"حرب السمعة"..عبد الناصر يكشف اتفاق"عربي" لضرب سمعة مصر عالميا، والحال بيتكرر 2025 ~ كيمة والهكسوس

بقلم: إفتكار السيد (نفرتاري أحمس)

في سنة 1970 طلَّع الرئيس جمال عبد الناصر كلام كتير كان مكتوم في صدره، مكنش متعود يقوله عن مؤامرات دول المنطقة على مصر، وصلت لدرجة إنهم يخلو مصر في حرب على طول الخط، وهما يتفرجو عليها، ويعملو حملات تشويه سمعة مصر في العالم، وكأنه وصل وقتها لإن أكترية اللي بيتكلمو عن "العروبة" كان قصدهم يستنزفو بيها مصر، أو يخلَّصو عليها.

وكنا عرضنا قبل كدة كذا مقالة، جبناها من نصوص الوثايق ومحاضر الاجتماعات وجلسات مجلس الوزرا المنشورة في موقع جمال عبد الناصر الرسمي، عن الصدمات اللي شافها عبد الناصر من "القومية العربية"، زي ندمه الشديد على قبول الوحدةالمشئومة مع سوريا سنة 1958، وإنه شاف إن مصر وسوريا بلدين مش شبه بعض خالص، لا في التاريخ ولا الحاضر، وقال نصا: "مصر ليست سوريا"، وعن إنه اتكلم في سنة 1967 بعد الحرب في مقابلة مع الرئيس السوفيتي، نيكولاي بادجورني في القاهرة، عن إنه في فرق كبير بين الهوية المصرية وهويات الدول اللي حوالينا، وإن مصر "أمة"، أما الشعوب اللي حوالينا كتير منها قبايل وطوايف.

كمان جبنا مقالة عن شهادته بخصوص مؤامرات السعودية مع أمريكا على مصر قبلوبعد 1967.

أما في سنة 1970، فواضح إنه وصل صبره لآخره، وبعبع كتير من المرارة اللي جواه، قليل منه طلعه في خطب، وكتير منه في جلسات مقفولة مع مسئولين مصريين أو من دول تانية، ومنهم اللي هنعرضه إنهاردة.

قناة "ناصر تي في" نشرت يوم 27-9-2025 تسجيل بصوت الريس عبد الناصر وهو في اجتماع مع الرئيس الموريتاني، مختار ولد داده، اللي كان بيزور مصر، في 6-9-1970، وناصر بيعرضله مواقف دول المنطقة من حرب الاستنزاف اللي كانت شغالة بين مصر وإسرائيل، ومن موافقة مصر على مبادرة "روجرز" اللي هي هدنة بين الاتنين.

وحلو إنه اتذاع بصوت الريس، لأن نص كلام ناصر وولد داده متوثق ومنشور في موقع جمال عبد الناصر، بس التسجيل بالصوت بينتشر وسط الناس أكتر، وهعرض هنا من الوثايق دي وهنحط رابط الفيديو بتاع حلقة قناة "ناصر تي في"، ورابط وثيقة محضر الاجتماع.

الحوار فيه نقط كتيرة، من أهمها إن كذا دولة، مع إنهم رفضو يساعدو مصر، وعايزينها تفضل تحارب وهي تشيل أكتر الحمل وتضحيات الحرب لوحدها، بس كان في نفس الوقت عاملين حملة ضد سمعة مصر، بإنهم بينشرو في كل مكان في العالم، إن مصر "باعت العرب"، و"باعت قضية فلسطين"، و"بقت مستسلمة لإسرائيل"، ويحملوها قصاد شعوبهم والعالم مسئولية ضياع فلسطين.

وده نفس اللي بيحصل دلوقت من فلسطينيين وسوريين وجزائريين وتوانسة إلخ من ناس بتسوقهم عصابة الإخوان المسلمين وقنوات فضائية، عاملين حملة دولية، بينشروها في كل العالم، بتقدم مصر إنها بتشارك في "تجويع غزة"، وإنها بتمنع دخول المساعدات لغزة، وإنها باعت فلسطين إلخ عشان يدارو على دور حركة حماس وإسرائيل، ويخلو المصريين حاسين بالذنب، ويفضلو يقبلو إنهم يقدمو نفسهم وعيالهم وبلدهم قرابين لفلسطين، بحجة يكفرو عن "تقصيرهم" ناحية فلسطين.

عبد الناصر وولد داده والسادات بالترتيب من اليمن

نص الحوار

دلوقت هنشر نص الحوار، والتعليق أو التوضيح اللي هحطه من عندي هيكون بين أقواس زي دي ((....)).

● العرب بيجبولنا المرض أكتر من إسرائيل والأمريكان

عبد الناصر للرئيس الموريتاني: الحقيقة نحن أيضا نواجه مزايدات عربية، حاجات عربية الحقيقة بتكون تسبب لنا أمراض نفسية أكثر من الإسرائيليين والأمريكان! يعني أما نقعد مع بعض نتكلم بيحصل فهم، لكن بعد كدة في العلن بيحصل كلام آخر!

((عبد الناصر كان اشتد عليه المرض واتوفى في نفس الشهر، يعني بعد الاجتماع ده بـ 22 يوم))

ثم يعني إحنا اللي على خط النار، يعني أنا بيني وبين اليهود 200 متر بس اللي هما قناة السويس.

وإحنا قاتلنا الحقيقة الـ 18 شهر اللي فاتو ولغينا وقف إطلاق النار، وقاتلنا وعندنا خسائر وسببنا خسائر لليهود، ولكن كنا نقاتل وحدنا الحقيقة، ثم انهاردة ميزانية القوات المسلحة 553 مليون جنيه، سنة 67 كنا 160 مليون جنيه، دلوقتي 553 مليون جنيه، وده على حساب التنمية وعلى حساب كل شيء.

((يقصد ناصر حرب الاستنزاف اللي دخلتها مصر وحدها، وبسببها اتسحب من مشاريع التنمية فلوس كتيرة عشان تدخل في ميزانية التسليح والحرب، وفطت ميزانية الجيش لأكتر من 3 أضعاف في 3 سنين، من 1967- 1970)).

وإخوانا برضه في الجزائر الحقيقة، لازم اتكلموا معاك لما رحت في أديس أبابا.

ولد داده: سمعت كلام وإنهم متحمسين، ولكنهم بعيدين عن الجبهة.

عبد الناصر: والله هم يتلككون لنا على أي شيء! حينما كان أنور السادات عامل اجتماع مفتوح للطلبة، والطلبة يسألوه وهو يجاوب، فوقف طالب جزائري موجود هو عندنا هنا في منحة، وسأله وقال له: إن الدول العربية تساعد وإن الجزائر تساعد، ما هي مساعدات الجزائر؟

فرد عليه أنور السادات بالحقيقة.. ما كان فيه مساعدات ((مفيش مساعدات من الجزاير)) قاله إنه في كتيبتين، فقاله ((الطالب)) بيقولو في الجزائر إنهم ادوكوا طيارات بعد 67، فقال له ((السادات)): لأ.. هذه الطيارات جت لنا من الجزائر، ولكن عوضت عنها من الاتحاد السوفيتي.

((كان ناصر قال في خطاب علني قبل كدة إن الجزاير خصمت الطيارات دي من طيارات كانت جاية لمصر من السوفيت، يعني اللي إدته لمصر خدته من الطيارات اللي كان هيديها السوفيت لمصر)).

عبد الناصر يكمل: هما ((الجزاير)) زعلو من هذا الكلام، لكن هذا الكلام هو الحقيقة، يعني ليه يزعلو من الحقيقة؟!

ثم أبلغ ((الطالب الجزايري)) السفارة، وكان موجودين الطلبة الجزائرين كلهم، إن أنور السادات هاجمنا، ده لا يمكن إنه يُعتبر هجوم.

●ساعدنا الجزاير وما رضيتش تساعدنا وليبيا والكويت والسعودية قدمو دعم مادي

في مكان تاني من الحوار بخصوص الجزاير، يوضح أكتر ناصر.

عبد الناصر: بعدين برضه إحنا الحقيقة الجزائريين في ثورتهم لما جه هنا بن بيلا ((أشهر رموز ثورة الجزاير وبقى رئيس الجزاير قبل ما هواري بومدين يزيحه ويبقى هو الريس سنة 1965)) ما كان عنده بندقية! إحنا إديناله كل حاجة، وبومدين طلع كان طالب هنا، وهو طلع من اليخت بتاعي أنا اللي هو أصلا بتاع الملك فاروق، وهو طلع وشال السلاح ولغاية ما وديناه الجزائر ونقلنا الأسلحة، ثم فتحنا لهم اعتماد وكذا.

يعني عيب إن إحنا نطلب من حد يعني، نفسنا لا تسمح لنا أن نطلب، ولكن إحنا الجزائريين لم يساعدونا بمليم واحد.. بجنيه واحد بعد العدوان! يعني السعودية والكويت وليبيا دفعو اللي هو نتيجة مؤتمر الخرطوم ((مؤتمر اتعمل في 1967 بعد العدوان وقال عبد الناصر في خطاب سنة 1970 إن السعودية بعده ما قدمتش حاجة تاني))، بعد هذا هجَّرنا نص مليون من منطقة قناة السويس، معامل البترول بتاعتنا والسماد كلها اتدمرت، لم يساعدنا حد، كله اعتمدنا على نفسنا. الحقيقة فرضنا ضرائب كبيرة على الناس، ولكن لم نطلب ولن نطلب منهم، ولا من أي حد، الحقيقة إحنا نقدر نعتمد على نفسنا.

وهم يهاجمونا بدون مناسبة، بيقولو: يجب الحرب وهم ضد وقف إطلاق النار، لماذا نقبل وقف إطلاق النار 3 أشهر؟ وعلشان قبلنا وقف إطلاق النار سحبو الكتيبتين اللي كانوا موجودين هنا إلى الجزائر!

يوم ما هما اتخانقو مع المغرب ما كان عندهم جيش، المغرب هاجمتهم، بعتوا لي هنا، بعتنا لهم طيارات ودبابات ومظلات، كل اللي طلبوه بعد 3 أيام كان عندهم، ولكن عيب الواحد يقف يتكلم، ولكن أنا قلتلهم: يا جماعة إحنا اللي على الجبهة وإنتو أصول تؤيدوا ما نراه، إنتو ناس بُعاد وإحنا ناس بننضرب كل يوم بالطيارات.. يعني إحنا في يوم هنا فيه منطقة انضربت 4000 قنبلة كل قنبلة 1000 رطل! 2000 طن قنابل!

عبد الناصر وبيبص على هواري بومدين في اجتماع بتاريخ 29-11-1966 (موقع جمال عبد الناصر)

● ضرب سمعة مصر في كل مكان

عبد الناصر: ليه هما إخوانا في الجزائر واخدين هذا الموقف؟ ما بعرف! ومتفقين مع العراق علينا دلوقتي، يعني فيه اتصالات بينهم وبين العراق ونحن نعلم بين بوتفليقة والعراقيين، الغرض.. العمل ضدنا في البلاد العربية والأفريقية وفي كل مكان، حتى وفي الطلبة العرب في الخارج.

ولد داده: ده السبب؟! (ضحك)

عبد الناصر: ما بعرف، وفي تنزاينا هم يعلمون ضدنا حتى مع الأفارقة، ومع جماعات التحرير الأفريقية، ما بعرف والله إيه السبب! في الوقت اللي إحنا فيه إحنا اللي قاعدين تحت ضغط اليهود وضغط إسرائيل.

بيقولوا: إحنا دلوقتي استسلمنا والعمل اللي إحنا عملناه ده، قبول المبادرة الأمريكية ((مبادرة روجرز عرضها وزير الخارجية الأمريكية عشان وقف إطلاق النار بين مصر وإسرائيل، وناصر قبلها عشان يخلي أمريكا تبطل تزود إسرائيل بطيارات فانتوم، وياخد هو فرصة يكمل حائط الصواريخ والتسليح))، طلعوا بيانات في الجزائر إن ده خيانة للأمة العربية وخيانة للعرب وخيانة لفلسطين وللقضية الفلسطينية، وإن لابد أن نحرر فلسطين كلها!

طب إزاي هنحرر فلسطين كلها؟! بقالنا 22 سنة ما قدرنا نعمل شيء! كيف تطلب يعني تحرر فلسطين كلها يا نسيب أرضنا المحتلة تحت حكم اليهود! طب إذا كنا مش قادرين نحرر فلسطين كلها، طب إذا كنتوا إنتو تقدروا تحرروا فلسطين كلها تعالو..مفيش، فيه كلام بس!

لما إحنا أوقفنا القتال زعلو، طب تعالوا قاتلوا هنا، أنا ما عنديش مانع بييجي الجيش الجزائري يقاتل، بيقولو لأ.. ده ما فيش حرب، طب الغارات والعمليات كل يوم؟ ما فيش! طلبنا منهم طيارين جزائريين ما إدوناش ولا واحد! إحنا عندنا طيارات أكتر من الطيارين، الآن إحنا طلبنا من الاتحاد السوفيتي وإدونا طيارين يشتغلو معانا.

فالموقف محير! لماذا وليه؟ أن ما بعرف! وأنا رحت مريت على الجزائر بعد مؤتمر القادة العرب في المغرب في ديسمبر الماضي، وقلت لبومدين: يعني ليه جرايدكو بتكتب علينا الكلام اللي بهذا الشكل؟! بيقولو إن إحنا بنفتح كباريهات علشان نلهي الناس عن المعركة! الجرايد الجزائري، طب إحنا بنفتح كباريهات إيه؟! إحنا عندنا 650 ألف جندي، 650 ألف مجندين كل خريجي الجامعات وكل البلد، وماشيين على ديسمبر الجاي بيبقى عندنا 750 ألف جندي.

بيقولو: إن من يسمع البيانات المصرية عن المعارك يعتقد أن إسرائيل كلها قد انتهت! ولذلك الناس في مصر لا تسمع إذاعة مصر، تسمع إذاعة لندن! قلت لبومدين: ليه الكلام ده؟! قال: والله إحنا ما بنسيطر على الجريدة وبتاع!

((يعني بومدين بيتهرب من مسئولية اللي بيتكتب في الجرانين بتاعة الجزاير عن مصر)).

ما بعرف إيه السبب إلا بقى المجموعة اللي هما بوتفليقة والمجموعة دي بالنسبة لينا من الأول هما شعورهم مش طيب من أيام بن بيلا ((لما كان أحمد بن بيلا رئيس للجزاير وكان العلاقة بينه وبين عبد الناصر حلوة)) لكن بومدين كان هنا معايا وكان باستمرار كويس، والحقيقة هو الوجه العربي اللي موجود قصادي الوحيد المجموعة كلها في الجزائر.

جمال عبد الناصر مع الجنود على الجبهة

●"العرب" هيتفرجو ومصر بتضربها الفانتوم

عبد الناصر: والآن اليهود لا يتكلمون عن الجزائر ولا عن العراق ولا عن سوريا اللي بيهددو بالحرب، لكن كل كلامهم عن تهديد مصر.

طيب إذا الأمريكان قالو ((قالو لمصر)): إذا إنتو ما قبلتو ((مبادرة روجرز) هيدو اليهود الطيارات الفانتوم اللي عايزينها-120 طيارة- تستخدم ضد من هذه الطيارات؟ لا هتستخدم ضد سوريا ولا العراق ولا الأردن ستستخدم ضدنا فقط. 100 غارة كل يوم 100، 120، 130، أليس لي الحق في إني أتحرك حركة سياسية في هذا؟! أبدا.. العرب بيقولو أبدا تقعد تحارب!

إنتو موافقين، العراق موافقة على وقف إطلاق النار من 67 ولم تنقضه، وسوريا موافقة على وقف إطلاق النار ولم تنقضه، والأردن موافقة على وقف إطلاق النار ولم تنقضه، أنا اللي نقضته في العام الماضي.

((يعني كلهم التزمو إنهم ما يفتحوش جبهات ضد إسرائيل ولا يحاربوها، وعبد الناصر الوحيد اللي فتح جبهة بحرب الاستنزاف، ومع ده عايزينه يمشي في سير الحرب أو السلام حسب مزاجهم هما اللي مش بيحاربو ولا بيساعدوه)).

بيقولولي: دلوقت إنت تحارب، ما تقبلش وقف إطلاق النار! والجزائريين برضو بيقولولي: لا تقبل وقف إطلاق النار، طب كل الجبهات فيها وقف إطلاق النار، هل هو ذنبي إن أنا جيت من سنة ونص وقلت: إن إحنا لا يمكن أن نقبل وقف إطلاق النار بدون حدود، يا بنحدد وقف إطلاق النار مع انسحاب يا بننهيه، ثم نهيناه، وفيه حرب مستمرة بقالنا سنة الحقيقة من 69 ((حرب الاستنزاف بين مصر وإسرائيل)).

الطيارة الفانتوم الأمريكية F4E (المصدر ويكيميديا- Oren Rozen)

● سوريا عايزة مصر في حرب عشان إسرائيل تنشغل عنها

عبد الناصر للرئيس الموريتاني: السوريون حتى بيعيبو علينا وقف إطلاق النار! ده إنتو عندكو وقف إطلاق النار من 67 وما فيش ولا طلقة على الجبهة السورية، إلا حاربتو 3 أيام في 3 مناسبات في الـ 3 سنوات! كل سنة بيوم، إلا إحنا، كل يوم بتسمعو طبعا عندكو الأخبار. ((يقصد أخبار حرب الاستنزاف اللي بين مصر وإسرائيل)).

ولد داده: آه

عبد الناصر: يوميا غارات إسرائيلية وغارات مصرية معارك دايرة مستمرة، الجبهة السورية ما في معارك! زعلانين جدا إن إحنا قبلنا وقف إطلاق النار، بعتنالهم زعلانين ليه؟ إنتو قابلين وقف إطلاق النار! بيقولو وقف إطلاق النار على مصر بيخلي إسرائيل تجيب قوات على الجبهة السورية ! (ضحك) فالحقيقة موقف يعني مؤسف.

● حكومات تقول لناصر حارب وهنحصلك بعد 30 سنة

عبد الناصر: الفلسطينيون.. يعني أنا بقول لهم: إحنا عايزين حل سلمي، ياريت ناخد حل سلمي، لأن فيه 1.5 مليون فلسطيني الآن تحت حكم إسرائيل والقدس والضفة الغربية وغزة تحت حكم إسرائيل، إذا كان الحل السلمي يمكن من أن نستعيد هذه الأراضي ونحرر هؤلاء الناس لماذا لا تنفذ هذا الكلام؟!

وإلا فالبحرب.. أنا إيه اللي هيوديني القدس؟! مين هيوديني الخليل حتى؟! ((مدينة الخليل في الضفة الغربية)) لو أتحرك من هنا مين يوديني الخليل؟! حتى الأمريكان سيتدخلو إذا وجدوني سأعبر حدود إسرائيل، هل الجيش العراقي والسوري والأردني يستطيع أن يحرر؟ بيقولو لأ.. هل إنتو تستطيعو أن تحررو؟ بيقولو: بعد 30 عام.. 30 عام!

((يقصد ناصر إن الفلسطينيين عايزين الجيش المصري بعد ما يحرر سينا لازم يدخل فلسطين لحد ما يوصل للقدس ويحررها، مع إنهم عارفين معنى ده إن أمريكا نفسها هتدخل الحرب ضد مصر عشان تمنعها، ومفيش جيش في المنطقة هيقف مع مصر، والكلام ده معناه إنه في ناس ظلمت الريس السادات لما قالو إنه كان المفروض يكمل حرب في 1973 لحد ما يوصل القدس، فعبد الناصر نفسه كان عارف إن ده فوق طاقة مصر، وهتدخل أمريكا الحرب مباشر، ومحدش هيقف مع مصر بجد)).

تلميذة من شهدا ضرب إسرائيل لمدرسة بحر البقر في مصر سنة 1970 في وقت كان أكتر البلاد اللي عايزة مصر تفضل في حرب دايمة مش بتضربها الصواريخ الإسرائيلية

● الفلسطيني ساب بلده تضيع وبيحارب الأردن

عبد الناصر: طب إذا بعد 30 عام سنة الكل بيكون راح.. الـ 1.5 مليون دول بيكونو ضاعو وصفوهم، والأرض كلها بياخدوها اليهود؛ لأن النهاردة بيعلنو إنهم عايزين ياخدوها وبيبنوا فيها مساكن لليهود، يقعدو معايا يجدو كلامنا معقول، لكن برة بيقولو: فيه مزايدات ما نقدر أبدا نبعد عن هذه المزايدات! وهم الآن لا يحاربو إسرائيل ولكن يحاربو الأردن!

((يقصدعبد الناصر أحداث أيلول الإسود، يعني المعارك اللي عملها الفلسطينيين في الأردن ضد الجيش الأردني في شهر 7 سنة 1970، بعد ما الأردنيين آووهم في بلدهم وهما عملو جماعات مسلحة واستغلو السلاح في الحرب على الجيش الأردني عشان يتحكمو في الأردن)).

مسلحين في المليشيات الفلسطينية في الأردن قبل طردها بعد معارك أيلول الأسود بينها وبين الجيش الأردني

● خصومة الجزاير لمصر.. كلمة السر ليبيا

عبد الناصر: طب ليه الجزائر ماشية معاهم؟ هناك الموضوع الأساسي هو ليبيا، بعد ثورة ليبيا الناس في ليبيا بعتولي، إحنا هنا لنا مبدأ، نحن لا نقيم أحزاب خارج مصر كما يقيم حزب البعث، ولا نجند عرب خارج مصر، هذا هو مبدأنا، أما البعث فيقيم أفرع والقوميين العرب والأحزاب الأخرى.

الليبيون طلبو مننا مساعدات عسكرية أعطيناهم، حينما قامت الثورة وزير الدفاع ووزير الداخلية في ليبيا تآمرو ضد مجلس الثورة، طلبو مننا قوة الليبيين، الحقيقة اتصلو بيا بالليل وقالو وهم لا يعلمو حدود المؤامرة عليهم والقوات اللي معاهم قليلة جدا، وهما عايزين مننا قوات تبقى تحت أوامرهم بحيث يقدرو يواجهوها.

الحقيقة نحن في الحال استجبنا وبعتنا لهم بالطيارات قوات من المظلات وهي موجودة حتى الآن عندهم، ثم طلبو بعض الدبابات تكون موجودة على الحدود إذا احتاجوها نرسلها، ثم طلبو بعد هذا أن نرسل الدبابات بأطقم مصرية حتى يدربو ناس من المخلصين بتوعهم عليها ويستلموها الليبيين، وإحنا وافقنا الحقيقة لأن كان رأينا إن الإنجليز والأمريكان سيضربو الثورة، وأنا قلت لهم: كل ما تطلبوه، ثم بعتنا ناس من عندنا ليدربو الجيش الليبي بحيث يبقى في احتفال الثورة في أول سبتمبر يستطيع إنه يعمل استعراض، وهذا ما حصل في الأسلحة الثقيلة والدبابات وكل شيء.

((واضح إن ناصر بعت قوات وسلاح وتدريب لليبيا عشان ما تسقطش في إيدين الأمريكان، وما يبقاش ليبيا فيها من تاني قواعد أمريكية زي اللي كانت موجودة قبل ثورة ليبيا ممكن تضرب ضهر مصر وهي بتحارب في سينا، بس الجزاير ما راعتش ده، واهتمت بمنافسة بينها وبين مصر على النفوذ في شمال أفريقيا، وفي نفس الوقت بتطلب إن مصر تفضل في حرب)).

حينما كنت في الرباط قال لي الملك الحسن: إن بومدين زعلان لأن إحنا بعتنا قوات إلى الليبيين! وبيقول: إن ده بيهدد تونس، وإن تونس بهذا بترتمي أكثر وأكثر في أحضان الفرنساويين والأمريكان!

فأنا الحقيقة كان سافر بومدين، وأنا قلتله إن أنا هاعدي عليك في الجزاير وأنا رايح ليبيا، وقتلله: والله قولو لي هذا الكلام في المغرب، طب ليه إنت ما قلتلي وأنا كنت معاك؟ ليه ما سألتني؟ قالولي: إنك زعلان من الملك الحسن، فقالي: والله بإرسال القوات المصرية إلى ليبيا بيخلق موقف دولي معقد!

قلتله والله أنا ما فكرت في الموقف الدولي، إنتو طلبتو مني في يوم من الأيام إني أرسل ليكو قوات لأحميكو من الهجوم المغربي، ما فكرت في الموقف الدولي، كان عندي 1000عيلة مصرية في المغرب مدرسين وفنيين ما فكرت فيهم، بعتلكم اللي طلبتوه، قعدنا وخدنا قرار بإلحاح إن إحنا نرسل لكم ما تطلبوه، طردو الـ 1000 عيلة، وقعدو أسبوع في المطار في العراء، الستات والأطفال طردهم إخوانا في المغرب! وأنت تعلم هذا، اشمعنى أياميها ما فكرتش في الموقف الدولي والنهاردة بتفكر في الموقف الدولي؟

قلتله: يعني ليه كدة.. وليه هذه المواقف؟! هما بيعتبرو ليبيا من المغرب العربي، وليبيا متجهة نحو مصر، وهما زعلانين من هذا، طب هما دلوقتي علاقاتهم مع المغرب ومع تونس، وأنت تعلم طبعا، علاقة قوية جدا، وفيه اتصالات مستمرة وبيجاملو حتى المغرب جدا وتونس جدا، إحنا ما زعلنا أبدا.

ده الحقيقة الموقف مع الجزائر.. غريب!

وهو بيقول ((يقصد بومدين)): إن قضية فلسطين للفلسطينيين، هذا الشعار نفسه شعار بالنسبة لينا ما أنا أقدر أٌول قضية فلسطين للفلسطينيين، وأحرر سيناء بس، وهذا ما يطلبه مني الأمريكان، يعني أنا إذا اتفقت على سيناء بس بيبقى راحت الضفة الغربية والقدس خالص! هما بيقولولي: سيناء مافيش مشاكل عليها، الملك حسين كيف يستعيد الضفة الغربية والقدس حينما نخرج نحن من المعركة؟! وبالحرب كيف يستعيد؟!

عبد الناصر والقذافي

● العراق عايزين نص الجيش المصري برة مصر

عبد الناصر لرئيس موريتانيا: العراقيون بيقولو: هاتو نص الجيش المصري ودوه هناك في الجبهة الشرقية.. لا يمكن الحقيقة.

((غالبا يقصد ناصر العراقيين عايزين قوات من الجيش المصري تروح ع الجبهة الشرقية عند سوريا والعراق)).

هذه هي مشكلتنا مع إخوانا العرب، وهذا حالنا دايما، يعني الحقيقة باستمرار بتطلع هذه العمليات وهذه المزايدات، ولكن في الجزاير بيشتمونا دلوقتي بيقولو علينا إن إحنا خونا القضية العربية في البيانات والنقابات والكلام ده ((يعني البيانات والنقابات الجزايرية)) وفي نفس الوقت إسرائيل بتهددنا.

يعني إحنا إمبارح عندنا معلومات إن إسرائيل ممكن تقوم بعمل انهاردة ((ضد مصر))، والروس اتصلو بالأمريكان إمبارح بعد الظهر وكلموهم وأنذروهم إن إذا حصل شيء فإن أمريكا تتحمل نتيجته، وقاعدين طول الليل إمبارح بعد العشاء وقبل العشاء بنشوف إيه الترتيبات اللي نعملها، وأخدنا ترتيبات كتيرة جدا، لكن هما في الجزاير ولا حاسين بالموضوع.

حاسس بإيه؟! عنده ثورة صناعة وثورة زراعية، بتسمع هذا الكلام، إحنا هنا والله الإصلاح الزراعي لاغيينه كله بدل 200 ألف فدان في السنة بنعمل 40 ألف فدان إصلاح زراعي، كهربا السد العالي 10 مليار مالهاش مصانع، ما عملناش مصانعها، مياه السد العالي موجودة ما عملناش الأرض بتاعتها!

((يقصد ناصر إن حكومة الجزاير بتتحجج في قلة المساعدة في الحرب بإن وراها مشاريع صناعية وزراعية تنمي بيها البلد، في الوقت اللي عايزين مصر تفضل في حرب مع إن مصر في مشاريع زراعية وصناعية أجلتها عشان الحرب)).

مش معنى ده بس إن إحنا نستسلم أبدا.. لا يمكن، ولكن إذا كان هناك حل سلمي فلماذا لا نحاول؟ كلهم يقولون برفض الحل السلمي والحرب، ولا يحارب أحد منهم، يعني إذا كان الجزاير بيحارب بـ 2000 عسكري بس اللي هو بعتهم هنا تبقى دي حرب دي؟!

● السعودية عايزة مصر لوحدها في حالة حرب

عبد الناصر: وحاولنا نتفاقهم معاهم الجزائريين ما في فايدة، حتى عملو بيان مع السعوديين استنكرو فيه قرار مجلس الأمن والحل السلمي، الجزائريين مع السعوديين.

ولد داده: مع السعودية؟

عبد الناصر: السقاف وبوتفليقة، السقاف (عمر السقاف مسئول في وزارة الخارجية السعودية) كان يزور الجزائر وبوتفليقة كان معاه طلع بيان من مدة من قبل عملية روجرز دي عملية من 7-8 أشهر، واستنكرو قبول قرار مجلس الأمن، وأن الكفاح المسلح والقتال هو السبيل الوحيد لتحرير الأرض!

طب ماذا تعمل السعودية لهذا؟ ما عنده يعمل شيء، السعودية ما عندها جيش السعودية عشان يحارب! (ضحك) الحقيقة أنا اتكلمت بالتفصيل.

في مقالة سابقة نشرنا كلام عبد الناصر إن السعودية شمتت في مصر وحرضت ضدها بعد 1967

● سوريا تحارب بالكلام، والفلسطيني بيحارب الأردن

عبد الناصر: السوريون يحاربون بالكلام يوميا 50 خطبة و50 بيان ولا يطلقون طلقة واحدة على الإسرائيليين! الأردنيون الحقيقة يعني وضعهم غلابة، والملك حسين حتى النهاردة ماهواش سيد في بلده لأن الفلسطينيين الآن يشاركوه بالسلاح غصب عنه، هو عايز يعني، بيشتموه! وأنا قلتلهم: أي واحد مهما كان حتى متحيز ليكو حينما تشتموه في صحفكو وتقولو عليه عميل الإمبريالية وعميل الاستعمار لازم يتحين الفرص حتى يصفيكو، وإلا ما يبقاش ده بشر يعني، إنتو تدفعو الملك حسين حتى يصطدم بيكم..هذا موقف الفلسطينيين والعرب.

(انتهى ج 1 من كلام عبد الناصر في قعدته مع رئيس موريتانيا مختار ولد داده، والحلقة الجاية ج2 بعون ربنا).

● ضرب سمعة مصر من 1970- 2025

عشان ما نطولش أكتر من كدة، هنحط مواقف بشكل مختصر لدول في المنطقة ناحية مصر، من بعد وفاة ناصر لحد دلوقت (سنة 2025)، ونتابع إن كان غيرت طريقتها في ضرب سمعة مصر ولا لأ:

♦ بعد ما أعلن السادات إنه هيدخل مفاوضات مع إسرائيل، بعد ما عبرنا في حرب 1973، عملت ليبيا وسوريا والعراق والجزاير واليمن الجنوبي ومنظمة التحرير الفلسطينية حلف اسمه "جبهة الصمود والتحدي" ضد مصر، وفي قمة بغداد 1978 اتفقت معظم دول المنطقة على مقاطعة مصر، ونقل مقر جامعة الدولة العربية من القاهرة إلى تونس، بحجة إن مصر باعت القضية الفلسطينية وسابت العرب لوحدهم قصاد إسرائيل.

♦ الحملة ما وقفتش على المقاطعة الاقتصادية أو السياسية، لكن كانت الأشد إعلامية، قاطعو فيها كتير من الأعمال الفنية المصرية، واتسخرت وسايل إعلام في كذا دولة تضرب في سمعة مصر وتضرب اقتصادها، وتسمي جيشها جيش كامب ديفيد، زيها زي قناة الجزيرة القطرية وقنوات عصابة الإخوان المسلمين اللي بتطلع من تركيا وبريطانيا في أيامنا دلوقت.

♦ دول زي الجزاير والعراق وليبيا وسوريا إلخ استضافو المعارضين للسادات، وسابوهم يعملو حملات تحريض ضده وضد مصر كلها من هناك، بنفس الطريقة اللي عملتها تركيا وقطر في استضافة عصابة الإخوان عشان يهاجمو مصر في أيامنا دلوقت، وفي جهات كتير تبعهم سقفت لاغتيال السادات، ويمكن شاركت فيه، مع العلم إن الدول دي ما اتحركتش ضد إسرائيل لما مثلا قصفت مفاعل تموز النووي العراقي سنة 1981.

قمة بغداد 1978، وانتهت جبهة الصمود والتصدي لإن الحلفا فيها حاربو ضد بعض، فسوريا وليبيا مثلا وقفو مع إيران ضد العراق في حرب الخليج1، ولا راعو عروبة ولا إخوة اللي كانو بيقولو مصر "خانتها"

♦ الظريف إن حكومة ليبيا مثلا، ووسايل إعلام وأحزاب في كذا دولة، كانت وهي بتهاجم السادات بعد معاهدة السلام بين مصر وإسرائيل كانت تدارى ورا واجهة جمال عبد الناصر، وتتهم السادات إنه خان مبادئ ناصر في اللي يخص إن ناصر كان عايز يحارب لحد ما تتحرر فلسطين كلها، مع إن عبد الناصر واضح إنه من بعد 1967 على الأقل، مكنش عنده النية دي خالص، وكان عارف إن الدول دي نفسها مش عايزة تحرر فلسطين، لكن عايزة مصر بس تفضل تحارب، وتتاجر هي بقضية فلسطين، والقذافي نفسه سمع الكلام ده من عبد الناصر، بس بعد وفاة ناصر تاجرو كمان بيه عشان يستغلو شعبيته في إن الناس تصدقهم.

♦ السعودية كان ليها طريقة تانية في استنزاف مصر، وهي تسليط عصابة الإخوان المسلمين والسلفيين على مصر، عشان المصريين يفضلو مشغولين بفلسطين بحجة إنها "قضية إسلامية"، ويبقو تبع مشايخ وحكام السعودية، بدل ما يعيدو تفكير في "العروبة" ويرجعو لمصريتهم ولعقيدة "مصر للمصريين"، ويا خسارة في البداية ساعدهم السادات لما طلَّع محابيس عصابة الإخوان من السجون، وسمح للي كانو في السعودية يرجعو مصر.

♦ بعد عملية حماس ضد إسرائيل "طوفان الأقصى" في 7 أكتوبر 2023، اللي اتسببت في رجوع إسرائيل لاحتلال غزة، وقفلها معبر رفح، سخَّر الإعلام الحمساوي والإخواني وقناة الجزيرة وكل اللي زيهم في المنطقة نفسهم في إنهم يرسمو قصاد العالم صورة عن مصر إنها هي السبب في ضياع غزة، وهي سبب الجوع في غزة، وهي اللي قافلة معبر رفح، وحرض قادة في حركة حماس، زي أسامة حمدان وخليل الحية المصريين يقتحمو معبر رفح، رغم عن الحكومة، وحتى لو اتسببت ده في قصف إسرائيلي للمصريين، بحجة ده واجبهم ناحية غزة.

وحتى اللي اتسمت بـ"قافلة الصمود" اللي اتحركت من تونس لمصر في شهر 6 سنة 2025 وكان هدفها توصل رفح، تابعنا إزاي كان من شعاراتها الأساسية وكلامها لوسايل إعلام العالم إن مصر بتحاصر غزة، وهي اللي قافلة المعبر، مع إنهم عارفين إن المعبر مفتوح من ناحية مصر، ومقفول من ناحية غزة على إيد إسرائيل، ومصر أكتر دولة بتدخل مساعدات لغزة.


مثال لتحريض بتوع "قافلة الصمود" على نشر الفوضى في مصر بحجة إنها رافضة إن القافلة تدخل لغزة

♦ تابعنا في الشهرين الأخاري، إزاي اتعملت حملة "حصار السفارات"، اللي راح فيها ناس تبع اليسارجية وعصابة الإخوان وعروبجية إلخ، يتظاهرو قصاد السفارات المصرية في العالم، والظريف إن فلسطينيين اتظاهرو ضد مصر قصاد السفارة المصرية في إسرائيل.

♦ من الغريب كمان إنه رغم إن اللي بيحكمو سوريا دلوقت ما ردوش مرة واحدة على الغارات والضربات الإسرائيلية لسوريا اللي شغالة من ساعة ما أخد محمد الجولاني الحكم في ديسمبر 2024، ودمرت أسلحة ومقرات الجيش السوري، ولا ردو على احتلال إسرائيل مناطق جديدة في سوريا بعد الجولان، لكن كل شوية بتطلع مظاهرات سورية تهاجم مصر لأنها رافضة تدخل حرب مع إسرائيل عشان غزة أو غيرها، ويتهمو مصر إنها هي اللي جبانة مش هما، مع إن غزة مش أرض مصرية محتلة زي ما هما بلادهم محتلة من الإسرائيلي والتركي والأمريكي وساكتين، وبيرفعو كمان شعار "سوريا بقت حرة".

مظاهرة سورية ضد مصر بعد ما المصريين رفضو التحريض على فتح معبر رفح بالقوة وعمل معارك مع إسرائيل عشان غزة

---------------------------------------
المقالة فيديو على قناة كيمة والخاسوت

---------------
المصادر:

1- محضر اجتماع الرئيس جمال عبد الناصر مع الرئيس الموريتاني مختار ولد داده في القاهرة 6-9-2025، منشور على موقع جمال عبد الناصر التابع لمكتبة الإسكندرية.

http://nasser.bibalex.org/Data/Documents1970/89/89.pdf

2- جديد وحصرى | ج1 من لقاء 6 سبتمبر 1970 بين الزعيم جمال عبد الناصر والرئيس الموريتانى المختار ولد دادة

https://www.youtube.com/watch?v=3xPOqNK57oI

3- ديد وحصرى | ج2 من لقاء 6 سبتمبر 1970 بين الزعيم جمال عبد الناصر والرئيس الموريتانى المختار ولد دادة

https://www.youtube.com/watch?v=Saz9jMAp0cQ

● مقالات على المدونة ليها صلة:

1- عبد الناصر عن الهوية المصرية: مصر تختلف عن الدول العربية كلها (وثيقة)

https://kemawaheksos.blogspot.com/2025/05/AbdelNasser-Egypt-war1967.html

2- جمال عبد الناصر عن "الوحدة" مع سوريا: كانت غلطة، ومصر ليست سوريا (ج1)

https://kemawaheksos.blogspot.com/2020/03/blog-post_19.html

3- بالوثائق.. جمال عبد الناصر عن "الوحدة" مع دمشق: الأحزاب والجيش في سوريا أرادوا استغلالنا (ج2)

https://kemawaheksos.blogspot.com/2020/03/2_20.html