دش بارد لتفويق الفلسطينيين.. كلمة إلى أكتر شعب عوالة على البشرية

 بقلم: إفتكار السيد (نفرتاري أحمس)

 كلمة إلى الفلسطينيين، الـ 7.4 مليون الهربانين برة والـ 5.6 مليون اللي عايشين في فلسطين، بعد حملة كتير منكو وأكترية مليشياتكو ضد مصر، واتهامها بإنها بتشارك في "تجويع" غزة، أحب أفكركو بحقايق بتردمو عليها، وببلاوي عملتوها وخلتكو ترمو جرايمكو في حق نفسكو على مصر وغيرها، وتتمتعو بدور الضحية، لأنه بيجيب فلوس وامتيازات كتير، ويبرأكو من جرايمكو وغدركو بمصر وغيرها.

● أكبر مجرم في حق فلسطين هو إنتو

 لأنكو شعب فشل طول تاريخه يعمل دولة وطنية، وشعب واحد، وجيش وطني.

وعجبتكو عيشة المليشيات والعشاير والمدن اللي ضد بعضها، وحتى لما جاتكو الفرصة تعملو جيش واحد أيام جمال عبد الناصر اخترتو تفضلو ميليشيات من كذا لون وبقيتو ضد بعض، ولما جاتكو فرصة تعملو دولة واحدة لما اتسلمت السلطة الفلسطينية حكم الضفة وغزة قلبت حركة حماس على السلطة في 2007، وفصلت غزة عن الضفة.

عبد الناصر شارك في تأسيس منظمة التحرير الفلسطينية لتوحيد الفلسطينيين (صورة من fanack.com)

 ● مين الدولة اللي تتحمل مسئولية احتلالكو؟

 اللي يتحمل هي بريطانيا اللي عملت وعد بلفور وسهلت هجرة اليهود لفلسطين، وإسرائيل اللي احتلتكو، وأمها أمريكا، فما ترموش مسئوليتكو ومسئوليتهم على دول تانية عشان تعملو لنفسكو حقوق عند كل البشر، مش إحنا اللي محتلينكو دلوقت.

● إنتو مالكوش حق عند أي شعب

♦ أول حاجة لأن الطبيعي كل شعب مسئول عن نفسه وأرضه هو بس، وأي مساعدة منه لغيره تبقى باختياره، وحسب مصالح بلده، ويتشكر عليها، مش فرض ولا إجبار.

♦ تاني حاجة عشان إنتو طول عمركو ما اتحملتوش مسئولية أي شعب تاني، لا اتحملتو مسئولية المصريين وقت ما كانو في احتلالات وأزمات ومجاعات، ولا مسئولية العراقيين ولا السودانيين ولا ولا، فبأي عين تطلبو من الشعوب دي تسخر دم عيالها وثرواتها وجيوشها ليكو طول السنين؟

♦ إنتو اللي فشلة وعاجزين وأشطر حاجة فيها تعملو الصعبانيات والشكاوى والخطب والمليشيات، ولما تعملو معارك ضد إسرائيل أكترها يبقى حسب أجندات الدول اللي بتمول المليشيات أكتر ما هو حسب مصلحة فلسطين، ولما تطلعو من فلسطين تبقو أشطر ناس في إزاي تاخدو أرض غيركو، وفرص أهل البلد اللي إنتو فيها.

●  إنتو مش أكتر شعب اتظلم

ياما شعوب وقعت في احتلالات، وحصل فيها إبادات ومجاعات وتهجير إلخ، بس قدرت تقف وتعمل ثورات ومفاوضات لحد ما حررت نفسها، أو تعيش بأي شكل، ومكنش بلاد بتخصصلها تبرعات ومسئولة عن تعليمها وعلاجها وتحريرها وإعادة إعمارها على طول الخط زي ما اتخصص لفلسطين طوفان تبرعات وتمويلات ما اتقطعش 80 سنة من الأربعينات لحد دلوقت.

 فالحقيقة إنتو أول شعب في التاريخ يتدلع ويتطبطب عليه بالشكل ده.

● إنتو لعيبة بكلمة "حق العروبة والإسلام"

♦ أول حاجة، عشان مش حقيقي كل المنطقة عرب، العرب في جزيرة العرب، فمصر مش عرب، وكمان أكتر شعوب المنطقة مسلمين ولا مش مسلمين مش بيراعو عروبة أبدا بينهم وبين بعض، وحتى بعد الإسلام قعدو يدبحو في بعض، ويحتلو بلاد بعض، والشوام بيعملو في بعض كدة إلخ، فليه أنا أقدم نفسي قربان ليهم؟

♦ تاني حاجة، مين قال الإسلام يرضى بإن كل دولة ملزومة تشيل شيلتها وتحرر وتبني نفسها، أما فلسطين فتبقى دلوعة الكل، والكل ملزوم يأكلها ويشربها ويعلم ويشغل عيالها، ويحررها ويودي أهلها عمرة وحج، ولما يطفشو منها يوطنوهم في بلادهم ويدوهم امتيازات والجنسية كمان، ولو شعوب البلاد دي مكنش في طاقتها تدلعها يبقى يتقال عليهم صهاينة وخذلو فلسطين؟!

♦ تالت حاجة، إنتو عمركو ما راعيتو اللي بتسموه حق العروبة والإسلام، فدايما البلاد اللي حواليكو بتشوف منكو الغدر والخيانة.

ومعلوم إيه البلاوي اللي عملتوها مع مصر لما عبد الناصر قِبل مبادرة روجرز 1970، ومع السادات لما عمل اتفاقية السلام مع إسرائيل، ومع الأردن اللي كنتو عايزين تحتلوها في مدابح أيلول الأسود، ومع لبنان اللي ساعدتو في توليع وشعللة حرب أهلية فيها جابت اقتصادها الأرض، ومع سوريا اللي كتير منكو وقف مع المليشيات ضد حكومتها اللي آوتكو، ومع الكويت اللي عملتلكو قيمة وآوتكو، بس كتير منكو وقف مع الغزو العراقي ليها، ودلوقت اللي بتعملوه ضد مصر وإنتو بتحملوها مسئولية قفل إسرائيل معبر رفح، وطنشتو كل المساعدات اللي بعتتها ليكو قبل كدة، والضغوط والتهديدات اللي اتحملتها من إسرائيل وأمريكا لما رفضت طلب إسرائيل إنه يتهجر أهل غزة لمصر.

فإنتو اتحولتو من شعب بيكافح يحرر أرضه لشعب يحتل أرض غيره باسم لاجئين والصعبانيات والغدر ويحرقها بالحروب، زيكو زي إسرائيل.

♦ رابع حاجة، إنتو نفسكو مش بتراعو إخوتكو لبعض، إنتو نصكو هرب برة والقضية عنده بقت استرزاق، واللي جوة مليشيات بترفع السلاح في وش بعضها في أي وقت، ولما تحصل عندكو أزمة بتستنو اللي ينجدو من الشعوب التانية أكتر ما تستنو تنجدو بعض.

اشتباكات بين حركة فتح وحركة حماس للسيطرة على غزة 2007 حصل فيها تفجيرات واغتيالات واعتقالات

صورة من مشاهد الدمار اللي سببته الحرب الأهلية والمليشيات الفلسطينية في لبنان 1882 (الصورة من أرشيف اللجنة الدولية للصليب الأحمر)

 

 

 

 

 

 

 

 

 

● إنتو كدابين لما بتقولو إنكو بتدافعو عن الإسلام والمنطقة

لأنه الإسلام موجود من 1400 سنة وإنتو في فلسطين تحت الاحتلال من قبله ومن بعده، واحتلالكو ما ضيعش الإسلام، والإسلام ما قالش تعيشو شعب مليشيات وعوالة على البشرية.

وإنتو مش بتدافعو عن شعوب المنطقة قصاد إسرائيل؛ لأنكو عاجزين تحرركو نفسكو من إسرائيل أصلا، وشعوب المنطقة زي مصر حررت أرضها من غير حوجة ليكو من كذا احتلال، وعندها شعبها اللي يحارب عشانها مش مستنياكو، ولا حميتو مصر في حروب 1948 ولا 1956 ولا 1967 ولا 1973، ولا إنتو اللي رجعتولنا طابا، فإنتو أفشل من إنكو تعملو نفسكو بتحاربو دفاع عن شعوب المنطقة، أو بدالها.

وبعدين إشمعنا إنتو تحت نصباية إنكو بتدافعو عن الإسلام والعروبة عايزين غيركو يسخر جيوشه واقتصاده ومستقبله عشانكو؟

ما مصر والعراق مثلا احتلتهم بريطانيا وكل بلد حررت نفسها، من غير ما تتشرط على اللي حواليها يبعتولها جيوشهم ولا يسخرولها اقتصادهم ولا يخصصولهم تبرعات ما تتقطعش عشرات السنين.

رد على فلسطينية بتقول إن كترة خلفة الفلسطينيين وهما في الحرب بإنه عشان يجيبو أجيال تدافع عن شعوب المنطقة

 ● إنتو مالكوش تبتزونا بالمسجد الأقصى وكنيسة القيامة

♦ أول حاجة أكتر من نصكو طفش برة فلسطين وساب المسجد الأقصى وكنيسة القيامة للمحتلين عادي، روحو اشتموهم هما الأول، اشتمو الـ 7.4 مليون فلسطيني الطفشانين، وروحو قولولهم هما يرجعو ويحاربو عشانكم الأول.

♦ تاني حاجة هي لو مصر فضلت تنزف اقتصادها عشانكو وتحارب عشانكو وجيشها وقع، عايزين مصر كلها بالأزهر والكنيسة بتوعها هما كمان يقعو في احتلال زيكو؟

ولما مصر تبقى ضعيفة ولا تحت الاحتلال يبقى كدة اتحرر الأقصى وكنيسة القيامة، ولا يبقى بردت قلوب الغدارين منكو اللي نفسهم يشوفو مصر دايما ورقة مولعة بالنار؟

♦ تالت حاجة، مصر ياما ساعدتكو وعملتلكو مبادرات عشان تبقى غزة والضفة بلد واحدة وحكومة واحدة وجيش واحد، فتقدرو يبقى ليكو دولة فلسطينية تحمي حقوقكو في القدس اللي فيها الأقصى وكنيسة القيامة، لكن إنتو اللي أصريتو تعيش غزة لوحدها والضفة لوحدها، وتبقو مليشيات ضد بعضها، وغدرتو بمصر ومشيتو ورا إيران وتركيا وقطر وإسرائيل نفسها.

♦ رابع حاجة، إنكو تبتزونا بإن تحرير الأقصى وكنيسة القيامة واجب علينا عشان ناخد رضا ربنا، فدي تخص كل واحد مع ربه، مالكوش إنتو تفرضوها على أي شعب، إحنا مننا لربنا، هو اللي يحاسبنا عملنا الصح ناحية الأقصى والكنيسة، ولا عملنا الغلط، ولا ورطنا نفسنا في حروب ضيعتنا زي ما ضيعت الأٌقصى والكنيسة، دي حاجات تخصنا مع ربنا، مش إنتو اللي تجبرونا نرضي ربنا بأنهي طريقة وفي أنهي وقت.

♦  خامس حاجة، إنتو مش شايفين حق لينا في الأقصى وكنيسة القيامة أصلا.

فملحوظة على جنب يعني، إنتو دلوقت بتصرخو وتقولو يا مسلمين انقذو الأقصى، الأقصى يستغيث، ده أقصاكم يا مسلمين ومسرى نبيكو، بس لو جه يوم واتحرر الأقصى بدم وفلوس وتعب عيالنا، في مصر وغيرها، هتعملو حواجز بينا وبين المسجد الأقصى وكنيسة القيامة، وهتقولو دول بتوعنا وفي أرضنا، وإحنا بس اللي نتحكم فيهم، والإيرادات بتاعة السياحة والزيارة حقنا إحنا لوحدنا، زي ما في السعودية هي اللي بتتحكم في الحرمين وإيرادهم ليها وحدها، وهتعاملونا زي أي زوار أو سياح أجانب، وإننا بس مصدر للفلوس.

● ما تلاعبوناش بكارت الحدود والأمن القومي

في فلسطينيين لما يحسو إن كتير من المصريين ما بقاش ينضحك عليهم بكارت الدين والعروبة والصعبانيات، يطلع يقولك إنتو لازم تساعدونا ومهما حصلكو مشاكل مع إسرائيل ومهما كان اقتصادكو ولا جيشكو هيتكلف، لأن في الحقيقة إنتو مش بتساعدونا إحنا، لكن بتساعدو نفسكو، لأن غزة أمن قومي لمصر وعلى حدودها، ولو ضاعت غزة يبقى سهل إسرائيل تحتل مصر!

طبعا إنتو كدابين، عشان:

♦ أول حاجة الأمن القومي لمصر إحنا نحدده مش إنتو، ونتحرك بخصوصه في الوقت اللي إحنا عايزينه وشايفينه صح، وبالطريقة اللي إحنا نشوف إنها تناسب ظروفنا، مش حسب الوقت والظروف اللي إنتو تختاروها وتفرضوها علينا، زي ما بتعملو عمليات ضد إسرائيل أو ضد بعضكو في الوقت اللي تختاروه، أو تختاره التنظيمات الدولية والبلاد اللي بتحركو، وبعدين تصرخو وتقولو تعالي يا مصر انجدينا وفكي الحصار عننا وحاربي.

♦ تاني حاجة، طول عمر فلسطين تحت احتلالات أصلا، فمش هنقعد نحارب عشانها طول التاريخ، وإنتو كتير من مليشياتكو في غدرهم بمصر وطمعهم فيها، سوا مليشيات إسلامجية ولا يسارجية ولا شيوعية ولا علمانية، ولا أي صفة هباب بتتصنف بيها، مش بتفرقو في العداوة لمصر عن اللي بيحتلكو، فلو بنتعامل مع إسرائيل وهي محتلة غزة، مش هتبقى أوحش لما بنتعامل مع المليشيات بتاعة غزة يعني.

كتايب القسام اللي تبع حماس بعد تحرير مصر من الاحتلال الإخواني في 2013 بتعمل استعراض بالسلاح عند الحدود المصرية وترفع فيه علامة الإخوان "رابعة" في تهديد لمصر

● إنتو كتير منكو شعب ما بيشبعش

يعني من 1948 وإنتو شغالين تقولو مش لاقيين مش لاقيين، وإنتو عايشين جوة فلسطين وفي الشتات عيشة أحسن ألف مرة من أكترية الشعوب حواليكو، خصوصا مش بتعيلو همّ مصاريف مدارس وعلاج وسكن وأكل وجواز إلا قليل؛ لأن أكتره بيجيلكو تبرعات ومساعدات.

 ومن وقت ما كوشت حركة حماس على غزة، مشغلين نغمة إحنا تحت الحصار الإسرائيلي، إحنا مش عارفين نعيش، إحنا في أكبر سجن، وبعد ما حماس عملت عملية 7 أكتوبر، وناس منكو بقو ينشرو الفرق بين الحياة في غزة قبلها وبعدها، لقيناكو كنتو عايشين في جنة ونعيم مش عايش فيه أكتر المصريين وأكترية الشعوب، ورجعتو لنغمة جعانين ومش لاقيين، وقليل اللي بيرمي المسئولية على الفلسطينيين نفسهم والمليشيات، جنب مسئولية إسرائيل، وشغالين ترموها على مصر وغيرها.

فيديو لفلسطينيين بيقولو غزة قبل الحرب الأخرانية كانت زي باريس وبيجيبو أشكال النعيم اللي تبين إن كلامهم عن الحصار والعيشة الصعبة قبل الحرب كان أكتره كدب واستعطاف عشان الناس تبعت تبرعات دايما

حماس فضلت تقول لمصر افتحي معبر رفح، ولما بقى مفتوح من الناحيتين أنكر مسئول سابق في حكومتها، أدهم أبو سلمية، في 2023 دورها في دخول المساعدات، ولبسها العار بتاع حماس، وفضلو يطلبو من مصر طلبات تاني عشان تدخل في صدام مع إسرائيل وتتورط في أزمة أو حرب، أو تتجبر تسمح بتهجير سكان غزة

 

 ● إنتو أكتر شعب بيمِن على غيره بالقليل

جنب إنه شربتكو التنظيمات الدينية والعروبية واليسارية والعولمية وحكومات في المنطقة، كدبة إنكو إنتو اللي بتدافعو عن الإسلام والعروبة والأمن القومي للشعوب التانية، فكمان بتمِنّو على الشعوب دي بالقليل النادر اللي ممكن تساعدوها بيه، مع إنكو بتطلبو قصاد الحاجة ألف حاجة، لا وكمان ممكن تِمِنو عليهم بإنكو شاركتو في خراب بلادهم.

مثلا مرة واحد من حركة حماس اسمه أدهم أبو سلمية، أيام الاحتلال الإخواني لمصر في 2013، دعا إن كل فلسطيني يتبرع بدولار لمصر عشان تساعد اقتصادها، وده كان في الوقت اللي المساعدات والتبرعات المصرية ما بتتقطعش للفلسطينيين بطوفان من الدولارات، بس طلع هو بيعمل الحملة دي ليه، عشان عايز يحشد الفلسطينيين من اللي تبع حماس يقفو مع عصابة الإخوان لأننا في مصر كنا عاملين مظاهرات ضد حكمهم، يعني أساسا كان بيعمل حملة يتبرعو بدولار قصاد ياخدو مصر كلها مع عصابة الإخوان.

كمان في سوريا مثلا، من كام يوم طلع كلام في سوريا إن سلطة الجولاني هتعامل الفلسطينيين هناك معاملة الأجنبي، فطلع فلسطينيين معترضين، ويقولو إحنا زينا زي السوريين، خصوصا إنه شاركنا في "تحرير" سوريا من نظام بشار الأسد، فهما شايفين مشاركتهم في شئون غيرهم، ورفع السلاح ضد حكومة البلد اللي آوتهم وإدتهم  امتيازات، ووقوفهم في صف جيوش أجنبية جت احتلت سوريا، شايفين إن ده جميلة ومعروف في رقبة السوريين لازم يدوهم بلدهم سوريا مكافئة عليه، ويعتبروهم مواطنين وصحاب بلد.

طبعا في فلسطينيين محترمين، ويحبو يساعدو الشعوب التانية زي ما بتساعدهم، ومش بيتدخلو في شئونها، بس دول بنقولهم، ربنا يبارك فيكو ويحميكو من الفلسطينيين الوحشين اللي حواليكو، بس ما يكونش قصاد ده إنكو تشوفو إن من واجب الشعوب التانية تفضل فاتحالكو حنفية التبرعات والمساعدات على طول الخط، ومهما كانت ظروفها، أو إنه يبقالكو حق تروحو لاجئين في أراضيها وتبطلو مدة مفتوحة، وتاخدو امتيازات وكمان الجنسية، إحنا لما بنساعد دول غيرنا مش بنطلب منهم الامتيازات دي.

أدهم أبو سلمية، متحدث إعلامي سابق في وزارة الصحة اللي تبع حماس كان بيحرض إن عصابة الإخوان تعمل هجوم ضد مؤسسات الدولة والاستيلاء عليها في 2013 بالسلاح زي ما عملت حماس واستولت على غزة 2007

 

 ● إنتو أكتر شعب متسلط على مصر

لما بتصرخو وتقولو هي مصر فين؟ الجيش المصري فين؟ ليه مش بتفتحو معبر رفح ولو بالعافية، مش بتصرخو وتقولو هو الجيش التركي فين، ولا الجيش الإيراني فين، ولما يكون دول الخليج فاتحة ع البحري معاكو مش بتقولو السعودية فين والإمارات فين.

أما مصر على طول الخط نفسكو ما بيتقطعش من صرخة "هي مصر فين"، مع إن مصر أكتر دولة بتديكو مساعدات، أكتر دولة حكومتها غدرت بشعبها وإدتكو إمتيازات ووظايف وأملاك ما تستحقوهاش في مصر، أكتر دولة عايشين فيها أحسن من أهلها، أكتر دولة عملت مشاكل مع أمريكا وإسرائيل وبلاد تانية عشانكو، أكتر دولة كان جزء من مؤامرات إسرائيل ضدها هو إنها بتقف معاكو، ده غير دم المصريين اللي سال في معارك عشان بيدافعو عنكو.

إيه قدمت ليكو تركيا وإيران ودول الخليج زي مصر؟

طيب لو قدمو ليكو زي مصر وهام عندكو أحسن من مصر ما تسيبو مصر في حالها وامسكو في ديلهم هما، واصرخو عليهم هما وقولو فين تركيا وإيران والسعودية والإمارات إلخ. وحلو عننا بقى، ولا سكتناله دخل بحماره، ومتسلطين علينا تبقو سلاح تخلو مصر تفضل تنزف في اقتصادها ودمها وجيشها وما يقومش ليها قومة؟

● أقولكو التقيلة فوق ده كله.. الإسرائيليين ليهم ميزة عليكو

الميزة إن الإسرائيليين مكنش ليهم وطن، فاتجمعو مع بعض وعملو وطن ودولة، أما إنتو فكان ليكو وطن، وكان ممكن يتحول لدولة لو بقيتو شعب واحد مش مليشيات، وبقى هدفكو تعملو الدولة، لكن اخترتو عيشة المليشيات، وكل شوية فيكو تشغله دولة أجنبية بالزراير أو الفلوس أو لعبة الدين أو غيره، وأكتر من نصكو اختار يطفش من فلسطين ويفضل برة، وفلسطين تبقى قضية يسترزق منها ويعمل صعبانيات وهو برة مش أكتر.

فإنتو حتى ما حصلتوش اليهود اللي شايفينهم أوحش الناس، لا إنتو أوحش منهم، هما حرامية خدو أرض غيرهم وعملو عليها وطن، وإنتو حرامية بمعنى عايشين على ابتزاز شعوب غيركو إنهم يصرفو عليكو ويحاربو عشانكو، ونصكو طفش يحتل بلاد غيره، وضيعتو الوطن.

 

 إسماعيل هنية بيعترف إنه حركة حماس بتعمل عمليات عشان تحمي إيران

والخلاصة في نهاية الدش البارد

 

يا فلسطينيين من كل الألوان، جوة فلسطين والهربانين برة:

 

   إنتو مش أكتر شعب بيعاني أو اتظلم، غيركو اتظلم أكتر منكو.♦

♦ إنتو أول شعب في التاريخ يتكافئ عشان نصه هرب من بلده وسابها للاحتلال، والنص التاني عايش مليشيات للي يدفع ويمول، ويمشي قضية بلده حسب هوا اللي يدفع.

♦ إنتو شعب عوالة على البشرية، لأنكو الشعب الوحيد، اللي عايزين العالم يحرره ويأكله ويشربه ويدلعه ويعلمه ويوظفه، ويستقبله لما يحب يطفش، ويديله الجنسية والامتيازات.

♦ إنتو أشطر شعب في الصعبانيات، وبتعلمو عيالكو الخطب بتاعة استعطاف الناس وهما بيرضعو، وكتير منكو ما يفرقش معاه حتى لو قال كلام كدب عشان يجيب استعطاف، ما يساووكوش في صناعة الصعبانيات إلا اليهود.

♦ إنتو الشعب الوحيد اللي اتخصصله أكبر مساعدات وتبرعات وتمويلات من غير رد في التاريخ.

♦ إنتو أكتر شعب فاشل ومليشياوي، لأنكو الشعب الوحيد اللي له أرض وفشل طول التاريخ يعمل دولة وطنية وجيش واحد.

♦ إنتو أكتر شعب غدر باللي ساعدوه وآووه وضحو عشانه، ومنه غدركو بمصر.

♦ إنتو مالكوش حقوق على أي شعوب تانية، والشعب اللي يقدر يساعدكو بحاجة تبقى بمزاجه وعلى قد طاقته مش حسب شروطكو.

♦ إنتو بير مالوش قرار، ما بتشبعوش مهما البشرية إدتكو مساعدات وامتيازات.

♦ إنتو أكتر شعب لعب بكارت الإسلام بحجة يحرر أرضه، وهو أقل شعب خدم المسلمين أصلا، ومن أكتر الشعوب اللي غدرو بالمسلمين.

♦ إنتو أكتر شعب يتكلم عن الصمود.. بس إنتو الشعب اللي هرب أكتر من نصه برة، والنص التاني مستني شعوب تانية تحرره، أما المليشيات اللي بتعمل عمليات ضد إسرائيل فيبقى حسب مصالحها الحزبية أو مصالح اللي بيمولها مش مصلحة تحرير فلسطين.

♦ إنتو أكتر شعب يتكلم عن العزة، في وقت إنتو أكتر شعب عايش ع قفا غيره بالشحاتة شوية، وبالابتزاز شوية، وبالتهديد بمليشياتكو شوية

♦ إنتو أكتر شعب يتكلم عن إنه بيحمي العرب والدين، بس استغليتو قضيتكو تخربو بيها بيوت شعوب المنطقة وتكرَّهو الناس في الدين.

♦ إنتو أكتر شعب عايش على تهديد العالم بالابتزاز وغيره، ما يساووكوش إلا اليهود في ابتزاز العالم بالهولوكوست والسبي البابلي، فلو طلبتو من شعب إنه يحارب عشانكو ولا يدخل بلده في مشكلة عشانكو ورفض، أو طلبتو تدخلو بلده باسم لاجئ وبعدين عايزين تبلطو وتاخدو الجنسية ورفض، تتهموه بإنه صهيوني وخذل فلسطين والدين، وتعتبرو إن الحرب عليه حلال.

اللي بيعمل ده منكو شرهم على المنطقة والدين أكتر من شر الإسرائيلي المكشوف.

فهتوصلو الناس لدرجة يقولو سوا غزة محتلها الإسرائيلي أو بيحكمها الفلسطيني الاتنين زي بعض.

في الآخر.. إنتو مالكوش عند حد حاجة إلا إسرائيل وبريطانيا وأمريكا.

وأي مساعدة تجيلكو من أي بلد تاني، تقبلوها باحترام، وتبوسو إيديكو وش وضهر.

والأكرملكو تلغو المليشيات، وتتلمو في كيان أو جيش واحد، وتلمو الضفة على فلسطين، وتبدأو كفاح بعقل وبحسابات وطنية.. عشان تبقو فعلا شعب مناضل ومحترم.

وكلمة للفلسطينيين، وغالبا هما قليلين، اللي فاهمين الكلام ده، ومش بيحبو يفرضو نفسهم ولا قضيتهم على بلاد غيرهم، وشايفين إن فعلا شعبهم هو المجرم الأولاني في حق نفسه، وهو اللي المفروض يتحمل المسئولية نمرة 1، ومفيش بلد يتفرض عليه يبقى مسئول عنهم، فربنا يبارك فيكو، ودوركو تنشرو الروح دي وسط عيالكو وصحابكو وفي الإعلام، عشان فلسطين ما تخسرش اللي باقي ليها من حبايب وشعوب.

 

تصنيف : أعداء الهوية المصرية,الهكسوس والنظام العالمي الجديد,تاريخنا بعين فلاح,مين هكسوس العصر