاصة أنهم يعملون بمهن شريفة، ويلتزمون بالقانون المصري، حتى أن النازحين أصبحوا جزءًا من الحياة والاجتماعية لأبناء المحافظة ولا يشعر أحد بوجودهم".

وهي تصريحات بتظهر استمرار العاهة اللي معششة في فكر الأمن القومي المصري من سنين طويلة، وهي عاهة إننا نستنى البلا لما يقع وبعدين نبدأ نحاربه.

مثلا نفس التصريحات كنا بنسمعها من مسئولين وغيرهم قبل سنة 2011، لما كان حد يحذر من سيبان الفلسطينيين يعيشو ويشتغلو في سينا، أو من سيبان الأنفاق تسرح من غزة لعروق سينا، وكان يتقال إخواتنا وبنساعدهم ومفيش ضرر إلخ، والدولة ما فاقتش على الخطر ده غير لما الأنفاق نفخت النار والبارود في صدور ولادنا في أول فرصة جتها، لما حصلت فوضى وفلتان الأمن في البلد في 2011 وزيادة الإرهاب في 2013.

ومن الأنفاق دي، ومن الفلسطينيين اللي عششو "بكل هدوء وسلام" في الأول، في سينا، خرج الرصاص اللي فرتك صدور ظباط وجنود قوات الأمن والجيش، بعد ما سابو الهكسوس يسرحو في سينا بحجة إنهم "أشقاء"، وإنهم "عايشين معانا في سلام"، وإنه "ما شفناش منهم حاجة وحشة".

مثال لنتايج استيطان الفلسطينيين في سيناء

وواضح من التقرير، ومن تقرير تاني نشره موقع "البوابة نيوز" عن أماكن وجود السوريين في مرسى مطروح، في 12-5-2016، وعنوانه: " بالصور.. "علم الروم" أكبر تجمع للسوريين في مطروح.. يعملون بالمطاعم ومحال الحلويات والبعض في التجارة وصيانة السيارات.. دفء العلاقات تربطهم بأهالي المحافظة.. ومواطنون سوريون: لا نشعر بالغربة"، العنوان الطويل ده بتاع "البوابة نيوز".

وجه فيه إن السوريين منتشرين في كل مكان، بما فيها اللي قريبة جدا من الحدود مع ليبيا، فقال إنه :"ويتواجد السوريين في غالبية مدن مطروح، ومنها مدينة سيدي براني علي بعد 140 كم غرب مطروح، وكذلك بمدينة الحمام وسيوة، لكن الأكثر عددًا بمدينة مرسى مطروح العاصمة؛ حيث وسائل الراحة وفرص العمل مفتوحة أمام الجميع".

من الحاجات الظريفة اللي جابها التقرير بتاع "البوابة نيوز" إنه واحد سوري اسمه أبو عمار بيقول إنه جه من دمشق (يعني من أكتر المدن أمان في سوريا) جه لمرسي مطروح من 3 سنين (يعني سنة 2013) لأن التقرير منشور في 2016، وإن عنده 3 عيال، ولما جه اشتغل في مطعم، وبعدين بقى عنده محل ملابس، وإن له أصدقاء مقربين من أبناء مطروح بيشاورهم "في كل كبيرة وصغيرة" بحسب كلامه.

طبعا اللي بيشاورهم في كل كبيرة وصغيرة دول، هما اللي سهلوله إنه من واحد بيشتغل في مطعم يدوب مرتبه يأكل عياله التلاتة بالعافية المفروض، لهوبا في ظرف أقل من 3 سنين يبقى عنده محل ملابس مرة واحدة، حاجة يعني ولا في الخيال.

والموقع بتاع "البوابة نيوز" ما سألش السوري ده جبت الفلوس بتاعة المحل بسرعة كدة منين، لأن التقرير كان مهتم إنه يمدح في السوريين ويلمع فيه ويلملهم عطف من الناس.

تقرير موقع "البوابة نيوز" في 12-5-2016

• من نويبع إلى مطروح إلى بنغازي.. برعاية بدوية- إخوانجية

نرجع للنقطة بتاعة ليه اختارو أماكن الحدود، وعلى الأقل إيه خطورة تسكين جماعات دخيلة في محافظات الحدود؟

في 3-1-2012 نشر جرنان "الاتحاد" الإماراتي، تقرير بعنوان "بنغازي قبلة اللاجئين السوريين"، وبنغازي دي مدينة في شرق ليبيا، من المدن الليبية القريبة للحدود المصرية، يعني الحدود بقت تتحاوط بالسوريين، سوا من الناحية المصرية أو من الناحية الليبية.

وقال التقرير إن بنغازي "تشهد وصول حافلات مكتظة قادمة من سوريا بشكل يومي"، وبقى ليهم بسرعة "رئيس للجالية"، واسمه محمد جمال، نقل عنه التقرير إنه في 4000 عيلة سورية وصلت بنغازي خلال أسابيع قليلة (تخيل 4000 عيلة في أسابيع قليلة) وإن العدد ده بيزيد يوم بعد يوم، وإنه الأتوبيسات بتوصل يوميا مليانة على آخرها وبترجع فاضية، وبعد ما كانو أتوبيسين في الأسبوع بقو أتوبيسين في اليوم، حسب كلامه.

ونقرا بقيه كلام التقرير بالنص، ونحاول نطلع منه الرابط بين اللي كان بيحصل في بنغازي وبين اللي بيحصل في مطروح، بيقول:

"والعائلات السورية اللاجئة تصل إلى بنغازي بعد رحلة شاقة تعبر فيها حافلاتها من سوريا إلى الأردن في البداية، ثم من الأردن إلى مصر بحرا عبر ميناء نويبع، ثم تقطع الطريق عبر شبه جزيرة سيناء وقناة السويس إلى الطريق الساحلي المحاذي للبحر الأبيض المتوسط؛ للوصول إلى الحدود الليبية، ثم الدخول بعد ذلك إلى مدينة بنغازي في أي ساعة من ساعات الليل والنهار".

ويكمل: "والعائلات السورية تصل إلى مدينة مرهقة (يقصد بنغازي) ما زالت القمامة التي لم يتم جمعها تملأ طرقاتها، كما لم تفتح مدارسها سوى مؤخراً، ولم يبدأ سكانها في العودة للعمل إلا منذ فترة قريبة، وتذيع محطة إذاعتها إعلانات متكررة تحذر فيها السكان من خطورة التقاط أي جسم غريب، سواء كان قنبلة أو صارزح/ أو قذائف دبابات ما زالت متناثرة في كل مكان بعد أن انتهى القتال. وعلى رغم الظروف الحالية في المدينة وفي البلاد عموما فإن السوريين يقولون إن ليبيا تعتبر واحدة من الدول التي يمكن أن يشعروا بالأمان فيها حقا".

ويبرر واحد من اللاجئين السوريين إيه نوع الأمان المقصود إنهم لقوه في بنغازي اللي مليانة صواريخ وقنابل، قال: "إن ليبيا حرة الآن فليست هناك شرطة سرية تعد عليك حركاتك وسكناتك"، "لقد أنجز الليبيون ثورتهم وسيساعدوننا الآن على إتمام ثورتنا".

وقال التقرير إن "الحكومة الليبية الوليدة التي كانت أول حكومة تعترف رسميا بالمجلس الوطني السوري، قد أعلنت عن استعدادها لاستقبال لاجئين من سوريا. ومعظم العائلات الهاربة من سوريا والساعية للجوء لليبيا هي من معارضي حكومة الأسد". الحكومة دي وقتها مقصود بيها حكومة عملتها جماعات تبع عصابة حسن البنا وبقية المليشيات، ونفتكر إن هما هناك أكترهم قبايل بدو.

وهنا كذا ملاحظة:

1- دخول السوريين بالعدد الكبير ده كل يوم، وأتوبيسات أتوبيسات ورا بعض، كان بيعدي من الأردن لمدينة نويبع اللي في جنوب سينا، ومنها تفضل ماشية ماشية بكل أمان، لحد ما توصل مطروح، وبكل أمان تدخل على ليبيا، يبقى إيه دور البدو، خصوصا مع قلة وجود الداخلية وقتها، في تسليك الطرق للسوريين من الحدود الشرقية لحد الحدود الغربية؟

وكمان إيه دور السلفجية وعصابة حسن البنا اللي كانت بتتحرك في طول البلد وعرضها وقتها براحتها، في نقل الطوفان السوري ده لمدينة بنغازي قرب مطروح، وفي نفس الوقت يتاخد منهم سوريين يبلطو في مطروح؟

2- الملاحظة التانية، إيه يخلي برضو لاجئين بيقولو هربانين من القنابل والحرب، إنهم يختارو يروحو مدينة مليانة قنابل وصواريخ وخطر شديد، وكانت دايرة فيها حرب شديدة زي بنغازي، ومدارسها متعطلة، وفرص الشغل فيها قليلة، إلا لو كان في تنظيمات حددت ليهم المكان ده بالذات؟

الإجابة ع السؤال ده نقدر نلاقيها في كلام اللاجئ السوري لما قال إنه جه بنغازي عشان ما بقاش فيها شرطة تراقبه، يعني يعيش فيها سداح ويعمل اللي عايزه مدام ماشي مع سياسة المليشيات الإخوانجية والبدوية اللي هناك، وإنه السوريين والليبيين هيساعدو بعض في إنه تنجح ثوراتهم.

ومعنى الكلام إنهم عايزين يعيشو في مدن مفيهاش دولة وطنية، وهيساعدو أي مليشيات في هدم أي شكل من أشكال الدولة الوطنية وقتل أهل البلد، وشفنا ده في سهولة تجنيد سوريين مرتزقة لصالح الجماعات المتصارعة في ليبيا بعدين.

طيب نرجع للسؤال: ليه البدو في مصر ساعدو الطوفان السوري ده كله يستوطن في مصر ويستوطن في ليبيا، وفي أماكن سهل يحصل تنسيق فيها بين السوريين اللي في مطروح والسوريين اللي في بنغازي وغيرها من مدن قريبة من مطروح، سوا في نقل المعلومات أو التهريب أو أي عمليات بتضر بالأمن القومي المصري بكره وبعده؟

صورة عن رعاية السلفيين والبدو للسوريين في مطروح، نقل عن موقع الدستور 9-5-2016

• حزام النار في الحدود الشرقية وعمل مناطق خاصة للسوريين

في الوقت اللي كانت الحدود الغربية بتتعبا بالسوريين والليبيين، الليبيين دول اللي سابو ليبيا بعد 2011 وانضمو لبتوع القبايل اللي مرتبطين بيهم في مطروح وكمان في إسكندرية والفيوم إلخ، كانت الحدود الشرقية في سينا بتتعبا برضو بسوريين وفلسطينيين إلخ.

كان تسكين الهكسوس الجداد في شمال سيناء شغال، وبقى في صفحات بتتعمل مخصوص على فيس بوك، زي صفحة عنوانها "فرص عمل للسوريين في العريش" سنة 2013. (اتحذفت ودي صورة منها قبل الحذف).

صفحة أمانة حزب النور في العريش المتخصصة لتسكين السوريين في العريش

في نفس السنة، طلعت عصابة حسن البنا باقتراح قدمه الكادر الإخواني والنائب في البرلمان وقتها، جمال حشمت، للبرلمان، واتكشف فيه نواياهم في إنهم يقسمو البلد، ويسلمو مناطق فيها للسوريين، وإن السوريين ما هوماش مجرد لاجئين ضيوف هيمشو بعد الحرب ما تخلص.

وفي تقرير بعنوان "جمال حشمت يطالب بتشريع يحمي اللاجئين السوريين من "شبيحة الأسد" في مصر" نشرته وكالة أنباء "أونا" في 2-3-2013، جه إن حشمت طالب بتخصيص مناطق يعيش فيها السوريين، وما يدخلهاش حد غيرهم، وكان يقصد بالذات السوريين اللي تبع المعارضة اللي ضد بشار الأسد، يعني اللي تبع مليشيات الإخوان وغيرها.

وجه في التقرير بالنص على لسان حشمت، إنه بالكلام مع اللاجئين السوريين "اتضح له بأن بينهم مجموعات من الغجر الذين يمتهنون التسول والدعارة، وعناصر من العلويين، وهم من غلاة الشيعة، وينتمون لطائفة رجال الحكم والرئيس السفاح في سوريا، إلى جانب أعداد كبيرة من الشبيحة الذين جاءوا، إما لمتابعة اللاجئين، وربما التعامل معهم بالتصفية الجسدية، أو للاستيطان في مصر عقب سقوط النظام، بما يمثل خطورة شديدة على أمن مصر".

ورد الدكتور أحمد فهمي، رئيس مجلس الشورى، وقتها، وهو برضو من عصابة حسن البنا لما كانت العصابة مسيطرة على البرلمان، بإنه كلف لجنة الشئون العربية والخارجية والأمن القومي بمناقشة اقتراح جمال حشمت.

والسؤال لحشمت: إن كان كل البلاوي دي موجودة في اللاجئين السوريين، شبيحة وغجر وقتالين قتلة، وصراع طائفي وعرقي جايبينه معاهم لمصر، يبقى خوفك على أمن مصر يخليك تطلب ترحيل السوريين دول أصلا من مصر ببلاويهم، ولا إنك تخزنهم في مصر، وتخصصلهم مناطق بحالها، بحجة حمايتهم، وتسيب بلاويهم تكبر في مصر؟

ولا كان الهدف إنه يتجمع عدد كبير من السوريين في المناطق دي، ويبقى سهل يتخزن فيها السلاح، ويتعملهم تدريبات على العنف والفوضى إلخ، تمام زي المدن اللي بقى مسيطر عليها الفلسطينيين في الأردن ولبنان؟ وياما رفع الفلسطينيين السلاح في وش جيوش البلاد دي لما كانت تحاول تفرض سيطرتها على المدن، ويمكن يطالبو مع الوقت بحكم ذاتي زي ما فلسطينيين حاولوا يعملو حكم ذاتي في الأردن مثلا؟

• مؤتمر إخوانجي في سينا: حدود الشام تمتد إلى العريش

طيب، وبعد الاقتراح ده بتاع حشمت بشهرين، يعني في شهر 5 سنة 2013، عمل يوسف القرضاوي وقيادات إخوانجية من اللي في مصر ومن كذا دولة، مؤتمر في العريش، وقال فيه جمال عبد الهادي، من قيادات عصابة حسن البنا، إن الشام بتتمد من الفرات لحد العريش، يعني اعتبر إن العريش جزء من الشام، يعني سينا من الشام مش من مصر، ونسب الكلام ده لأحاديث نبوية.

وورد ده في تقرير نشره موقع "الشروق" في 11-5-2013 بعنوان: "في مؤتمر جماهيري بسيناء، عضو باتحاد علماء المسلمين: الشام يمتد من الفرات إلى العريش"، واتحاد علماء المسلمين ده رئيسه القرضاوي وتبع عصابة حسن البنا.

وبعدها، وفي شهر 6، قبل ثورة 30 يونيو بكام يوم، وفي الوقت اللي كان بتوع عصابة البنا محتلين ميدان رابعة وميدان النهضة، راحت كوادر إخوانية، ومنها مفتي جماعة الإخوان، عبد الرحمن البر، للعريش، رغم خطوة الوضع وقتها؛ لأن العمليات الإرهابية كانت شغالة في شمال سينا، بحجة إنه هيعمل مؤتمر أو لقاء لنصرة سوريا.

ومكنش مفهوم ليه يعمل مؤتمر لنصرة سوريا في العريش، لكن يتفهم ليه لما نقرا التقارير اللي اتكلمت عن الخبر ده، وجه فيه إنه كان حاضر المؤتمر سوريين قاعدين في العريش.

ووقتها، كانت وسايل التواصل الاجتماعي، زي تويتر، بتنقل أخبار إن في سوريين بيشاركو في مظاهرات في العريش لنصرة الرئيس الإخوانجي، محمد مرسي، للرد على مظاهرات كان بيعملها المصريين بتطالب بزوال الاحتلال الإخوانجي عن مصر في 2013.

يعني كان السوريين، جنب الفلسطينيين، هما خزين عصابة حسن البنا وحزب النور وكتير من البدو للوقوف ضد المصريين، وزيادة الإرهاب، وتحويل مصر لسوريا وليبيا، وتسليم سينا للشوام، كبداية لتقسيم مصر كلها بين الأجناس والتنظيمات الدولية.

• محاصرة قناة السويس في بورسعيد

الكلام ده طبعا مش واقف على سينا، لكن كمان المدن اللي محاوطة قناة السويس، زي بورسعيد مثلا، فمثلا موقع "فيتو" نشر في 29-1-2013 تقرير بعنوان "موانئ بورسعيد تطالب تركيا بوقف إرسال اللاجئين السوريين للمحافظة"، وجه فيه إن اللواء أحمد شرف، رئيس هيئة موانئ بورسعيد، طالب قنصل تركيا في بورسعيد واسمه عادل اللمعي، طالبه بإن تركيا تبطل تبعت سوريين، لأن كان المراكب اللي جاية من تركيا بتيجي متعبية بيهم وتحدفهم على مينا بورسعيد، خصوصا كان الحدف ده بيحصل وبورسعيد برضو مولعة بين المصريين وبين اللي تبع عصابة حسن البنا، وقت المظاهرات اللي بتطالب بزوال الاحتلال الإخوانجي.

ومعروف خطورة إن أجانب ينتشرو في المدن اللي حوالين قناة السويس، وتعتبر هي كمان خط الدفاع التاني عن مصر بعد سينا في وش أي غزو، وظهر شر الانتشار السوري في بورسعيد بكترة ظبطيات المخدرات اللي جاية من سوريا وغيرها لمصر عن طريق بورسعيد، على سبيل المثال.

صورة من تقرير موقع "فيتو" 29-1-2013

• حزام النار على الحدود الجنوبية

اللي فات ده بالنسبة للحدود الشرقية والغربية، أما بالنسبة للحدود الجنوبية، فمش هتكلم دلوقت عنها كتير عشان التقرير ما يطولش أكتر من كدة، بس إنتو متابعين وعارفين إزاي في ناس بتوع قبايل من اللي جم من ناحية السودان واستوطنو عند الحدود الجنوبية، ومعاهم طبعا ناس في الحكومة، ساعدو في تغريق أسوان، بالسودانيين والأفارقة السود عموما.

• حزام النار على الحدود الشمالية

وبالنسبة للحدود الشمالية، فأول حاجة اللي بيحصل في مطروح برضو بيهدد الحدود الشمالية لأنها مدينة على الساحل الشمالي، زي ما هي على الحدود الغربية.

كمان إسكندرية، وهي مدينة حدودية خطيرة قوي في موقعها على ساحل البحر الأبيض المتوسط، بقت مكمكمة من كترة السوريين والليبيين والأفارقة السود، بخلاف اليونانيين اللي ناس في الحكومة عايزاهم يرجعو يستولو عليها تاني في حملة عاملاها لليونانيين والقبارصة اسمها "العودة للجذور".

• حزام النار بيحاصر المحافظات

كمان بالنسبة لتحزيم حوالين المحافظات، إحنا متابعين وعارفين إزاي الهكسوس انتشرو، وبسرعة، في المدن الجديدة اللي محاوطة المحافظات، زي مدن 6 أكتوبر والشيخ زايد والعبور والشروق ومدينتي والرحاب اللي محاوطين القاهرة، ومدن العاشر من رمضان ودمياط الجديدة إلخ اللي محاوطة محافظات في بحري، وغيرها كتير.

تقرير لموقع "اليوم السابع" 28-3-2013 عن انتشار السوريين ورفع علم "الثورة السورية" في المدن المصرية

• الخلاصة..

البلد بتتحزم بحزام من نار ومن قنابل هي أبشع من القنبلة الذرية، حزام من طوفان أجانب السمات الأساسية ليهم إنهم مليشيات، وقبايل، وطوايف، وأعراق مختلفة، جايين من بيئة متعودة على الصراعات والدم، وكره الدولة الوطنية، وكره الجيوش الوطنية، سهل يساعدو أي حد ضد أهل البلد، خصوصا لو أهل البلد خافو على بلدهم وقالو إنه "مصر للمصريين"، ومستعدين يعملو أي حاجة في أهل البلد، بس هما يفضلو في النعيم اللي اتفتح ليهم في مصر، واللي لا كان على البال ولا الخاطر ولا في أحلى أحلامهم.

تقرير لموقع "أورينت" السوري عن انتشار السوريين على أطراف المحافظات ونقل صراعاتهم لمصر

والحكومة، إن كان لسة في حكومة مصرية بحق، بدل ما تتعلم من غلطتها إنها سابت الفكر السلفجي يسرح في مرسى مطروح، وسابت الفكر القبلي البدوي (اللي هو الأساس التاريخي للفكر السلفجي الإرهابي) يتمكن بدل ما يتحلل من البداوة والانتماءات الأجنبية، وتنتهي كلمة "قبايل" الدخيلة على الدولة المصرية، بدل من ده كله، بتستورد أعراق وطوايف ومذاهب وقبايل جديدة، وتغذي بيها الميراث الإسود اللي موجود من قبل حتى 2011.

ومعرفش طيارات الرافال وحاملات الميسترال، وكل إمكانيات الجيش في إيه هتفيدنا لو جهات من برة، أو من جوة، طلقت علينا كل الطوفان ده في أي وقت فوضى، ويدوَّر فينا السرقة والمدابح والخطف، وهما عايشين في شوارعنا وعمارتنا، زي ما عملو فعلا في بلادهم وفي بعضهم.

وإيه حسابات الأمن القومي، سوا عند الجيش أو أجهزة الدولة، في إن البلد يحزمها من كل ناحية الطوفان المسموم المتلغم ده، ولا الجيش وأجهزة الدولة اللي فيهم بقو كلهم خلاص من البدو والمنتمين للتنظيمات الدولية؟

وربنا ينور بصيرة الجميع

بقلم: إفتكار السيد (نفرتاري أحمس) 28-11-2024

التقرير مسموع على يوتيوب

الشبه بين البدو وعصابة حسن البنا (ج2).. حصار حدود مصر بـ"حزام" النار الهكسوسي

https://www.youtube.com/watch?v=CL6TpRDR2W0

مواضيع ليها صلة:

الشبه بين البدو وعصابة حسن البنا (ج1).. اتحاد القبايل

-----------------------

المصادر:

- صفحة سوريونفي مرسى مطروح

- بالصور.. "علم الروم" أكبر تجمع للسوريين في مطروح.. يعملون بالمطاعم ومحال الحلويات والبعض في التجارة وصيانة السيارات (تقرير البوابة نيوز)

- أهالي مطروح يحتضنون النازحين السوريين (تقرير الدستور)