صدمة قبرص بعد بيعها الجنسية والعقارات.. ونقل الفخ لمصر ~ كيمة والهكسوس

بقلم: إفتكار السيد (نفرتاري أحمس)

أما كنا نتكلم عن خطر منح أو بيع الجنسية المصرية للأجانب تحت اسم تشجيع الاستثمار، كان يترد علينا بإن منح أو بيع الجنسية موجود في دول كتير في العالم، واتحولو بسببه لقوة اقتصادية بسبب جذب الاستثمار، ومفيش منه خوف، وإحنا مكبرين الموضوع وعايزين نوقع اقتصاد البلد.

ومع إنه في مسألة بيع الجنسية المصرية وبيع الأرض والآثار والتراث، مفيش حاجة اسمها إنه في دول غيرنا بتبيع؛ لأنه ما ينفعش مصر تقلد بلاد تانية في الحاجات دي، عشان مصر بلد متعوب عليها آلاف السنين، وما يصحش تتسلم جنسيتها وأرضها وتراثها للأجنبي، بس كمان بقى في السنين الأخيرة كل يوم يطلع دليل على إن حتى دول العالم اللي فتحت منح وبيع الجنسية والأراضي بتاعتها على البحري للأجانب، زي قبرص ومالطة مثلا، بدأت تتقرص وتصوت وتعيد نظر.

https://x.com/Nefertery_Ahmos/status/1942936255156965770

▼إيه بيحصل في قبرص خلاها تصرخ؟

في أكتوبر 2020 أعلن المتحدث باسم الحكومة القبرصية، كيرياكوس كوشوس، إن مجلس الوزرا وافق في اجتماع طارئ (وخلي بالك من كلمة طارئ معناها حسو بخطر جامد) على إنه يلغو برنامج منح الجنسية مقابل الاستثمار، أو اللي بيسموه برنامج "جوازات السفر الذهبية"، بعد ساعات من تقرير ذاعته قناة "الجزيرة" القطرية عن إن في مسئولين بيدو جواز السفر القبرصي لمجرمين.

والبرنامج ده كان معمول من سنة 2007 عشان المستثمرين الأجانب تحت بند "تشجيع الاستثمار" عن طريق إنه المستثمر ياخد اللي اتسمى جواز السفر الدهبي قصاد يعمل استثمار بـ 2.5 مليون يورو في قبرص، واتوسعت قبرص في البرنامج سنة 2013 عشان الأزمة الاقتصادية، يعني زي عندنا في مصر لما بيتحججو بالأزمة الاقتصادية في بيع الجنسية المصرية والأرض المصرية وكل حاجة مصرية أصلية.

والبرنامج حقق أرباح مادية لقبرص قال المتحدث باسم الحكومة إنها وصلت لـ 7 مليار يورو (يعني 8.25 مليار دولار).

قراية الخبر كامل من مصدره (دوس ع الكلام عشان الخبر يفتح)

والحكومة، حسب المتحدث باسمها، كيرياكوس كوشوس، مش هتعيد النظر بس في برنامج جوازات السفر الدهبية، لكن قال كمان نصًا إنها هتعيد بشكل كامل دراسة سياستها لتشجيع الاستثمار، حسب ما نقلت عنه وقتها وكالة الأنباء الفرنسية.

إيه بقى الانتهاكات والانحرافات اللي حصلت وخلت الحكومة كلها تترَّج وتقف على رجل واحدة، وتعيد النظر في كل سياساتها الخاصة بتشجيع الاستثمار الأجنبي، مع إنه من أساسيات الدخل في قبرص؟

اللي حصل إنه قناة الجزيرة القطرية ذاعت تحقيق عن إنه في مسئولين في قبرص بيدو جواز السفر القبرصي لناس مجرمين، رغم إنه بتعلن إنها بتشترط إن اللي ياخد الجواز يكون سجله الجنائي نضيف.

سماع كامل التقرير من مصدره

وعمل مراسلين القناة لعبة على المسئولين زي شغل البوليس لما يحب يوقع مجرمين، بإنهم عملو نفسهم مستثمرين أجانب عايزين ياخدو الجنسية القبرصية، بس ليهم سجل جنائي، ووصلو لمحاميين وناس شغالة في الاستثمار العقاري عرَّفوهم على مسئولين كبار، هما رئيس البرلمان ونايب في البرلمان، عشان يساعدوهم ياخدو الجنسية، مع إنهم مجرمين.

لكن رئيس البرلمان، واسمه ديميتريس سيلوريس، نفى إنه عمل المخالفات اللي اتكلمت عنها "الجزيرة" لكنه استقال، وكمان النايب، واسمه كريستاكيس جيوفانيس، برضو خدها من قصيرها واستقال من البرلمان ومن المناصب بتاعته في حزب "أكيل" اليساري.

أما المدعي العام بتاع قبرص، جورج سافيدس، فقال إنه هيكون في تحقيق واسع في الموضوع بعد الغضب والقلق الكبير اللي ظهر في رد فعل المواطنين القبارصة على برنامج الجزيرة، وقال في بيان: "سنفعل كل ما نراه ضروريا بهدف حماية المصلحة العامة".

وسبق وقالت قناة الجزيرة إن عشرات من اللي اتقدمو لطلب أخد جواز السفر الدهبي أصلا عليهم قضايا جنائية أو عقوبات في بلادهم.

واللي أخدو جواز السفر القبرصي ببرنامج الجنسية قصاد الاستثمار لحد 2020 كانو 4 تلاف واحد، قالت الحكومة إنها سبق ولغت 7 جوازات منهم بسبب إن أصحابهم المستثمرين قالو معلومات كدب عن نفسهم، وإنها هتعيد النظر في باقي الحالات.

▼ فرحة وتهليل الاتحاد الأوروبي

القضية سمَّعت برة قبرص، ووصلت للاتحاد الأوروبي، وعلق عليها المتحدث باسم المفوضية الأوروبية، كريستيان ويجاند، بكلام شديد قال فيه حسب تقرير وكالة الأنباء الفرنسية: "لقد شاهدنا غير مصدقين كيف كان كبار المسؤولين يتاجرون بجنسية أوروبية مقابل مكاسب مالية".

ورحب الاتحاد الأوروبي بإعلان قبرص إنها هتلغي البرنامج، لأن سبق وقال مسئولين في الاتحاد إنه منح الجنسية قصاد الاستثمار احتمال كبير يبقى بوابة يدخل منها المجرمين والناس الخطر لبلاد الاتحاد الأوروبي، لأن قبرص عضو في الاتحاد، واللي هياخد جنسيتها يبقى سهل يتحرك في بقية بلاد الاتحاد براحته.

وهلل للقرار مفوض العدل في الاتحاد الأوروبي وقتها، ديدييه رايندرز، على تويتر وكتب: "أرحب بالقرار الذي اتخذته قبرص بالإنهاء التدريجي لبرنامج الاستثمار الحالي اعتبارًا من الأول من نوفمبر".

وهلل وزير الشؤون الأوروبية الفرنسي، كليمان بون، وقال على تويتر برضو إن الخطوة "إيجابية للغاية".

يعني دول الاتحاد الأوروبي، اللي بتتوصف بإنها دول متقدمة وبتاعة انفتاح على الآخرين والاستثمار الأجنبي، هي نفسها شايفة الخطر من إنه تتعرض الجنسية بتاعة أي بلد من بلاد الاتحاد للبيع، أو تبقى قصاد صفقات استثمار؛ لأنه بالتأكيد هيدخل في الموضوع فساد ومجرمين وإرهابيين وجواسيس إلخ هياخدو المواطنة من بوابة إنه مستثمر.

▼ أزمة بيع الجنسية في مالطة

اللي حصل في قبرص سبقه أزمة تانية حصلت في مالطة، إدت دلاديل برضو على إن مسألة "منح الجنسية مقابل الاستثمار" دي من أخطر ما يكون على أي بلد.

ففي سنة 2020 برضو، قبضت الشرطة في مالطة، اللي هي عضوة في الاتحاد الأوروبي برضو، على واحد اسمه كيث شمبري، وهو مدير مكتب رئيس الوزرا السابق بتاعها، جوزيف موسكات، بتهمة إنه متورط في أخد عمولات خاصة ببرنامج جوازات السفر الدهبية.

وطلَّعت المحكمة في مالطة حكم بتجميد كل أصوله وشركاته.

والموضوع في مالطة كان فيه كلام وتحقيقات وقتها أكتر من اللي في قبرص، لأن الصحافة هناك كانت شغالة على كشف الفساد الخاص ببيع جوازات السفر للأجانب الأغنيا، وهو البرنامج اللي بدأته مالطة سنة 2014، ووصل خطر اللي كشفته الصحافة إن صحفية اسمها دافني كاروانا جاليزيا اتقتلت، وهي من اللي اتهمو كيث شمبري ده بالفساد.

قراية الخبر كامل من مصدره

▼ فخ الإقامة مقابل شرا العقارات

تحت عنوان: "يشترون البلاد".. جدل دبلوماسي في قبرص بعد تصريحات ضدّ المستثمرين الإسرائيليين"

نشر موقع "يورونيوز" في 4-7-2025، يعني من كام يوم، تقرير عن قلق في قبرص من حُمى شرا الإسرائيليين للعقارات، والغرض من الشرا.

والأول نفتكر إنه عندنا في مصر فجأة طلع في الإعلام من سنة 2017 على الأقل ناس مسئولين ومستثمرين شغالين في العقارات وبُنا الكمبوندات، من أشهرهم طارق شكري، مستثمر عقارات ورئيس غرفة التطوير العقاري وقتها، وبعدين دخل البرلمان وبقى نايب لجنة الإسكان، ودخل حزب مستقبل وطن، يتكلمو عن حاجة مكنتش على البال ولا على الخاطر، وهي اقتراح بقانون إنه الحكومة تدي إقامة طويلة للأجنبي قصاد إنه يشتري عقار بالدولار، وبرضو اتحججو بالأزمة الاقتصادية وإن عندنا نقص في الدولار.

قراية الخبر كامل من مصدره

طبعا كانت صدمة لينا، لأنه إزاي بلد فيها أزمة إسكان، والحكومة بتشكي من كترة السكان، تقدم البيوت والمحلات والمصانع بتاعة البلد زي سلعة تبيعها في السوق للأجانب، فيقل المعروض للمصريين، ويزيد الأسعار، وتدي الأجانب هدية فوق الشرا وهو الإقامة الطويلة؟!

قراية الخبر كامل من مصدره

طبعا الحكاية ما وقفتش عند الإقامة الطويلة، لكن في الزيادات اللي اتعملت على قانون الجنسية المصرية بداية من 2018 و2019 بقت إنه الأجنبي يشتري عقار وياخد فوقيه الجنسية المصرية بحالها، كأننا بنكافئه على إنه زود أزمة الإسكان والسكان في البلد.

والبرلمان لما وافق على قانون منح الجنسية قصاد شرا عقار في 2019، رفض حتى إنه يستثني الإسرائيليين والفلسطينيين من القانون، يعني فتح الجنسية المصرية لكل كليلة.

طبعا الأفكار دي، يعني منح الجنسية قصاد عقار واستثمار، واضح إنها منقولة من نفس الناس اللي بتخطط لتسليم قبرص وغيرها للأجانب تحت اسم تشجيع الاستثمار.

قراية الخبر كامل من مصدره

نرجع لأزمة شرا الإسرائيليين للعقارات في قبرص.

حسب تقرير موقع "يورونيوز" فزعيم حزب "أكيل" اليساري في قبرص، ستيفانوس ستيفانو، شكا في مقابلة مع الإذاعة الرسمية من إن المستثمرين الإسرائيليين بيشترو الأراضي "بشكل منظم" ويبنو "مدارس صهيونية ومعابد" في أماكن محددة، وهي الأماكن الساحلية، زي ليماسول ولارنكا، وشاف إن الخطر في ده إن الحكاية كأنهم بيعملو مستوطنات يتركزو فيها، أو زي ما جه في التقرير إنه الأماكن دي هتتحول إلى "جيتوهات مغلقة".

طيب، إيه اللي ساعد الإسرائيليين إنهم يقدرو يشترو عقارات كتيرة وجنب بعضها لدرجة ممكن يحتلو بيها مناطق في قبرص؟

ده يرجع لبرنامج اسمه "التأشيرات الذهبية"، وده بيدي إقامة في قبرص لناس من برة الاتحاد الأوروبي قصاد إنهم يشترو عقارات.

فواضح إن الإسرائيليين، وغيرهم، أخدوها فرصة يجرو ياخدو اللي يقدرو عليه من العقارات، وفي الأماكن اللي عايزينها وتبقى جنب بعض، وكمان أخد الفرصة دي يونانيين وروس وإنجليز وغيرهم.

واللي عمل قلق في قبرص كمان من البرنامج ده، إنه حسب التقرير بتاع "يورونيوز" هيتسبب في زيادة تمن العقارات ويخلي الحكومة مش عارفة تسيطر على السوق. يعني تمام زي ما حصل في مصر.

قراية الخبر كامل من مصدره

▼تهديد اللي يكشف الخطر

السفير الإسرائيلي في قبرص، أورين أنوليك، حاول يعمل إرهاب للي بيحذرومن خطر الشرا الإسرائيلي للعقارات، بإنه كتب على "تويتر" يتهم ستيفانو، زعيم حزب "أكيل" اللي حذر من حُمى شرا الإسرائيليين للعقارات، بـ"معاداة السامية" وإنه "بيستهدف جماعة على أساس هويتها"، يقصد الإسرائيليين، وحرَّض القبارصة إنهم يقفو ضد اللي بيحذر من خطر شرا الإسرائيليين للعقارات.

اقرا تويتة السفير الإسرائيلي من مصدرها

ودي تمام زي لما ناس، ومنهم مسئولين ونواب، بتتهمنا لما بنحذر من خطر توطين الهكسوس، وبيع الجنسية المصرية والأرض والعقارات للأجانب، ويقولو علينا إننا تبع عصابة الإخوان المسلمين، أو إننا عايزين نوقع اقتصاد البلد ونطفش المستثمرين، وإننا ضد الدولة، وإننا عنصريين ضد اللاجئين، أو إننا ضد الإنسانية والدين إلخ.

▲ الخلاصة:

1- مش صحيح إنه مدام في دول عملت قوانين لتقديم الجنسية لتشجيع الاستثمار إنه نجري وراها زي العمي ونعمل زيها، وكأنه مالناش عقل، أو مالناش بلد نخاف عليها.

2- مش صحيح إنه عشان إنت تتوصف إنك متقدم ومنفتح على الاستثمار الأجنبي إنك تفرض في الجنسية بتاعة بلدك وأرضك وتدي امتيازات للأجنبي على حساب شعبك، وأدي الاتحاد الأوروبي نفسه اتكلم عن خطر الانفتاح سداح في منح الجنسية.

3- نلاحظ من تقارير صحفية تانية عن أزمة بيع الجنسية في قبرص، زي تقرير لوكالة "سبوتنيج" إن أكتر بوابة دخل منها المستثمرين المشبوهين لأخد الجنسية القبرصة كان الاستثمار في العقارات، وبعده جت الشركات.

وده نفس اللي بيحصل في مصر، إنه فيه سَعرَة كبيرة من بتوع الاستثمار العقاري في عمل كمبوندات ومشاريع عقارية، وتتباع للأجنبي اللي بياخدها باسم استثمار، واتعملها بند مخصوص في قانون الجنسية المصرية سنة 2018 والإضافات اللي اتحطت عليه في 2019 و2023، وهو إنه الأجنبي ياخد الجنسية المصرية بحالها قصاد شرا عقار بالدولار بمبلغ معين.

4- الاتحاد الأوروبي عارف خطر فتح باب التجنيس وبيع العقارات ودخول الأجانب سداح، وفرح لما قبرص لغت برنامج بيع الجنسية للمستثمرين، لكن في نفس الوقت بنلاقي الاتحاد الأوروبي معندوش مشكلة تتباع الجنسية والأراضي في مصر، وبيشجعها إنها تفتح بابها سداح للأجانب، باسم لاجئين أو مستثمرين، وعندنا ناس بتعتبر إن مدح أوروبا لينا في فتح البلد للأجانب سداح ده حاجة نفتخر بيها وإنها دليل ثقة، مش إنها حاجة تنبهنا لإنهم بيرمو الخطر والوبا علينا، ويحاربونا في المستقبل بيه.

5- العجبة إنه مع إن بان زي الشمس خطر بيع الجنسية قصاد الاستثمار في قبرص ومالطة، من أكتر من 5 سنين، لكن الحكومة في مصر لسة بتصر تكمل فيه، وكل شوية تدي امتيازات زيادة للأجانب تسهلهم لهف الجنسية المصرية، سوا بالشرا باسم مستثمر، أو عن طريق الجواز من مصريين وغيره.

فالسؤال: هي الحكومة والبرلمان وكل اللي بيصرو يسلمو مصر للأجانب تحت أي اسم، فعلا مصريين، ولا أجانب مستخبيين في الجنسية المصرية، ولو من سنين السنين؟

مقالة منشورة في مدونة "كيمة والهكسوس"

بتاريخ 8-7-2025