بقلم: إفتكار السيد (نفرتاري أحمس)
رغم إن أخبار فشل تجربة قبرص ومالطة وغيرهم في بيع الجنسية والعقارات للأجانب، بعد ما ثبت إن مجرمين كبار أخدو الجنسية، وشكوك بإن إسرائيل بتشتري عقارات وتعمل بيها مستوطنات في قبرص، فرئيس الوزرا، مصطفى مدبولي، فتح مكتب في العاصمة الإدارية يساعد الأجانب يشترو أملاك مصر ويتجوزو ويتوطنو في مصر بشكل أسرع وأسهل.
وكنت لسة ناشرة مقالة عن الصدمة اللي في قبرص بعد بيعها الجنسية والعقارات للأجانب، لما اكتشفوا إن في مسئولين ونواب برلمان بيساعدو مجرمين يلهفو الجنسية باسم استثمار، وشكا رئيس حزب "أكيل" القبرصي من إن الإسرائيليين بيشترو عقارات كتير جنب بعضها على الساحل، وهيحولوها لمستوطنات أو "جيتوهات".
وبعد ده بساعات، وفي عز ما أخبار التجربة القبرصية والمالطية كمان مالية الدنيا ومعروفة، اتنشر خبر في 10-7-2025، يعني لسة طازة، وهو إن رئيس الوزرا، مصطفى مدبولي، افتتح مقر مكتب خدمات الأجانب (خدمات التمليك والجواز) في العاصمة الإدارية.
وجه مثلا في عنوان موقع اليوم السابع: "رئيس الوزراء يفتتح مقر مكتب خدمات الأجانب (زواج–تملك) بالعاصمة الإدارية الجديدة".
العنوان نفسه كدة معناه توطين الأجانب، لما إنت تسهل لهم التمليك والجواز والاستقرار، يعني يشترو البيوت والمصانع والمحلات والأرض بتاعة المصريين بفلوسهم الكتيرة المشبوهة، وتسهلهم إجراءات الجواز، وفوق ده ياخدو الجنسية المصرية بقوانين بيع الجنسية قصاد استثمار أو شرا عقار أو الجواز من مصري إلخ من القوانين المتفصلة مخصوص لتسليم مصر للأجانب.
كمان بتسهلهم إنهم يتربط كدة بمصالح وناس في البلد وتبقى حجتهم إنه ما يرجعوش بلادهم تاني.
ده في وقت مدبولي نفسه كل شوية يتحفنا بتصريحات يأفأف فيها من خلفة المصريين، ومن الدعم اللي بتقدمه الحكومة ليهم، ووصلت بيه الجرأة إنه يطالب المصريين يبطلو خلفة خالص كذا سنة، مش ينظمو الأسرة ويقللو الخلفة، لا، يبطلوها من أصله.
كمان إحنا شايفين إزاي الحكومة بتصعب العيشة على الناس، وتزود الغلا كل يوم، فيبقى صعب على الشباب المصري يتجوز في سن كويسة، أو حتى يتجوز أساسا.
 |
| التقرير كامل على موقع "اليوم السابع" (دوس ع الكلام عشان تدخل الموقع) |
● تسهيلات جواز الأجانب
طيب، في الخبر نشوف الأسباب اللي قالها المسؤولين عن فتح مكتب جديد وفي العاصمة الإدارية لخدمات الجواز والتمليك للأجانب، لا وكمان مديين المقر أهمية كبيرة لدرجة إن رئيس الوزرا نفسه هو اللي يفتحه، مع وزير الإسكان ووزير العدل وكذا مسئول، عكمة يعني.
بيقول عدنان فنجري، وزير العدل، وهو بيشرح قصاد رئيس الوزرا جوة المكتب إنه المكتب "تم تزويده بمختلف الوسائل الإلكترونية الحديثة، التي تتيح سرعة ودقة إنجاز المعاملات، وتيسير تقديم خدمات زواج الأجانب وتملكهم للعقارات في مصر، فضلا عن استحداث خدمات جديدة تشمل الترجمة الفورية بعدة لغات؛ لتيسير التواصل مع مختلف الجنسيات".
وفيما يخص الجواز، قال فنجري إنه ضمن التسهيلات إن الوزارة عملت، مع افتتاح المقر، "خدمة الاستعلام الإلكتروني عن شروط الزواج لكل جنسية، بما يمكِّن الرغبين في إتمام الزواج من الأجانب من التعرف مقدما على الأوراق والمستندات المطلوبة قبل التوجه إلى المكتب، وهو ما يختصر الوقت، ويقلل من الحاجة إلى الزيارات المتكررة".
يعني إحنا بنسهل لهم الوقت، عشان يتجوزو بسرعة.
● تسهيلات تمليك الأجانب
كمان وزير العدل قاعد يشرح لمدبولي دور مكتب تمليك الأجانب في "استيفاء الإجراءات المطلوبة للتيسير على الأجانب، وصولا إلى تسجيل ممتلكاتهم العقارية" زي ما مكتوب في التقرير بتاع "اليوم السابع".
فهنا واضح كلمة "تيسير"، يعني الحكومة عايزة تسهلهم بكل شكل ياخدو أملاك المصريين، ويسجلوها بسرعة كمان ويوثقوها في الشهر العقاري، عشان إيه، عشان محدش بعد كدة يقولهم إنتو مالكوش حاجة، أو مش موثقين العقارات، أو يبقى سهل نمشيهم، لا ده الحكومة بتسدلهم أي ثغرة ممكن حد يستغلها عشان يسهل مشيهم من البلد.
حاجة تانية ضمن التسهيلات اللي بتقدمها الحكومة للأجانب في شرا أملاك المصريين، إن المسئولين في افتتاح مقر المكتب قالو إنه الإجراءات المطلوبة وتخص وزارة العدل والإسكان والاتصالات إلخ، هتبقى كلها في منصة واحدة، يعني عشان ما يتعبش الهكسوسي إنه يلف على الوزرات، ولا إنه يتعطل، ولا إنه يحسب بأي ضيقة وهو بيستلم أملاك المصريين.
الوزير عدنان فنجري، وواضح إنه اسمه الفنجري اسم على مسمى، فنجري مع الأجانب يعني، اتكلم عن تسهيلات تانية وهي إن الحكومة في المكتب الجديد زودت عدد منافذ الخدمة، فكانو 5 منافذ في لاظوغلي بقو 8، طبعا عشان إيه، عشان يستوعبو الزيادة الكبيرة اللي مستنياها الحكومة في عدد الأجانب اللي هيشترو أملاك المصريين، واللي هيتجوزو ويبلطو في مصر.
● ليه نقلو المكتب للعاصمة الإدارية؟
ومقر مكتب خدمة الأجانب كان الأول في لاظوغلي، قرب وسط البلد، ليه بقى نقلوه للعاصمة الإدارية؟
قال الوزير عن هدف النقل للعاصمة الإدارية إن ده بيمشي مع رؤيه مصر 2030 وأهدافها الخاصة "بتعزيز فكرة وجود مجتمع يتمتع بالازهار والعدالة والتقدم" والكلام العايم ده.
لكن طبعا اللي قرا "رؤية مصر 2030" اللي معمولة تحت إشراف الأمم المتحدة وسلاطين العولمة، هيعرف إنه من أساسيات اللي فيه هو تحويل مصر لمجتمع متعدد ومتنوع الأعراق والطوايف، وتسهيل استيطان ونفوذ الأجانب فيها.
وهنبقى نعمل عنها مقالة لو عشنا.
وكمان قال الوزير إن من أهداف نقل مكتب خدمات جواز وتمليك الأجانب للعاصمة الإدارية إنه يبقى في "مقر لائق" حسب المكتوب في التقرير، "لتقديم الخدمة بمساحات تتيح حصول المتعاملين على الخدمات بسهولة ويسر".
وقال إن المكتب كان 320 متر مربع، لكن في العاصمة الإدارية بقى 917 متر مربع، يعني كبَّروه 3 مرات.
يعني بيخليلهم المكان واسع واسع واسع، عشان الحكومة مش مستنية الهكسوس الجداد يمشو، لا، هي مستنية إنهم يبقو كتار كتار كتار، فبتعمل حسابها وتعملهم مكاتب كبيرة تكفي عددهم وطلباتهم، وطبعا عشان ما يحسوش بأي ضيق أو خنقة من الزحمة، ولا يجيلهم ملل من كتر الطوابير، أحسن يطشفو، وحكومة الهكسوس بتفرح لما المصريين يطفشو برة مصر، لكن قلبها ما يجيبهاش تشوف الأجانب من لاجئين وغيره بيمشو.
برضو من التسهيلات اللي قدمتها حكومة الهكسوس عشان يسهلوا ويسرعو الجواز والتمليك بتاع الأجانب، إنه ما كفهومش نقل مكتب الخدمات للعاصمة الإدارية ويكبروه ويوسعوه، لكن عملوا خدمة رقمية للاستعلام عن البيانات المطلوبة، وقال الوزير إنه حاليا بيتجهز خدمة عن بعد "للتيسير على المتعاملين".
يعني مش لازم كل حاجة يتعب الأجنبي ويروح للعاصمة الإدارية يعملها، لكن ممكن حاجات كتير يعملها وهو قاعد في البيت مرتاح.
كمان بيقول الوزير إنهم عملو للأجانب مكتب للتصديق على الأوراق بتاعتهم اللي تبع وزارة الخارجية جوة المكتب، عشان ما يتعبوش في تصديق الورق.
نخلي بالنا، إنه في التقرير بيتقال إن مكتب خدمة جواز الأجانب اتعمل في 1979، وخدمة تمليك الأجانب انضافت في 1996، واللي متابع حركة جواز وتمليك الأجانب في مصر، يعرف إنه جواز الأجانب كتر من السبعينات، وواضح إن الحكومة كانت بتشجع ده.
وتمليك الأجانب كان بدأ يقل قبل 1952 بشوية بفضل الثورات المصرية واللي شعارها "مصر للمصريين"، ولما قامت ثورة 1952 ضيَّقت أكتر بكتير على الأجانب، وبقى صعب عليهم يتملكو أراضي وعقارات كتير زي ما كان بيقدرو أيام الاحتلال.
لكن جت بلوة الخصخصة في التسعينات، وعلى حسها اتفصلت من جديد قوانين تسمح للأجانب بفرص كبيرة في شرا أراضي وبيوت ومباني المصريين، والفرص دي كل يوم بتزيد قصادها تحت اسم تشجيع الاستثمار، تشجيع السياحة، الالتزام الأخلاقي قصاد اللاجئين، وغيرها من حجج حكومة الهكسوس.
● سقفولي
كمان التقرير بتاع "اليوم السابع" بيقول في الآخر إن رئيس مجلس الوزرا، بتاع اليوم السابع يغادر قبل ما يسيب يعني المكتب بعد ما عمل المهمة العظيمة دي للأجانب، طلب إنه "يتم الترويج لفكرة انتقال الخدمات إلى العاصمة الإدارية الجديدة، وأن يتم تفعيل الدعاية للخدمات التي يقدمها المكتب للأجانب للتيسير عليهم".
يعني هو مدبولي والوزرا اللي معاه فرحانين ومبسوطين إنهم بيعملو عمل عظيم عظيم عظيم، ومستنيين الشكر من الشعب، وبيطالبه يسوق للإنجاز ده ويسقفو ويزمرو ويرقصو، ويشجعو الأجانب يروحو عشان يستفيدو ويشترو أملاك المصريين بشكل أسرع وأسهل.
دي الصور اللي نشرها موقع "اليوم السابع" للمكتب، طبعا إيه الفخامة دي، وإيه المكاتب اللي مكنش بنشوفها غير في أفخم الشركات، ومن فلوس مين دي يا مدبولي، من فلوس مين؟ ولمصلحة وخدمة مين يا مدبولي؟
طبعا إحنا نبارك لمدبولي واللي مشغلينه الإنجاز الكبير ده، اللي بيسرع مشروعهم الكبير في بيع أملاك المصريين، وتفليس وتطفيش المصريين، وقطع خلفهم، لحد ما يبقاش في مصريين خالص، مبروك يا مدبولي إنت واللي وراك!
التقرير مسموع على قناة كيمة والخاسوت
0 التعليقات:
إرسال تعليق