برزمطة الإذاعة المصرية.. وحسين الجسمي "صوتها الأعلى"

 بقلم: إفتكار السيد (نفرتاري أحمس)

 الإذاعة المصرية، لسة هي البلسم اللي في الإعلام في مصر، زيها في التلفزيون زي قناة "ماسبيرو زمان" اللي هي أكتر مكان بنلاقيها بتراعي أصول الإعلام المصري والثقافة المصرية، إلا إنها بدأت تتملي بالمنغصات من الهكسسة اللي داخلة عليها، يعني من صوابع الهكسوس اللي بتلعب بيها.

الإذاعة المصرية كل ما بيعدي الوقت بتزيد فيها مساحة الثقافة الدخيلة فوق الثقافة المصرية

فالإذاعة المصرية، لسة فيها بتلاقي في نشرات الأخبار المعلومة والخبر بيتقدمو بطريقة هادية، ومزيكا تريح الأعصاب، وأصوات المذيعين كأنها بتطبطب عليك، ومن غير القلق وتعب الأعصاب اللي بتعمله فضائيات الأخبار، اللي بتقدم النشرات مليانة بكلمة "عاجل" ع الفاضي والمليان، ومزيكا تحسسك دايما إنه في خطر جاي، وخناقات الضيوف والمحللين السياسيين، وأصوات أوقات بتزعق، إلخ.

بخلاف المسلسلات والبرامج بتاعتها اللي برضو بتتقدم بأصوات تطبطب عليك، وبتقدم أحسن المعلومات والأفكار والقصص بعيد عن أكتر مسلسلات الفضائيات المليانة مشاهد وأفكار وأخلاق بتهد فينا وفي أخلاقنا وأعصابنا وبيوتنا وبلدنا.

إلا إنه الإذاعة المصرية مهياش في المريخ، لكنها في إيدين اللي ما بيرحمش.

 يعني تحت سلطة حكومة الهكسوس، اللي بقى واضح إن مشروعها الأساسي في البلد هو هكسستها، يعني تحويل كل حاجة فيها لبزرميط، أو اللي بسميه مشروعها لـ"بزرمطة مصر".

وبزرميط معناها إنه كل حاجة في مصر، سوا السكان أو التعليم أو الإعلام أو الوظايف أو الاقتصاد أو الفنون إلخ، يبقى تجميعة من المصريين والهوية المصرية على كل الهويات والأعراق والأديان واللغات والطوايف اللي موجودة في الدنيا، واللي بتدخلهم حكومة الهكسوس لمصر تحت عباية "اللاجئين"، أو "الأشقاء"، أو "المستثمرين"، أو "حالات إنسانية"، أو "عرايس وعرسان"، أو "طلبة"، أو "سياح" أو "مواهب فنية عايزة فرصة" إلخ ويبلطو في البلد، وبتفتحلهم أبواب أخد الجنسية المصرية وتمليك الأراضي والبيوت والمحلات المصرية بكل التسهيلات، كمان بتفتحلهم أبواب إنهم يبقو من صناع الهوية الجديدة وثقافتنا.

● بزرمطة الإذاعة

ففي رمضان اللي فات، رمضان سنة 2026، كنت بتابع الإذاعة، وخصوصا البرنامج العام، وعلى كترة المسلسلات والبرامج الحلوة اللي فيها، لكن الواحد اتحدف على قلبه كام طوبة ضربتنا بيها الإذاعة لما اتفاجئنا بحاجات بتسحبها لسكة البزرمطة (يعني تبقى مش طعمها وروحها مصرية لكن من كل الهويات).

فإزاي ده؟

هجيب أمثلة من اللي اتذاع على محطة البرنامج العام لأن هي اللي كنت بتابعها أكتر:

1- كان البرنامج العام فيه مسلسلات حلوة زي اللي قدمه محمد صبحي "مرفوع مؤقتا من الخدمة"، ومسلسل قدمه مدحت صالح اسمه "صايم ولا نايم" وغيرها من مسلسلات فرحت الناس، وفجأة وأنا بسمع الإذاعة لقيت المذيعة بتعلن عن مسلسل اسمه "حكايات مريم وعلاء"، وقالت إنه "للكاتبة السورية ندى عمران"!

أنا كأنه انضربت سكين في قلبي، وهو ليه واحدة سورية، أو من أي جنسية أجنبية، تكتبلنا مسلسلاتنا؟ مش كفاية بقى الجنسيات الأجنبية واخدة مساحة كبيرة في التمثيل، كمان بيألفو المسلسلات؟

والتأليف ده والإخراج حاجة أخطر ألف مرة من إنه الأجنبي يمثل أو يغني، لأن المؤلف هو اللي بيختار الفكر والمعاني اللي عايز يوصله لينا، يعني هو من صناع العقل المصري والرأي العام، فكون ده يتحط في إيدين أجنبية ده خطر، وكمان من ناس جاية من بيئة عكس البيئة المصرية في حاجات كتير.

الصدمة التانية إنه لما سمعت حاجة من المسلسل لقيته بيتكلم عن حاجات في التاريخ، مثلا الحملة الفرنسية، فإزاي واحدة أجنبية تكتبلي مسلسلات تاريخي وهي من بلد أصلا كتير من أهلها سابو تاريخهم وآثارهم لجيوش ومليشيات الاحتلال يعمل فيها اللي عايزه وجم على مصر وغيرها، أو محترفين تغيير في كتابة التاريخ على حسب مصالح الطايفة والمذهب عندهم؟

وحتى في أحسن الأحوال لو كتبت المسلسل التاريخي لينا بأمانة، فهي مصر مفيهاش مؤلفين مسلسلات في التاريخ عشان أستورد من برة؟

مسلسل "مرفوع مؤقتا من الخدمة" على محطة البرنامج العام

2- في برنامج اسمه "قامات قرآنية" كان بيتذاع الساعة 12:30 بعد نص الليل، بيتكلم عن قراء القرآن، المفروض إن تركيزه على القراء المصريين، خصوصا وإنه البرنامج كان بيشكر في مسابقة "دولة التلاوة" اللي كان هدفها ترعى المواهب بتاعة القراء، عشان تفضل مصر محتفظة بمكانتها في تلاوة القرآن.

بس نفس البرنامج جايب أغاني في التتر وجوة الحلقة لونها مش مصري، زي لحن أغاني اللي بيسموها الأناشيد الإسلامية اللي طلعت مع موجة "الدعاة الجدد"، زي عمرو خالد ومصطفى حسني، والناس اللي بتطلع ببدل إفرنجي ويتكلمو ناعم دول، وطلع في رجليهم منشدين برضو لابسين آخر موضة، وبيغنو أناشيد ليها ألحان مختلفة عن اللون المصري في الأناشيد والابتهالات الدينية.

أغاني أنا مش عارفة أوصفها كويس لأني مش بفهم في المصطلحات بتاعة المزيكا، بس هي نوعية ألحان شبه بعضها، ما تحسش فيها إبداع، كأنها موجة واحدة، مفيهاش التنوع في اللحن والنقلات والأحاسيس  والشجن والفرح والحرارة والغنى اللي في ألحان الابتهالات والأغاني الدينية المصرية، لكنها أغاني تحس فيها استسهال في اللحن، وليها شكل واحد، ويعطشو الجيم، وطريقة نطق الحروف مختلفة عن الصوتيات المصرية، وحاجة كدة كأن الواحد فيهم بيتكلم ويدندن أكتر منه بيغني، ومش طالعة من القلب قوي.

 زي اللي اللي اشتهر بيها سامي يوسف وماهر زين إلخ، والمدرسة دي بقى كمان يدخل فيها ويقلدها منشدين في مصر.

ماهر زين (يمين) وسامي يوسف

هي الأغاني دي حلوة مش وحشة، بس مش اللون بتاعنا، ولا روحنا، ولا ينفع تبقى هي البديل، أو إنها تاخد مساحة كبيرة في إعلامنا، وممكن تذاع عادي، بس فين فين، لكن ما تبقاش أساسية زي ما الواحد شافها في رمضان ده.

فمثلا مش عيب إني ممكن كل فترة أذيع فيلم أو مسلسل هندي، لكن أكيد عيب إني أعرض كمية كبيرة من الأفلام والمسلسلات الهندي لدرجة الناس تحسها بقت أساس من أساسيات ثقافة البلد.

طيب نرجع للبرنامج بتاع "قامات قرآنية" جايب المقدمة، التتر، أغنية "يا حامل القرآن" للمنشد الكويتي أحمد الهاجري، وكان ده في حلقة سمعتها يوم 7-3-2026 بعد الساعة 12:30 بعد نص الليل.

وجوة الحلقة جابو الأغنية بتاعة اللبناني ماهر زين، واسمها "هو القرآن".

يعني هنا جايب الأغنيتين، ومنهم التتر، لاتنين مش مصريين + الأغاني مش بالمصري ولا روح الإنشاد المصري اللي نعرفه في النقشبندي وطه الفشني ونصر الدين طوبار إلخ، والأغاني الدينية زي اللي غنتها ياسمين الخيام وعبد الحليم حافظ وعلي الحجار إلخ.

والعجيب كان بيتكلمو في الحلقة عن دولة التلاوة والفخر بالمقرأين بتوع دولة التلاوة زي الشيخ مصطفى إسماعيل موضوع حلقة اليوم ده.

طيب ليه ما جبتوش أغنية البرنامج تكون بأغنية أو مديح مصري؟

لأن كدة البرنامج مش بيشجع روح التلاوة المصرية وطريقة الإنشاد والابتهالات المصرية، ده كدة هوية بزرميط.

برنامج قامات قرآنية جايب عن شيوخ التلاوية المصريين بس التتر وأغاني في الحلقة لمطربين وفن مش مصري

وفي برنامج تاني اسمه "من تقوى القلوب" كان بيتذاع الساعة 7:13 مقدمة البرنامج أغنية ليها نفس اللون بتاع منشدين الدعاة الجدد برضو.

وحتى في أغاني لمطربين مصريين بقو يغنوها بالطريقة بتاعة الدعاة الجدد دي، بيغيرو في نبرة صوتهم ومخارج الحروف، الصوتيات يعني، لدرجة تشبه المنشدين الأجانب دول، فمثلا المحطة ذاعت أغنية "رمضان شهر الخير" بتاعة تامر حسني، بينطق فيها مخارج الحروف شبه الخليجي مش مصري، وبيعطش الجيم، واللحن بتاعها برضو لحن لونه مش مصري، وكان متذاعة باليل بعد الساعة 10:15 يوم 1-3-2026، وكمان كان بيعطش الجيم.

ومع إن إحنا المصريين فينا ناس بتنطق الجيم متعطشة، في وجه قبلي وحتت في وجه بحري، بس تامر حسني مثلا مش بيعطش الجيم عشان هو متربي على اللهجة دي، لكن تقليد لطريقة الإنشاد اللي جاية من برة.

كمان هو مخارج الصوت والأغنية بطريقة المنشدين اللي مش مصريين، فمثلا إحنا بنسمع علي الحجار بيقول أغاني في تترات المسلسلات اللي بتتسمى صعيدية، بس بنحسه بينطق بالمصري برضو، مش خليجي، لأنه بينطق زي المصريين برضو، مش بيقلد اللي مش مصرييين.

برضو اتذاعت أغنية بتقول "أهلا يا رمضان.. من العام للعام أهلا يا رمضان، تراويح وصيام مغفرة وإحسان"، الساعة 1:10 بعد نص الليل ع البرنامج العام، 2-3-2026 الصوت نفس الأداء بتاعة الدعاة الجدد والنطق الخليجي، ولما دورت عليها لقيتها لواحد اسمه أحمد الزعيم، واتفاجئت إنه مصري، لكن صوته اتلون بطريقة الدعاة الجدد دول اللي من كتر ما بيقلدو بعض بقى صوتهم شبه بعض.

في العيد بقى اتذاعت أغنية لأحمد سعد عن العيد، كانت معمولة في إعلان لشركة سعودية، وهي خليط من اللغة المصرية المحكية وبين اللغة العربية الفصحى بلهجات مش مصرية ونطق مش مصري.

وفي أغاني تانية كتير كانت بتتذاع بنفس الشكل بس ما لحقتش أعرف بتاعة مين ولا اسم الأغنية إيه.

فكدة سوا المطربين أو المنشدين مصريين أو من الخليج أو الشام، فهما بيشتركو في إنهم بيقدمو أغاني دينية بلون مش مصري، ونطق مش مصري، ويقللو الروح المصرية للإذاعة.

 

تامر حسني في أغنية رمضان شهر الخير اللي مش مصرية في طريقة غناه ليها

3- لاحظت برضو إنه في اهتمام بإذاعة أغاني شامية كتير، وباللهجة الشامية كمان.

وعايزة أقول حاجة الأول، إنه من أكتر من 5 سنين يمكن، سمعت كذا مرة ناس سوريين بيتصلو ببرامج في الإذاعة، تكون بتتكلم مثلا عن الأغاني وتترات المسلسلات، وألاقيهم بيقولولهم إحنا عايزين تكترو من الأغاني السورية، ومن تترات المسلسلات السورية.

وواضح إن ده بيتحقق، مش بس بسبب طلب الناس دي، لكن لأنها سياسة الحكومة.

فمثلا بقى يكتر إذاعة أغاني لصباح، ومنها أغاني باللبناني، أنا مكنتش سمعتها قبل كدة، وتقريبا مكنتش بتتذاع غير في لبنان، منهم أغنية اتذاعت في العيد يوم 22-3-2026 عن العيد وباللهجة اللبناني، بعدها علطول اتذاعت أغنية لأصالة اسمها بنت الأكابر بلهجة مش عارفة شامية ولا خليجية، وفي أغاني تانية شامية لمطربين من الشام أنا مش عارفاهم ولا عارفة أسامي الأغاني.

وكدا بقى اللون الشامي ولا الخليجي ورا بعضه، أو كل فترة صغيرة في نفس اليوم، وبقى الإذاعة لونها بيتغير وتبقى ألوان مش لون مصري.

● السؤال: يعني الفن المصري مسموح برة والفن الأجني يتمنع جوة؟

 في ناس هتقولي وهو جديدة يعني إنه يتذاع أغاني شامي؟ ما طول عمرنا بنسمع فيروز ووديع الصافي وفي أغاني لصباح وفريد الأطرش باللبناني إلخ.

بنقول آه، بس كانت في حدود قليلة، ومفيش دلوقت بلد مش بتذيع أغاني بلاد تانية، بس دلوقت بقى الموضوع بزيادة، وبقى مطربين من برة مصر بياخدو مساحة أكتر من المطربين المصريين، وألوان فنون مش مصرية بقت تتسَحَّب وتاخد مساحة أكتر من الفنون المصرية.

في حد تاني هيقول، طيب ما بلاد الخليج والشام وشمال أفريقيا إلخ بيذيعو الأغاني المصرية كتيرة قوي في الإعلام بتاعهم، ويمكن في وقت من الأوقات كانت أكتر من أغاني ولاد بلدهم، ليه هما ما شكوش ولا شافو ده خطر على هويتهم؟

نقول أيوة كان ده حاصل، بس لأن مصر اللي عندها إنتاج أكتر، وألحان أكتر، ومسلسلات أكتر، وهما اللي كانو بيطلبو ده، لأنه بيعوض نقص إنتاج عندهم، ومصر فنها حتى المصري الخالص فيه تنوع من جواه في النغمات والأداء إلخ، بيشد الشعوب التانية اللي ممكن تكون فنونها نمطية شوية.

بس دلوقت بقو هما يكترو شوية بشوية من إنتاج بلدهم، ولهجات بلادهم، ويدو ولاد بلادهم مساحات أكبر، وحتى اللي اتأثرو بيه من الفن المصري بقو يقدموه كأنه ثقافتهم وتراثهم الخاص، مش إنه مصري.

فإزاي أنا في مصر اللي معنديش نقص في الإنتاج ولا في المواهب، وعندي أصلا فيضان من المواهب مش لاقيين فرص، أروح أعمل العكس، يعني كل يوم أزود مساحة الفنانين اللي مش مصريين، ولون الفن اللي مش مصري، على حساب الفن المصري، يعني إزاي هما يتقدمو في حماية هويتهم وأنا أتأخر؟

فإنه يبقى عندي فنون من البلاد التانية مفهوم، مش بنقول نمنع الأغاني اللي مش مصرية، لكن إنها تبقى بالكترة دي وبلون ممكن يعلى فوق لوني وبشكل يظلم فن البلد وفرص ولاد البلد دي كأنها حاجة مقصودة، عشان الأجيال الجديدة تتعود على إن البلد دي بزرميط من كل الألوان والهويات، وهي للجميع مش للمصريين.

 ● هوجة حسين الجسمي

 نيجي بقى للمطرب الإماراتي حسين الجسمي، وده حسب اللي تابعته في شهر رمضان أقدر أقول إنه بقى كأنه "نجم الإذاعة الأول"، حسيته أكتر حد اتذاعتله أغاني بين كل المطربين المصريين واللي مش مصريين.

ففي كل مناسبة بتلاقي أغاني للجسمي (أغاني لرمضان، دينية، وطنية، عاطفية إلخ) وليل ضهر عصر مغرب عشا فجر أغاني للجسمي، جوة فواصل البرامج أغاني للجسمي، لدرجة تحس ودنك مش بيغيب عنها صوت الجسمي، ووصلت الحكاية لإنه واخدين أغانية تترات لـ 3 برامج.

نتخيل تترات لمطرب واحد، ومش من مصر، لـ 3 برامج على محطة إذاعة واحدة في شهر واحد، ويمكن يكون أكتر كمان فأنا مش متابعة محطة البرنامج العام 24 ساعة، وكمان ما تابعتش بقية المحطات.

البرامج دي هي برنامج "السر في التفاصيل" كان بيتذاع بعد الفطار الساعة 7، وهو عن عادات رمضان، وبتتذاع فيه أغنية "رمضان في مصر حاجة تانية".

وبرنامج "هكذا عاش" في الساعة 7 إلا 3 دقايق بعد الفطار، وهو عن سنن الرسول، وبتتذاع في التتر أغنية "صلو صلو على رسول الله"، وكمان بيتاخد منها فواصل جوة البرنامج.

وبرنامج "محطة سعادة" برضو المقدمة أغنية بصوت الجسمي، والفواصل جوة نفس البرنامج من نفس الأغنية للجسمي.

ده بخلاف أغنية "رمضان في مصر حاجة تانية" اللي بقت أساسية في الراديو وغيره أكتر من أغاني مصرية رمضانية تانية، وأغاني تانية ليه دينية ووطنية زي أغنية "الله يا الله.. أنت العظيم المستعان".

والسؤال هنا: كام مطرب مصري بقاله تتر في 3 برامج في محطة واحدة؟ بخلاف أغانية ليل نهار شغالة؟

ده علي الحجار أو مدحت صالح أو عبد الحليم حافظ مثلا مكنتش بحس إنهم بياخدو نفس الفرصة.

حسين الجسمي

وفيه هنا مشكلة تانية في حسين الجسمي، إيه هي؟

إن مع إن أغاني حسين الجسمي مهياش زي الأغاني بتاعة منشدين موجة الدعاة الجدد، يعني في اللحن بتاعها والكلام محتفظة باللون المصري، لكن الجسمي كترة أغانية وإنه يتكتبله مخصوص كل الأغاني دي في كل مناسبة يبقاله وجود، وبكمية كبيرة مشكلة بالنسبة ليا في كذا حاجة:

1- أول حاجة رنة صوته مش مصرية، جنب إنها لون واحد مش بتتنوع ولا بيبان فيها قوي الفرحة والدهشة والحزن والغضب والحنية وو زي الأصوات المصرية.

2- إنه الجسمي في الآخر شكله المشهور إنه بالعقال واللبس الخليجي، فحتى لما بيغني مصري بيبقى في الدماغ إن اللي بيغني الأغنية دي خليجي، ولما كل مناسبة مصرية، زي رمضان أو المناسبات الوطنية إلخ، يبقى الكلام مصري واللحن مصري واللبس خليجي، في رأيي ده نوع من البزرمطة، بتديني تشكيلة كدة عمرها ما كانت موجودة في الفن المصري، وبتشيل منه ركن أساسي في إنه الأغنية دي تكون مصري بإحساس مصري 100%، في اللي يخص "طلة المطرب".

ومثلا سؤال، أغنية زي "رمضان في مصر حاجة تانية"، و"بشرة خير" كان أحلى يغنيها مدحت صالح أو هشام عباس أو حكيم، ولا يغنيها حسين الجسمي بصوته الخليجي ولبسه الخليجي؟

وأغنية "سيادة المواطن ابن مصر" اللي هي عبارة عن كلام بيقوله المفروض مواطن مصري للريس بتاعه، الصح كان يقولها مغني مصري ولا واحد خليجي ولابس لبس خليجي كأنه عادي نشوف حد خليجي بيقول للريس بتاعنا تعمل إيه وما تعملش إيه.

زي بالظبط ما بقينا نشوف سودانيين، شكلهم حتى زنجي، ومرة شفت واحدة نيجيرية، وبتتكلم مصري وتقول إنها خدت الجنسية المصرية، اللهجة المصرية وشكلها النيجيري مش لايقين على بعض.

حاجة بتميع مع الوقت الشخصية المصرية وصورتها في عينينا، وتخلينا من غير ما نحس نقبل إنه ناس من أي بلد وأي عرقية يتقال إنه مصري، مع إنه لسة محتفظ بشكله وثقافته الأجنبية.

وده مثلا عكس الفنانين الأجانب بتوع زمان، فمثلا لما جت لمصر فايزة أحمد أو نور الهدى أو ماري منيب أو عبد السلام النابلسي، ومع إني شايفة إنه كان الفرص بتاعتهم أولى بيها مصريين، لكن لما كان بيغنو أو يمثلو كانو بيلبسو الروح المصرية واللون المصري، سوا في اللهجة أو الأداء، وكانو بيلبسو زي ما بيلبس زمايلهم الفنانين المصريين، وأشكالهم مش غريبة قوي، فمكنش بنحس إنه فيها لون مصري ولون شامي ويعملو بزرميط سوا، كنا بنشوف اللون المصري بس، حتى إنه ناس معرفتش إنهم مش مصريين غير متأخر.

للمرة التانية بنقول مش معنى ده إننا بنقول نمنع أغاني اللي مش مصرية، لكن المفروض تبقى بمقدار أقل من كدة، زي ما طول عمرها موجود أغاني مش مصري، بس مكناش بنحس إنها بتهدد هوية الإعلام بتاعنا والفن بتاعنا.

ماري منيب

● إيه ذكريات المصريين بعدين؟

المذيع في البرنامج العام بيقول في فواصل يوم العيد إنه ذكريات العيد عندنا هي أغنية يا ليلة العيد لأم كلثوم إلخ، طيب الجيل اللي بيكبر دلوقت واللي جاي ذكرياتهم هتكون إيه عن رمضان والعيد؟ هتكون بالمصري ولا هتكون بالبزرميط من كترة ما الإعلام بقى قاصد يحول هوية المصريين لبزرميط؟

المقالة مسموعة في حلقة على قناة كيمة والخاسوت

القاهرة 27-3-2026

مواضيع ليها صلة:

حملة سعودية إخوانية لسرقة رموز المجد الحربي المصري

وصية حور.. الوصية الحارسة.. أقدم نشيد وطني في مصر في نصوص الأهرام

ليه.. مصر بقت تخسر أكتر ما بتكسب حتى لو فازت في الحرب؟ (أمثلة تاريخ قديم وجديد)

  القاهرة- إفتكار السيد (نفرتاري أحمس)

ليه إحنا مصر البلد العظيمة القوية وقعنا في احتلالات، وليه حتى لما بنحرر نفسنا أو يحصل بينا وبين غيرنا أزمات ما بقيناش بناخد حقنا كويس منهم، ولا بندفعهم تمن يخليهم يفكرو ألف مرة قبل ما يضايقونا تاني، وليه في أكتر معاركنا مع غيرنا، حتى لو خلصت بانتصار حربي لينا هما بيقدرو يرجعو ويكسبو بالدحلبة أكتر ما كان يتمنوه بالحرب، وليه الشعوب التانية، حتى الضعيفة والمتخلفة، بقى سهل تقرطسنا وتلهف بلدنا وخيرها وتتسيد علينا فيها حتى من غير حرب؟

الأسئلة دي جاوبنا عليها بالتفصيل والوثايق وأحداث التاريخ في كتاب "نكبة توطين الهكسوس"، ولخصناها في كذا مقالة زي مقالات " عقيدة مصر القتالية والأقواس التسعة.. من أعداؤنا؟"، و"وصية حور.. وثيقة العهد لحماية مصر من الاحتلال كيف نسيناها؟ أقدم نشيد وطني لمصر" إلخ.

فوق نقوش مصرية لانتصارنا على الأجانب لما بيدخلو بوش مكشوف بالسلاح، وتحت صورة لنفش وإحنا بنقبل توطينهم لما بيدخلولنا بالدحلبة باسم لاجئ وتاجر وعامل إلخ، ولما بيتمكنو بيستقوو بجماعات من برة لاحتلال مصر

إزاي اتبخر الجيش المصري 4 مرات ومتهدد بالخامسة؟ ج2 (أول مرة)

المرة اللي فاتت اتكلمنا باختصار عن إمتى الجيش المصري راح مننا 4 مرات، وإيه هي وصفة "ماعت" اللي لما بنمشي عليها إحنا المصريين بلدنا بتكون قوية وجيشنا متصان، وإيه وصفة "إزفت" يعني الفوضى، اللي لما بنغفل ونمشي عليها بلدنا بتقع، وجيشنا بيتخبر من بين إيدينا، والأجانب من حوالينا بيقدرو يتمكنو من بلدنا وينهشو فينا.

وإيه هي وصية "حور" لينا في حفظ حدود مصر. 

إزاي اتبخر الجيش المصري 4 مرات في التاريخ ومتهدد بالخامسة؟ ج1 ضياع الكتالوج

  طبعا كلمة "اتبخر" كلمة تقيلة على القلب واللسان إنه نقولها على جيشنا، لكن ما هي برضو تقيلة إننا نقول إن مصر سقطت في احتلالات أكتر من 2000  سنة، أوإن مصر العظيمة حكمها عبيد وجواري وبدو من كذا صنف، لكن ده حصل فعلا.. والسؤال ليه حصل؟

 

وثيقة العهد الكيمتية.. الوصية الحارسة لمصر من الفوضى والاحتلالات

 في المقالة السابقة  نقلنا من الكتاب ما يخص أخطر عيوب مصر، وهو عدم معرفة المصريين بطبائع الشعوب الأخرى، ونسيان تاريخهم معها، وطمعهم فيها، وتجاربهم في غزوها، والآن نستعرض وصية الأجداد للتغلب على هذا العيب، والنجاة من الفوضى والاحتلالات.

 

"ترعة المحمودية" ( مذبحة محمد علي للفلاحين) هل يحتلها الأجانب من جديد؟

  أصاب ميناء الإسكندرية الإهمال في أيام الاحتلال العثمانلي، ووضعه محمد علي (الوالي العثمانلي) على خريطة مشروعات التحديث، فكان حفر "ترعة المحمودية" لتكون شريان تغذية الإسكندرية، ولكن السؤال هو كيف تمت هذه المشروعات، وبعرق ودم من، وسقطت خيراتها في حجر من؟ وهل عومل المصريون الذين نفذوها بالكرامة اللائقة، أما بنظام بالقهر والقتل.

عقيدة مصر القتالية و"الأقواس التسعة".. من أعداؤنا؟

بقلم: إفتكار السيد (نفرتاري أحمس)

إذا وزعت ورق اليوم (في سنة 2020) على المصريين المتعلمين، بما فيهم الرئيس ورئيس الوزراء والوزراء وقادة الجيش والداخلية والمخابرات والأكاديميين والإعلاميين وكافة صناع القرار والرأي العام، وطلبت منهم الإجابة على سؤال واحد مكتوب فيها وهو: من هم أعداء مصر؟ ماذا ستكون الإجابة؟

"أوغاد"، "أشرار"، "موضة قديمة".. شتائم يصوبها أصحاب خطة "تفكيك أمريكا" للوطنيين

بعد أن استوطن البريطانيون ثم أبناء أوروبا الغربية "الأنجلو ساكسون" أمريكا في القرنين 17 و 18، وأعطوها هويتها ودولتها، لم يفتحوا باب الهجرة أمام بقية الأجناس مثل الآسيويين واللاتين والشرق الأوسط إلا في القرن 20، وبسبب هذه الهجرات وما حملته من لغات وديانات مختلفة خُلقت أزمة هوية لم تكن معروفة في أمريكا، وبدأ الإحساس بالخوف من المستقبل[1].

ماذا قال المؤرخ "كلوت بك" عن دور توطين الأجانب في تدمير حضارة مصر واحتلالها؟

اندهش الكثير من الرحالة والمؤرخين الفرنسيين حين زاروا مصر في القرنين 18 و19 من الحال الذي وصلت إليه مصر وأهلها في ذلك الوقت من احتلال وإهانة على يد الأجانب، مقارنة بما قرأوه في الكتب قبل أن يأتوها عن تاريخها المجيد، وما عاينوه في معابدها من فخامة وكبرياء، وعصروا أذهانهم ليصلوا إلى السبب.

وصية حور..وثيقة العهد لحماية مصر من الاحتلال، كيف نسيناها؟ (أقدم نشيد وطني لمصر)

إن الآباء المؤسسين، أو ربما السماء، العالمين بنقاط القوة في كيمة (مصر)، ونقاط ضعفها، وطمع الشعوب الأجنبية فيها، وضعوا لها "الوصية الحارسة"، التي سجلتها نصوص الأهرام بألا تفتح بواباتها (حدودها) للأجانب المشرأبة أعناقهم إليها، الذين لا يكفون عن التفكير في غزوها، سواء من الشرق أو الغرب أو الشمال أو الجنوب، فالإله أسس هذه الحدود لحمايتها، ولعلمه بأنها مطمع الجميع.. وفي هذا إشارة لوجود حدود لمصر منذ أقدم العصور، والمصريون ملزمون بتحصينها ماديا (بالحصون ومنع الهجرات الأجنبية) ومعنويا (بتطبيق ماعت)[1].

 

هل مصر "مالهاش كتالوج"؟.. في دستور "ماعت" وصرخة "بردية إيبور" الجواب

تدور هذه الأيام، عبارة تقول إن من عبقرية مصر أن شعبها "مالوش كتالوج"، أي لا يتوقع أحد كيف سيتصرف في المصاعب التي تواجهه.
 وللحق، وللتاريخ.. هذه عبارة خاطئة تماما، بل مضللة- ولو عن غير قصد- فالشعب "اللي مالوش كتالوج" هو شعب "مالوش أصول راسخة ولا هوية".

كيف سقطت مصر من عليائها قديما ومن هم هكسوس القرن 21؟

لم يقصد حاكم مصري خالص المصرية إطلاقا أن يسلم مصر للأجانب، أو يرفع راية غير راية "مصر للمصريين"، أو أن يكون سببا في سقوط مصر في يد أعاديها، ولكن بعضهم تسبب في هذا عن غفلة وإهمال، والغفلة نتيجتها أشنع من الخيانة.

التمويل الأزرق لتفخيخ البلاد بالهجرات واللاجئين (ج4) الغدر من الداخل، أمريكا ثم مصر؟

إن الخيوط تتشابك، قديمها مع حديثها...لتغزل سطور القصة كاملة.

فمنذ 150 عاما نُسب للجنرال ألبرت بايك (سنة 1871) أحد قادة الجيش في الحرب الأهلية الأمريكية، قوله إنه بعد الحروب العالمية الثلاثة وثورتين ستبقى الولايات المتحدة القوة العالمية الوحيدة، ولكن في الثورة الثالثة، التي وصفها بايك بأنها أعظم كارثة اجتماعية ستمر على العالم، ستتفكك الولايات المتحدة بغدر من الداخل، وستقع في أيدي أتباع إبليس "مثل فاكهة شديدة النضج".

يتجرأ ريس مصر يقول: أنا فلاح (كيمتي) وبس ؟

(الصورة وتعليقها متاخدة من كتاب "نكبة توطين الهكسوس")

يتجرأ الريس وكل الحكومة في مصر دلوقت يقولو قصاد شعبهم أو قصاد العالم: أنا فلاح ؟

وفلاح بالمعنى الكيمتي الصافي الحقيقي ليها.. يعني ابن الأرض اللي مالوش لون إلا أرضه ومالوش أي انتماء تاني جاي من برة مصر، أيا كانت مهنة الفلاح ده لأنها مش مرتبطة بالزراعة بس.

يتجرأو يقولو: مصر للمصريين وإن مصر مش للجميع ؟

يتجرأو يقولو: مصر جنسية وهوية وأرض حق حصري على المصريين؟ وخلاص قفلنا باب التجنيس وتمليك أرض مصر للأجانب اللي فتحه علينا المحتلين وأتباع مشاريع الاحتلال الناعم؟

يتجرأو يقولو : إن هويتي مصر وبس، مش هوية بزرميط متشكلة زي لبس البهلوانات من كل بلد وحضارة شوية؟

يتجرأو يقولو: ممنوع أي حد حامل للجنسية المصرية يقول على نفسه إنه مصري وجنبها أي حاجة تانية؟ ممنوع يقول إنه مصري أرمني، أو مصري يوناني، أو مصري عربي، أو مصري تركي، أو يتباهى بأي أصل أجنبي اتسلل لمصر في وقت غفلة أو تحت سيف الاحتلال؟

يتجرأوا يتكلمو عن "ماعت"، و"وصية حور" دستور مصر الأصلي، وتبقى هي روح أي دستور أو قانون مصري يتعمل، مع العلم إن ماعت مش بتتعارض مع الإسلام ولا المسيحية؟

طب يتجرأ الإعلام المصري الرسمي يقولها؟

تتجرأ المدارس والجامعات في مصر تقولها؟

يتجرأ يقولها الأزهر؟ الكنيسة؟

يتجرأو يقولو إحنا فلاحين من ضهر أجدادنا المصريين (الكيمتيين) سوا بالدم أو بالانتماء والولاء، ومالناش أي ولاء أي جنس أو حضارة اتحدفت على مصر تحت سيوف الاحتلال أو الغدر والخداع والقرطسة؟

يتجرأو يقولو إن أي حكم لمصر ما بين زمن الأجداد لحد 1952 هي احتلال سوا كان من شعوب البحر أو يوناني أو فارسي أو آشوري أو عربي أو عبيدي (فاطمي) أو أيوبي أو مملوكي أو عثمانلي أو علوي (عيلة محمد علي)، هو احتلال مرفوض، من غير أي استثنا؟

يسمحلهم الجهل بتاريخ مصر يقولوها؟

يسمحلهم التعليم البزرميط والإعلام والفن البزرميط اللي ربونا على إننا شعب بزرميط مرقع من كل جنس أجنبي رقعة  يقولوها؟

تسمحلهم النظريات الأجنبية المستوردة في السياسة والحكم والاجتماع وتعريف الهويات، والتيارات الليبرالية واليسارية والعروبية اللي بينتمي ليها معظم اللي في الحكم والتعليم والإعلام يقولوها؟

تسمحلهم الاتفاقيات الدولية وعنظزة المستثمرين الأجانب (عرب أو عجم) يقولوها؟

يقدرو يقولوها في يوم في وش "الأشقاء العرب"، و"الأصدقاء اليونان"، و"الأشقاء الأفارقة"، وصندوق روتشيلد "صندوق النقد الدولي" اللي راجعين يحتلو مصر تحت اسم "استثمار"، "عولمة"، "السوق الحر"، و"عروبة" وحملة "جذور" اللي بتسلم الإسكندرية لليونانيين، و"دعم اللاجئين" اللي بيسلم البلد لكل أجناس الأرض؟ إلخ

(مصدر الصورة وتعليقها من كتاب "نكبة توطين الهكسوس")

يسمحلهم قلة إحساسهم بقيمتهم وقيمة بلدهم وقيمة تضحيات الأجداد في الشغل وبنا مصر أو في حروب وثورات التحرير يقولوها؟

يوم ما نربي ولادنا واللي حوالينا على إنهم مصريين وبس، فلاحين يعني، وإن كلام فلاح مصري هي شرفه وهويته، وهي معناها إنه الوارث الوحيد لأعظم حضارة في الأرض، وإنه له لون واحد مش مبقع بكذا لون، وإن أرضه وبلده حق لأهل بلده وبس، ويحكم على تاريخه بعين الفلاح مش بعين عربية ولا يونانية ولا مملوكية ولا عثمانلية ولا أوروبية إلخ، وقتها هيخرج من بين ضهرنا ناس تمسك الحكومة، والتعليم، والفن، والأزهر، والكنيسة، والإعلام، يقولوها بملو البق، بقوة قلب...

ووقتها بس هنقطع كل القوانين واتفاقيات القرطسة المحلية والدولية اللي خلت مصر تتقدم سداح مداح لكل العالم باسم امتزاج حضارات، قبول الآخر، تشجيع الاستثمار، تشجيع السياحة، التجنيس، القومية العربية، إلخ إلخ إلخ

وقتها بس هنرجع نهزم روتشيلد وشركاه تاني، زي ما هزمناهم قبل كدة كتير في جولات زي كفاح مصطفى كامل ومحمد فريد وثورة 1919 وثورة 1952 قبل ما تتبلي بالقومية العربية.

ووقتها بس هنعرف إن مصر رجعت "حرة"، وأولادها "أحرار".. مش حابسين نفسنا بإيدنا وبجهلنا في أحقر استعباد، استعباد وصلنا لدرجة ما نتجرأش ندافع عن حضارتنا وأرضنا وهويتنا بحق قصاد العالم، ونخاف ونكش من تهم العنصرية أو التعصب في حين أعراق وأجناس الأرض بتعلن بكل حريتها عن هويتها الحصرية.

ووقتها هنقدر نخلع القرطاس الكبير اللي فوق راسنا، وتحل محله الطاقية الفلاحي اللي تعرف معنى الأرض والعرض والشرف المصري (الكيمتي) الحق..

وربنا ينور بصيرة الجميع

(مزيد عن "ماعت"، و"وصية حور"، و"وثيقة العهد المصرية"، وشرح لدور الهجرات الأجنبية في تشويه وتخبية الهوية المصرية الحقيقية "الكيمتية"، ودور بارونات المال والربا والمحافل الماسونية والنارية "النورانية" في العالم- زي روتشيلد وشركاه- في حدف تيارات الليبرالية والشيوعية والعروبة وتنظيم الإخوان المسلمين لمحاربة عودة الهوية المصرية بعد ثورة 1881 في كتاب نكبة توطين الهكسوس)

تحميل كتاب نكبة توطين الهكسوس

 ***********************

بقلم: إفتكار السيد (نفرتاري أحمس)