 |
| د.ميسرة عبد الله حسين أستاذ التاريخ المصري في كلية الآثار جامعة القاهرة ينفي الخبر الكاذب |
مرة تانية نرجع نقول إنه صحيح كل أجنبي له مصلحة يزيف تاريخ مصر عشان يحتكرها ليه، أو يقول إن له حق فيها، بيخترع الاختراعات عشان يقرطس شعبها فيصدق الخرافات دي ويقبل إن الهكسوس من كل جنس يشاركوه أرضه وحضارته.
لكن برضو صحيح إن
أكتر حد بيقرطس الشعب المصري.. هو الشعب المصري نفسه
لما يستقبل
الأخبار والمعلومات والمسلسلات والأفلام اللي بتتعرض عليه على إنها حاجة صح،
ويتعبش نفسه في إنه يدور على كذا مصدر أو يعرف رأي أهل الاختصاص.
من الأمثلة على
ده إن كتير من وسايل الإعلام في مصر والحسابات ليها كذا سنة كل شوية تعيد وتزيد في
نشر كلام عن إنه في "بعثة مصرية" اكتشفت مئات من الهياكل العظمية
ومراكب قرب أو تحت مية البحر الأحمر، وإن تاريخ "الآثار" دي يرجع لعصر
إخناتون، وإنه جايز يرجع للي روته الكتب الدينية زي التوراة عن فرعون موسى وبني إسرائيل.
الخبر ده اتنشر
كذا مرة، على كذا سنة، وبرضو يرجع ناس مصريين يتورطو في نشره وتصديقه، من غير ما
يعرفو الغرض من نشره ومين وراه، مع إن الحكاية مكنتش محتاجة عشان أي حد فينا يتأكد
من الخبر ده غير كذا حاجة بسيطة:
1- يدور على إيه اتقال على الخبر ده
على كذا موقع وإيه الاختلاف بينها، مش من أول خبر يجري يصدق وينشر
2- يدور على هل وزارة الآثار أو نشرات
الأخبار إلخ اتكلمت عنه ولا لأ، ويدخل صفحة وزارة الآثار وهي موجودة على النت يشوف
اتكلمت عنه ولا لأ، لأنه زي ما إحنا بنشوف إن أي اكتشاف مهم بتعمل وزارة الآثار
عنه مؤتمر، وبيحضره وزير الآثار أو اللي ينوب عنه، وبتغطيه كل نشرات الأخبار
ووكالات الأنباء، وبيتعمل حوارات مع أصحاب الاكتشاف، فما بالنا بخبر عن فرعون موسى
وبني إسرائيل اللي كل وسائل الإعلام في الدنيا نفسها تلاقي فتفوتة في أي أثر تثبت
قصص التوراة حواليهم.
وطبعا اللي هيعمل الحاجتين دول هيعرف إنه مفيش أي حاجة رسمية اتنشرت عنه ولا أي بطنجان، عدا شوية المواقع والجرانين المعاتيه اللي خدو الخبر نسخ من مواقع أجنبية أو مجهولة.
هنبدأ الأول في
تتبع ظهور الخبر حسب بحث عملناه على النت، ودورنا على مصادر صحيحة، وتعليق أساتذة لينا في كلية الآثار جامعة القاهرة عليه.
أولا الخبر منشور على موقع باللغة الإنجليزية اسمه "وورلد
نيوز ديلي ريبورت" https://worldnewsdailyreport.com
وبيقول فيه إن بعثة مصرية عثرت على بواقي هياكل عظمية كتيرة ومراكب في
البحر الأحمر، وإن في علماء ربطوا ده بعصر إخناتون، وإن ده بيدي إشارة لإن قصص
التوراة عن فرعون موسى وخروج بني إسرائيل حقيقية.
 |
| صورة الخبر الكاذب من موقع "وورد نيوز ديلي ريبورت" للأخبار المزيفة |
لما تدخل على تعريف الموقع بنفسه تلاقيه معرف نفسه بإيه؟
قايل الكلام ده :
ABOUT US
World News Daily Report is an American Jewish
Zionist newspaper based in Tel Aviv and dedicated on covering biblical
archeology news and other mysteries around the Globe.
Our News Team is composed of award winning
Christian, Muslim and Jewish journalists, retired Mossad agents and veterans of
the Israeli Armed Forces.
We are based in Tel Aviv since 1988 where are
published more then 200,000 copies of our Daily Report paper edition everyday.
واختصارا قايل
إنه جرنان أمريكي يهودي صهيوني، مقره في تل أبيب، وشغال من 1988، وبيعتمد على نشر
الأخبار والتقارير اللي بتتكلم عن آثار الكتاب المقدس، وفريق العمل بتاعه من
صحفيين مسيحيين ومسلمين ويهود واخدين جوايز في الصحافة، ومعاهم عملاء موساد سابقين
وظباط قدام من الجيش الإسرائيلي.
وفي نفس الوقت كاتب تحت شعار اسمه فوق على الصفحة
الرئيسية على اليمين.
where facts don't
matter
يعني إن الحقيقة فيه "مش مهمة"
لما تدخل تدور على الموقع نفسه في جوجل يطلعلك كذا تقرير
في مواقع أجنبية وعربية عن إنه أساسا "موقع أخبار مزيفة وساخرة".
مثلا منها موقع https://realorsatire.com/
المتخصص في إنه يقول إيه الحقيقي وإيه المزيف في الأخبار ومواقع الصحافة، نلاقيه
بيعرف موقع "وورلد نيوز ديلي ريبورت" بإنه موقع "هزلي مزيف"،
ونصح القراء ما يعتمدوش على أخباره، وإنه حتى الشخصيات اللي بيذكرها بتكون خيالية.
ونفس
الحكاية كان تعريف الموقع على ويكبيديا باللغة الإنجليزية أنه موقع أخبار مزيفة
وهزلي
World
News Daily Report (WNDR)
is a satirical fake news website, purportedly describing itself as
an American Jewish Zionist newspaper based in Tel Aviv and dedicated on
covering biblical archeology news and other mysteries around the Globe
وقال ويكبيديا إن اللي بيشغله الكنديين جانيك موراي هول وأوليفييه ليجولت ويتبع الصحافة المزيفة على
غرار التابلويد في المدرسة القديمة لأسلافها ، مثل ويكلي وورلد نيوز.
وعلى
الموقع نفسه- موقع "وورلد نيوز ديلي ريبورت" بنلاقيه تحت تعريف نفسه وتحت كلمة disclaimer إن الشخصيات المذكورة عنده خيالية
واللي
اللغة الإنجليزية عنده ضعيفة زي حالاتي، هيلاقي برضو تقارير بالعربي تظهر كدب
الموقع، منها تقرير على موقع "قل ودل"، منشور في
يونيو 2019
قال في نهاية الخبر عن الاكتشاف المزيف تحت عنوان فيه استفسار أو تشكيك "هل تم العثور على بقايا جيش فرعون في البحر الأحمر؟".
بيقول في ختامه لتنبيه الناس:
" في النهاية،
بقي أن نشير إلى أن الخبر الشائع هذا، قد بدأ انتشاره منذ عدة سنوات، على يد موقع
عالمي يدعى “World News Daily Report”، وهو موقع الكتروني يعرف نفسه بأنه منصة
لتناقل الأخبار المفبركة بغرضالترفيه، ما يبدو وأنه لم يلفت انتباه الوكالات
العربية، التي تناقلت الخبر الكاذب مؤخرا دون أن تتأكد من مصداقية هذا الموقع
الطريف".
في
مواقع تانية ما عملتش كدة، لكن قدمت الخبر للمصريين والعالم على إنه
"حقيقة".
مثلا
نشر موقع "صدى البلد"، الخبر في 23 نوفمبر 2014 بعنوان فيه تأكيد على
إنه حصل فتقول:
"العثور على 400 هيكل عظمي وأسلحة
لجيش فرعون بالبحر "
وجوة التقرير قالت إنها نقلته عن "القناة العاشرة
الإسرائيلية"، ومفيش جوة الخبر أي تعليق لأي دكتور في كليات الآثار المصرية
عشان تاخد رأيه في الخبر اللي نشرته الصحف الإسرائيلية عن تاريخنا وآثارنا حقيقي
ولا لأ.
 |
| الخبر حسب ما منشور على موقع صدى البلد |
وبنفس الشكل نشر موقع "النهار" بعنوان:
"العثور على 400 هيكل عظمي وأسلحة لجيش فرعون بالبحر الأحمر"
ونشره موقع
"المصري اليوم" بعدها بـ 3 سنين في 2 أكتوبر 2017 تحت عنوان:
"العثور على
بقايا هياكل بشرية قُرب سواحل البحر الأحمر: "هذا يقودنا إلى جيش فرعون"
 |
| الخبر حسب ما منشور على موقع المصري اليوم |
وقالت إنها ناقلة الخبر من موقع "سبوتينج" الروسي، وكلفتش نفسها في الخبر برضو تتأكد من صفحة وزارة الآثار أو تتصل بالوزارة أو بدكاترة في كليات الآثار.. رغم حساسية الكلام عن النقطة دي بالذات في التاريخ، وهي اللي بيتروي عن فرعون موسى وبني إسرائيل واستغلال الإسرائيليين ليه في العالم.
والأسوأ من كل
دول الانتشار الكبير للخبر على مواقع التواصل الاجتماعي.. كتير نشروه زي ما هو،
وقليليين اللي حافظو على أمانة تاريخهم وشرف عقولهم وما اتسرعوش في النشر، ودورو
على مصادر مصرية رسمية تأكد أو تنفي الكلام.
ومن اللي اهتموا بتكذيب الخبر الدكتور ميسرة عبد الله حسين، أستاذنا في كلية الآثار جامعة القاهرة على صفحته على فيس بوك:
يبقى مين بيقرطس
الشعب المصري في العالم؟
أعادينا والهكسوس
من كل صنف ولون.. ولا إحنا بنقرطس نفسنا رقم (1).. والباقيين مجرد بيتشرو قراطيس
تانية يقرطسونا بيها على حس غفلتنا وقلة إحساسنا بقيمتنا وقيمة تاريخنا؟
وربنا ينور بصيرة
الجميع
********************
بقلم: إفتكار السيد (نفرتاري أحمس)
2 التعليقات:
للأسف الشديد الإعلام المصرى أصبح لا يهتم إلا بالفرقعات الصحفية ايا كان نوعها ومصدرها ولا يهتم إلا بما تحدثه الخبطات من انتشار وذيوع الصحفى او الجريدة بصرف النظر عن الأضرار بالوطن وتاريخه وسمعته بل وأمنه ...يحدث ذلك طمعا فى المال كما أنه يحدث أحيانا بجهل وفى معظم الأحيان بقصد وسوء نية ...مصر ليس بها اعلام وطنى مخلص لها .... الإعلاميين مخلصين لمن يصرحون لهم بالعمل أو يمنعوهم ومخلصين للدولارات ولا استثنى منهم احدا
نادر عمار
في استثناءات وناس شريفة كتير يا نادر، بس اللي ع السطح هما أكترهم اللي قلت عليهم
إرسال تعليق